Chanlai Lawng3
1Chapa ow, ang tüng ang sang en mih hangkow tamata diah,ang kowh ana pek mih sak kowi towah reng diah.2Naiawng en chang hanow en kowh chowng nadawng kown,now en kowh chownglawng dow aiungma nauowi kown.3Kaah sakowmma mih rah kowi mapaw hangkow nuata diah,achur uowi dowi mih sakraura kowi asima dowkta hüah reng diah.Naiawngün dow en natukla reng kownkow ngawng kowi ü-ah diah,naiawngün dow en naka tuakla reng kownkow sak kowi ruiah diah.4Naiawng che en chang hanow Thurai hai lusa maru pur kowi,saksing sanara hai ming iung nang iung en naka kown.5En kowh sak maiow hown CHAKRAMANG luk kowi neplawng nesak diah,en matia kowh aiung angak tukra luk kowi hangkow owmsak diah.6Lowra mih lup en chang khe CHAKRAMANG kowi tuakla reng diah,nahanow aia dow tiama iung mih natüng en reng kown taih.7En kowh prengia uowima pami hangkow ka tuak diah;CHAKRAMANG kowi ringkawma hown kramah reng diah,now lup ngak changra hownia cham lang tahen reng diah.8Nahanow en kowh kow mih aiungma nauowi reng kown,now en kowh kow mih khawt paw nalang khawt ngamlam kown.9En kowh dawngthawnguan hown CHAKRAMANG kowi tüng pe ringkawra reng diah,en kowh luprak müng hown aia kowi tüng pe ringkawra reng diah.10Nahanow en kowh chapam kowi luprak atekma nauowi reng kown,now atowk rah takowi dowi mowr grep tui paw en naka reng kown.11Chapa ow, CHAKRAMANG hawi en khe hang kunmarau diah,aia nang en mih khin khe mapaw hauang sak-hiah diah.12Tawngplawng kowchow panow sakrauah mih chauüa kowi dow u-pa pring hawiah reng chekhai,nami powm iawng CHAKRAMANG paw aia sakrauah mih kowi dow pring hawiah reng chekhai.13Ka chanlaira mih maru dow prasira uowima chekhai,now ka prengia mih maru dow awmrawm reng chekhai.14Tawngplawng kowchow panow nami dow tai lak-e asung lang uowi.Nami dow kuh lak-e paw asung lang uowi chekhai.15Chanlaira dow asung khakma mih hua lak-e lang iung.Nami dow en nauah mih chap maten lak-e asung lang uowi chekhai.16Chanlaira dow chowngdawng sakklangra nowngia pe en chekhai.Nami dow dawngthawnguan hai ringkawra paw nowngia pe en chekhai.17Chanlaira dow piawra tiama kowi napawla en reng kown,chanlaira en kowh uowi now apiaw apama mih chownglawng en naka kown.18Chanlaira ka miuüa dow ka masing sih mih iawng chekhai,ka chanlaira mih maru-uüa dow prasira uowima chekhai.19CHAKRAMANG dow aia kowh chanlaira hown lusa mih thawpah khai,aia kowh tukra hown mukuang dow CHAKRAMANG thawpah mih chekhai.20Krawng dak kowi kowh tui dow aia kowh tukra hown aia uang pe lawtah khai,now uang tui kowi dow uangnim hownia aia uang pe dowah khai.21Chapa ow, prengia hai chanlaira laiklow mih dowkta chen diah,naiawngün dow en tamata dowi kownkow pela pe ching reng diah.22Nahanow naiawngün prengia hai chanlaira mih nape en singra kown,ü kuh leng khe kowh klangiung iawng en kowh chownglawng naklangiung kown.23En cham mang cham kat chepaw tawngpaw en naown kown nadowi bowt,en cham mang cham kat mih khin khe en natatheu kown nadowi bowt.24En mawk mih khin khe paw en nakram kown nadowi bowt,en müi mih khin khe paw asowrma en naia müi kown towbowt.25En luk kowi phih uang ting chepaw hangkow kram diah,maru ngakuüa piak mih en khi chepaw hangkow takrow diah.26Tawngplawng kowchow panow CHAKRAMANG dow naming nakhet en reng kown,leng kowi en nacham tasowk kown mih hownia aia dow nalawng en reng kown.27Akhowng takla miuüa kowi dow en ia khowng now khowngah reng diah,naiawng miuüa kowi dow ia hanow khowngah dowi matchang hang uowi diah.28Maru uang lü khowng khe akhowng takla mih kowi dow ia hanow khowngah diah,“Powt diah, tharau khe uang iang, tharau khe ang pe en sow,” pami hang tek diah.29En tainau-uüa kowi nachangah angak kown mih hangkow ka tuak diah,amatni dow en kowi owmsak kowh asowrma tawi uowi mih chekhai.30Tawngpaw chang en angak dowi miuüa hown dow hangkow taran diah,amatni hown dow alow akan uowi dowi matchang hangkow taran diah.31Krawi chang nowng mih maru kowi khita now hangkow irsi diah,naiawng mih maru kowh chowm krang uowi krang paw hang tawi iua diah.32Tawngplawng kowchow panow chang angak mih maru kowi dow CHAKRAMANG sui chekhai;nachenganchepaw saktuak achinawmma mih maru hown dow CHAKRAMANG taklawp taiua reng.33Maru ngakuüa kim kowi dow CHAKRAMANG kowh piati uowi reng,now maru iunguüa kim kowi dow Thurai kowh prasi uowi reng.34Prawngren maru miuüa kowi dow CHAKRAMANG paw prawng renah reng,now khamsum khamdaw miuüa kowi dow aia saksing sanaah reng chekhai.35Prengia uowi miuüa dow naka ringkawra reng kown.Tawkche prengia uowi dowi miuüa dow naka rukrai reng kown.
The Seed Company