Meng Lai107
1CHAKRAMANG kowi tek pe awmrawm lai büa diah;tawngplawng kowchow panow aia dow aiungma chekhai,aia kowh achur uowi dowi mih sakraura dow chowngchowng saksakma anikma chekhai.2CHAKRAMANG lawngah mih maru-uüa dow naiawngün laiklow pacham tek lah,amatni kowi dow ransu-uüa rut hownia aia lawngah khai.3Amatni kowi dow prenlang hownia arasang aia uang pawla khai,satlawt hai satkup, tawngphak hai mrawkphak hownia aia uang pawla khai.4Amatni pungmadawng kowi maru sangrum dow süngrüp süngkangma kowi krawi lenla pang khai.Nachenganchepaw amatni nauowiah kown mih marow dow krawi ka cham büah dowi chekhai.5Amatni dow hawm sakkrai hai tui sakkrai hown kawm büah khai,amatni dow sakkrai lai bowt kowh kow uakma phaw khai bowt.6Kla phih hanow amatni dow CHAKRAMANG tut-e awr kar khai,now amatni kratra hownia CHAKRAMANG dow uang lawngah khai.7Amatni kowi dow tiama tengma mih iawng aia pawla khai,amatni uowiah kown mih marow kowi aia pawla khai.8Maru vüi CHAKRAMANG changah mih awdara lup rakowi maru pacham tek pe awmrawm lai lah;aia kowh achur uowi dowi mih sakraura rakowi maru pacham tek pe awmrawm lai lah.9Tui sakkrai miuüa kowi dow du pat aia pe khamah tui reng,now hawm sakkrai miuüa kowi dow chakkham iung hown aia pe duah reng chekhai.10Maru sangrum dow aiiuma mih arah kowi uowi khai;amatni dow lawngha leng hown tatawm hüah chekhai,now amatni dow tuak kawm tuak krat hown uowi khai.11Tawngplawng kowchow panow amatni dow CHAKRAMANG laiklow kowi kingküa büah khai,lang kri lang kraing mih Thurai kowh prengia iung laiklow sui büah khai.12Naiawng rakowi aia dow kawmkrat hown amatni kowh bawrira mih piakta pe khai,amatni piak mih khin khe amatni kowi amiapaw khowngah dowi chekhai.13Kla phih hanow amatni dow CHAKRAMANG tut-e awr kar khai,now amatni kratra hownia CHAKRAMANG dow uang towkala khai.14Aiiu iawng mih kratra hownia amatni kowi aia uang lawtla khai,amatni kowi tawmla mih leng dow aia raita pe khai.15Maru vüi CHAKRAMANG changah mih awdara lup rakowi maru pacham tek pe awmrawm lai lah;aia kowh achur uowi dowi mih sakraura rakowi maru pacham tek pe awmrawm lai lah.16Aia dow thawngrum kowi kowh kri tapplawt mih piakta pe khai,now tapplawt klia müa lawngha dung paw aia klowkta pe khai.17Abualama miuüa dow Thurai kowi kingküa rakowi kawm khai,now amatni dow amatni chang ngak rakowi kawm khai.18Amatni dow kawm lai bowt kowh chakkham khowm daw büah dowi bowt,now makowng kimplawt re-e uang towm büah khai bowt.19Kla phih hanow amatni dow CHAKRAMANG tut-e awr kar khai,now amatni kratra hownia CHAKRAMANG dow uang towkala khai.20Aia kowh laiklow hown amatni kowi dow aia iungah khai,now amatni kowi dow kowngra hownia aia lawngah khai.21Maru vüi CHAKRAMANG changah mih awdara lup rakowi maru pacham tek pe awmrawm lai lah;aia kowh achur uowi dowi mih sakraura rakowi maru pacham tek pe awmrawm lai lah.22Amatni dow tekla awmrawm lai kown mih uanap pacham chang büah lah,aia changah mih lup lawnguan maten dow awmrawm meng hown pacham tek büah lah.23Tawngbak mih maru dow chawnlawng hown sata kowi krawi kowi reng,now amatni dow sata kowi chang kun reng chekhai.24Naiawngün maru-uüa dow CHAKRAMANG kowh awdara lup khi reng,amatni dow sata kowi kowh liku uangchak dawng kowi ün aia kowh awdara lup khi reng chekhai.25Aia kowh ana pek hown uangchak mang uang khai,nahanow sata tui mih awr talowng phunglung khai.26Nami tuilowng hown chawnlawng mih mukuang kowi pat awr tapowng khai,now sata phai mowr pat iu plan dowh khai.Naiawng rakowi chawnlawng kowi kowh lup chang miuüa dow lainowmma takrow khai.27Amatni dow pua mih iawng tim bawilawi khai bowt,now tawng chow nachang kown mih tuk büah dowi bowt chekhai.28Kla phih hanow amatni dow CHAKRAMANG tut-e awr kar khai,now amatni kratra hownia CHAKRAMANG dow uang lawngah khai.29Aia dow uang taingta pe liku uangchak khai,nahanow sata tuilowng dow uang rim khai bowt.30Sata tui uang rim hanow amatni dow awmrawm khai,now amatni kowiah kown mih chawnlawng naira kowi dow aia pawla khai bowt.31Maru vüi CHAKRAMANG changah mih awdara lup rakowi maru pacham tek pe awmrawm lai lah;aia kowh achur uowi dowi mih sakraura rakowi maru pacham tek pe awmrawm lai lah.32Amatni dow takua talawmra kowi aia kowi pacham kiowah lah,lawngtang aluchowuüa takua talawmra kowi aia kowi pacham rowsiah lah.33Aia dow aw kowi ün süngrüp süngkangma iawng changah khai,now tui kla sawmlawm mih awchawng kowi ün kangkhawngma mih krawng aia changah khai.34Aia dow asi uowi mih krawng kowi asi uowi dowi iawng changah khai.Tawngplawng kowchow panow nakowi kowh uowi miuüa chang ngak rakowi chekhai.35Süngrüp süngkangma kowi dow kanh aia changah khai,now kangkhawngma mih krawng kowi dow tui kla sawmlawm mih aw iawng aia changah khai.36Sakkrai miuüa kowi dow nami pren kowi aia pe uowiah khai,now amatni dow nakowi thawp marow khai.37Amatni dow lai kowi sawt aliu khai,now grep ruih paw chowk büah khai.Nahanow amatni dow luprak ahuma ka büah khai.38Aia dow amatni kowi peah prasi khai;amatni kowh maru iun dow uang kawm khai,now amatni kowh tawncher paw uang hu khai.39Nachenganchepaw Thurai maru-uüa dow nowng changra,phih hai tuak kratra hown maru iun uang plan e khai.Nahanow amatni kowh chownglawng dow uang nga khai.40Amatni kowi changah nowng miuüa kowi dow CHAKRAMANG peah rukrai khai,amatni kowi dow tiama uowi dowi mih süngrüp süngkangma kowi aia pe mangah khai.41Tawkche ngarawng ngarai miuüa kowi dow krat pusara hownia aia lawngah reng,amatni kowi dow ruapur hawmh prung iawng aia pe prungah reng chekhai.42Thurai kowi ringkaw miuüa dow naiawngün khi hanow awmrawm khai.Tawkche maru ngakuüa dow ka laira dowi bowt chekhai.43Chanlaima mih maru dow naiawngün lawnguan kowi pacham pe ching reng lah,now CHAKRAMANG kowh achur uowi dowi mih sakraura lawnguan kowi pacham paw tuak büah reng lah.
The Seed Company