Meng Lai102
Mami dow kawmkrat hown uowi mih maru kowh prasi lük chekhai. Tuak kawm tuak krat khe CHAKRAMANG tut-e aia awr lü awr lengah mih chekhai.
1Aw CHAKRAMANG, ang awr lü awr leng mih hawt sünta ang diah,nakala khowng kownkow ang awr kar mih klow hawt sünta ang diah.2Ang kla phih mih khin khe hangkow cham dangta ang diah.Ang uang lü uang leng mih kowi hawt sünta ang diah;ang uang haw en hown krowksang uang klang ang diah.3Tawngplawng kowchow panow ang kowh chownglawng dow maikhük tama mih iawng towbowt,now ang kowh hut paw maih kowi kam mih iawng towbowt.4Sat den hown kowh ngawi mih pram iawng ang kowh sak ngawi khai bowt,chakkham chak khowm padow ang talawt dowi bowt chekhai.5Ang dow kar lai rakowi pik hai hut klen kowi tawngpaw uowi dowi bowt.6Ang dow süngrüp süngkangma kowi kowh bungku iawng ang phaw khai bowt,apiaknama mih arah kowi kowh bungku iawng ang phaw khai bowt.7Tuak krat lai bowt kowh ang tamüi dowi bowt chekhai,ang dow kimluk kowi kowh auiua uowi dowi mih uakling iawng towbowt.8Ransu-uüa dow ni towng ni towng prawngren ang khai;amatni dow changla ang rensi kau hanow ang ming hown cham krawi pe piati khai.9Ang dow kawmkrat lai bowt kowh plawi khowm ang changla chakkham khai bowt,now ang kowh mik tui khowm ang khamah mih tui kowi tawi talawk khai bowt.10Tawngplawng kowchow panow en kunmarau ang khai.Naiawng rakowi mawngchawng kuak iawng en kuak ang khai.11Ang kowh chownglawng dow sat kowi khe kowh klim uang takuak iawng uang kowi khai bowt,ang dow sat den hown kowh pram ngawi mih iawng uang phaw khai bowt.12Nachenganchepaw aw CHAKRAMANG,en dow chowngchowng saksakma en mang chowm rah kowi uowi reng,en ming dow chowngchowng saksakma maru natuakah reng kown.13En dow Zaiawn marow kowi nasaksing sanaah kown.Tawngplawng kowchow panow aia kowi nasaksing sanaah kown mih khin dow uang na khai bowt,nami khowm bowkta mih khin dow uang towm khai bowt.14Nami marow kowi kowh hua ün dow en naruüa tut-e asung uowima chekhai,nakowi kowh dinchow kowi khowm amatni dow saksing sanaah khai.15Nakhowk khe CHAKRAMANG ming ta hanow akeng chenchapuüa maten dow nakram kown,en kowh kraingra khi hanow lusa kowi kowh mang maten dow nakram kown.16CHAKRAMANG dow Zaiawn marow naplan thawpah iawk kown,nakowi dow aiamat kowh kraingra aia nauang plan tüngah iawk kown.17Aia dow ngarawng ngaraima miuüa kowh prasi lük klow nasünta pe kown,amatni awr lü awr lengah mih dow aia nanuata pe kown nadowi.18Maiawngün laiklow dow pur prakowi kowh krungchakuüa vüi pacham ruiah lah,nahanow kawmat kowh uang dia dowi tak miuüa paw CHAKRAMANG kowi naia rowsi kown towbowt:19Nar kowi takhang miuüa kowh kar klow aia nasünta pe kownkow CHAKRAMANG dow aia kowh chimsaima mih arah hownia lusa kowi uang iiu tang mü khai,kowngla mih ripra ka miuüa kowi nalawtah kownkow aia kowh chimsaima mih arah hownia lusa kowi aia uang iiu tang mü khai.21Nahanow akeng chenchap hai prenchakuüa dow CHAKRAMANG kowi nachupiia kownkow takua talawm khai;amatni dow CHAKRAMANG kowh ming iung nang iung mih Zaiawn hungh kowi phuang khai bowt,aia kowh rowsira laiklow dow Jerusalem marow kowi amatni phuang khai bowt.23Aia dow ang klanguüa reng tak khe uang e ta ang kür khai,ang kowh chownglawng dow aia uang townta ang khai.24Naiawng rakowi ang tek mih, “Aw ang kowh Thurai,ang klanguüa reng tak khe hauang pe kowng ang diah.En dow chowngchowng saksakma uowi reng chekhai.25“Lusa dow auown hownia en thawpah khai,mukuang paw en rut hown kowh en thawpah mih chekhai.26Naiawngün dow pani mih khin khe napiak bowk kown,tawnguat iawng natu bowk kown.Cham le tawnguat khe kowh iawng naiawngün dow en naleah kown,now naiawngün dow en nanuata kown.Nachenganchepaw en dow chowngchowng saksakma nauowi reng kown.27En dow aiawng uowi khe kowh iawng nauowi reng kown,en dow chowngchowng saksakma uowi mih Thurai chekhai.28En naruüa kowh chauüa dow thaulangma nauowi reng kown,amatni krungchakuüa dow en pur kowi anikma nauowi reng kown,” pakhai.The Seed Company