Chanlai Lawng8
1Chanlaira kowh hawk klow sünta diah,tukra kowh hek klow sünta diah.2Prengia iung dow tiakrum kowi ün krawi iowng reng chekhai,aia dow tiama ria kowi kowh arah lowngma mih kowi krawi iowng reng chekhai.3Aia dow marow pra kowh mangla mih tiama kowi krawi iowng reng,aia dow tapplawt re-e atünma hek se tek mih,4“Maru-uüa low, ang haw enni mih chowbowt chaw,maru maten vüi atünma ang tek khowk chaw.5Abualama miuüa low, tasang chanlaira büah bowt,bualama miuüa low, atukma uowi büah bowt.6Sünta, pankrima mih laiklow ang natek kown,anowmma mih laiklow ang naprow kown.7Lai ching ang natek kown;dai lai kowi dow ang sui chekhai.8Ang tekah mih dow anowmma kangowh chekhai.Nami dow dai lai nadowi, takuan lai paw nadowi chekhai.9“Chanlaima miuüa tut-e ang kowh laiklow dow aprawngma,tukra uowi miuüa tut-e naiawngün laiklow mih achimma chekhai.10Tai kowi lak-e ang kowh prengia lai kowi lang sakkrai rowt diah,achangma mih kuh lak-e paw tukra kowi lang sakkrai rowt diah.11Tawngplawng kowchow panow chanlaira dow asung uowima.Nami dow asung khakma mih hua lak-e paw asung lang uowi,en nauah mih chap maten lak-e paw asung lang uowi chekhai.12“Ang dow chanlaira chekhai;ang tut-e dow prengia uowi,now ang kowh dow tukra hai tara nowm uowi.13CHAKRAMANG kowi ringkawma hown kram mih dow angak kowi sui mih chekhai,bawri, lowchow, kiang ngak hai dai lai kowi dow ang sui chekhai.14Prengia hai chanlaira dow ang hownia kowh chekhai,tukra hai kürra dow ang chekhai.15Manguüa ia kruitown pren mih dow ang khowngah rakowi chekhai,anowmma mih ari kruitown miuüa ia thawp mih paw ang khowngah rakowi chekhai.16Kruitown miuüa kruitown pren mih dow ang khowngah rakowi chekhai,maru iukuüa hai tara chet miuüa ia chet tara mih paw ang khowngah rakowi chekhai.17“Sakrau ang miuüa kowi dow ang paw sakrauah reng,sak maiow hown krawi cham ang miuüa dow ka ang reng chekhai.18Kurengra hai ringkawra uang ting mih dow ang hownia chowtaih,anikma mih dawngthawnguan hai iungra pe mih paw ang chowtaih.19Ang hownia kowh maratra dow achangma mih kuh lak-e asung lang iung.Nami dow achangma mih tai lak-e paw asung lang uowi chekhai.20Ang dow achinawmma mih tiama kowi mang reng,tara nowm tiama kowi mang reng chekhai.21Sakrau ang miuüa kowi dow ang peah dawngthawnguan reng,amatni kowh dawngthawnguan nungra dow atekma ang chang pe reng chekhai.22“Achük alai khe CHAKRAMANG dow rik thawp ang khai.Nami khin khe aia dow tawng iawng mih uanh paw thawp dowi tak chekhai.23Aia dow achük alai hownia rik thawp ang khai.Nami khin khe dow lusa khowm thawpah dowi tak chekhai.24Ang dia mih khin khe dow sata ün uowi dowi tak.Nakhowk khe dow tui hawr klunglung mih aw ün uowi dowi tak.25Ang dia khe dow hungh ün thawpah dowi tak.Nami khin khe dow chut ün thawpah dowi tak chekhai.26Nami khin khe dow CHAKRAMANG thawp lusa dowi tak,dowm hai dinchow ün paw thawpah dowi tak chekhai.27“Aia dow kuang mih anikma thawpah khai.Nakhowk khe nami re-e ang tawi uowi chekhai.Aia dow sata hai mukuang mih ak-ah khai.Nakhowk khe paw nami re-e ang tawi uowi chekhai.28Aia dow kuang kowi tow pe uangnim khai.Nami khin khe paw nami re-e ang tawi uowi chekhai.Aia dow krawng dawng kowi tuikuam ün thawpah khai.Nami khin khe paw nami re-e ang tawi uowi chekhai.29Aia dow sata tui vüi thawp pe rihi khai.Nami khin khe paw nami re-e ang tawi uowi chekhai.Aia dow lusa mih anikma naia uowila kownkow tow pe achüng khai,30nami khin khe paw uanthawp sara iawng aia re-e ang tawi uowi chekhai.Ang rakowi CHAKRAMANG dow ni towng awmrawm reng,aia pur kowi dow atungma ang piaw reng chekhai.31Aia thawpah mih lusa hown ang awmrawm reng,lusa maru-uüa hown paw ang piaw reng chekhai.32“Naiawng rakowi chapa ow, kawmat ang laiklow sünta diah,ang tiama kowi mang miuüa dow iungra naka kown.33Ang kowh tüngsangra sünta diah, hangkow tamata diah,nahanow en nachanlai kown towbowt.34“Ang kowh laiklow chün mih,ang kimbüng re-e ni towng uang uowi reng mih,ang kimplawt re-e uang chawng reng miuüa dow prasira uowima chekhai.35Tawngplawng kowchow panow ka ang mih dow naka singra kown,aia dow CHAKRAMANG hownia saksing sanara naka kown.36Tawkche ka ang dowi mih dow kowmatia kowi tapiak mih chekhai,sui ang miuüa dow nau kowng miuüa chekhai,” pakhai.
The Seed Company