Chanlai Lawng4
1Chapa ow, en kowh pa pe en prengia mih sünta diah,aiung angak tukra nakala kown mih prakowi pe ching reng diah.2Ang tüngsang en mih dow aiung chowtaih.Naiawng rakowi ang kowh ana pek chün diah.3Ang paw asowmchow khe dow en iawng chekhai;chah lowkchow kowi u-pa sakrauah mih iawng ang na khai.4Nakhowk khe apa tüngsang ang se tek ang mih,“En kowh sak maiow hown ang kowh laiklow sünta diah,ang kowh ana pek chün diah, nahanow en nasing reng kown.5Chanlaira hai aiung angak tukra krawi cham reng diah,ang laiklow mih tamata dowi kowi chünah reng diah.6Chanlaira dow hangkow nuata diah.Nami dow nalawng en reng kown chekhai.Chanlaira dow ngownah reng diah.Nami dow naming nakhet en reng kown.7Lowra mih sia lak-e lang pankri mih dow chanlaira chekhai,en kowh uowi mih maten hown krawi kramla prengia diah.8Chanlaira dow lang pankri mih chap iawng tuakah diah,nahanow nami dow kri kraingma nachang en kown.Chanlaira kowi dow dawiah kaneu diah,nahanow nami dow nape en ringkawra kown.9Nami chanlaira dow en lu kowi kowh napawng iawng naown kown.Nami dow en lu kowi kowh mang lukruk iawng naown kown,” pakhai.10Chapa ow, ang laiklow sünta hanow sak kowi towah diah,nahanow chowngdawng sakklangma en nauowi kown.11Chanlaira tia ang tüngla en mih chowbowt chaw,tiama atengma kowi ang kruila en mih chowbowt chaw.12En cham mang cham kat khe tawngpaw nahang en kown nadowi bowt,now en cham iowm khe paw en nacham tatheu kown nadowi bowt.13Ang kowh prengia pek dow dowkta hüah diah, hangkow plawtta khai.Nami dow en kowh chownglawng iung müa chekhai rakowi khetah kaneu diah.14Maru ngakuüa mangra tiama kowi hangkow tawi chawp diah,amatni changah mih lup iawng hangkow tawi chang diah.15Naiawng mih maru-uüa mangah mih tiama dow riata reng diah,naiawng mih maru-uüa mangah mih tiama dow hang tawi chawp diah.16Tawngplawng kowchow panow maru ngakuüa dow chang lup ngak dowi hanow tamüi dowi,maru kowi cham changla angak dowi matchang maru ngakuüa dow müi rau dowi chekhai.17Naiawngün maru-uüa tut-e dow lup ngak chang mih chakkham iawng chekhai,maru kowi chang nowng chang powng mih dow amatni kowh arak chekhai.18Nachenganchepaw achi anawmma miuüa kowh tiama dow rau-e kowh sat nowi iawng chekhai.Nami dow sat downg dowi mowr uang nowi ngamlam mih sat nowi iawng chekhai.19Maru ngakuüa kowh tiama dow aiiuma chekhai,amatni dow tawng mih kowi chow natatheu kown mih tuk dowi chekhai.20Chapa ow, ang laiklow prakowi pe ching diah,ang tek en mih prakowi pe param reng diah.21Nami laiklow dow tawng khe paw hangkow tamata diah.Nami dow en sak lak kowi atungma towah reng diah.22Ang kowh laiklow dow maru-uüa kowi pe singra reng,ang kowh laiklow dow maru-uüa kowi pe buk iung kow iungra reng.23Bowkbowk lak-e en kowh saktuak kowi mih lang ming lang khetah rowt diah.Tawngplawng kowchow panow en kowh saktuak iawng en kowh chownglawng en sunah reng chekhai.24Anowm nadowi mih laiklow mapaw hang tek diah,en nawr hownia lai ngak mih hangkow pe lawtah diah.25En kowh mik mih pur prakowi atengma pacham mü reng lah,en kowh mik mük mih pur prakowi anikma towah reng diah.26En kowh khawk en sanah dowi rawn tauakah kaneu diah,nahanow en kowh tiama thaulangma naown kown towbowt.27Tiama nowm hownia hawmlawm pra hai lakuai prakowi hang cham süt diah,angak hownia en kowh khawk mih alakma towah reng diah.
The Seed Company