Chanlai Lawng7
1Chapa ow, ang kowh laiklow sünta diah,ang kowh ana pek maten sak kowi towah diah.2Ang kowh ana pek chünah diah,nahanow en nasing kown.Ang tüngsang en mih laiklow dow asung uowima.Nami dow en khet mik iawng khetah kaneu diah.3Nami dow naka tuakla reng kownkow en rutprüm kowi ün tapah diah,natukla reng kownkow nami dow en sak kowi ruiah diah.4En sakrau tuamow iawng chanlaira kowi sakrauah diah,auiua sin kowi en sakrau iawng prengia kowi sakrauah diah.5Nahanow naiawngün dow chang iang mih masiuüa hownia nalawng en kown,lai ding lai sau hown angak pra napawla en kown mih masiuüa hownia nahen en kown.6Akat khe ang kim kowi kowh tawngpawk re-e ang uowi khai,nami tawngpawk hownia prang kowi ang iu downg khai.7Nakhowk khe prengia uowi dowi mih klanguüa hawmh kowi ang khi sangrum khai,naiawngün pungmadawng hownia mapaw prengia uowi dowi mih klanguüa ang khi lowk ia.8Aia dow iang chang mih masiuüa kim re-e kowh tiama iawng haimang khai,aia dow nami iang chang mih masiuüa kim prakowi kowkowi khai.9Nakhowk khe dow sat kup kowh iiu khai bowt,uar kowi kowh iiu mih nowm khowk chekhai.10Nami khin khe masiuüa uang lawt lowk ia khai,nami masiuüa dow nami klanguüa hown uang takrum khai.Nami masiuüa dow chawkkrawma tawnguat khupma,aia dow chang iang kown mih saktuak kangowh chekhai.11Aia dow sangching powingia uowi dowi mih masiuüa,aia dow rukrai uowi dowi mih masiuüa,kim kowi katpaw uowi phülü dowi mih chekhai.12Aia dow tiama kowi lai, chi kowi lai cham krawi mang khai,aia dow tiama krum towng kowi hawt pawm kachakuüa reng chekhai.13Aia dow nami klanguüa kowi dowkah now namah khai,aia dow tawn rukrai dowi kowi nami klanguüa kowi tek pe mih,14“Ani kowh ang changah mih taking tasangra uanap ngar uowi tak,nami uanap ang chang mih dow ang takhamta mih rakowi chekhai.15Naiawng rakowi en hown nauang takrum kownkow ang uang lawt mih chekhai,ang krawi cham en hanow ang krumta en khowk.16Aigupta pren hownia kowh klangiungma mih uanpowngchow hown ang beta phang kaneu khowk,naiawngün uan dow achaing achaing mih la hown kowh kawngah mih chekhai.17Phangbek dow nam iungma ang changta khowk,mura, singding pik hai anam iungma mih chap ang theta khowk.18Chu, uar thowi pat achi taphua taiua diah sik,asowrma achi taiua uowi diah sik.19Kim kowi ang hua uowi dowi,alakma kowi aia cham kowi khari khai.20Aia dow pawla tangka pa-im khowk,lacher khe chiang nauang mang kown,” pakhai.21Nami masiuüa dow klanguüa nautala iawng tek pe hanow ia kuanta khai,lai ding lai sau hown aia dow angak prakowi nami klanguüa kowi ia pawla khai.22Nahanow aia kung kowi nami klanguüa dow kowtawi khai.Nami dow angenra prakowi chia kowkowi khe kowh iawng chekhai.Aia dow leng kowi tasowk mih naki iawng,23salangba sek hown maru ap-ah now kowng khai.Uakling uaber dow alenma cham iow hanow powk kowi cham taia reng,nami iawng dow nami klanguüa paw aia nakowng kown mih tuk dowi chekhai.24Chapa ow, kawmat ang laiklow sünta diah,ang tek mih kowi pe ching diah.25Naiawng mih masiuüa kowi hangkow nau diah,aia tut-e hangkow kowi diah.26Tawngplawng kowchow panow aia krawi piakta mih maru dow akawmma khowk,aia rakowi maru kowng mih akawmma khowk chekhai.27Aia kowh kim dow kowngra tiama chekhai,nami tiama dow kowngra kowi towm müa chekhai.
The Seed Company