Chanlai Lawng29
1Tawngbak mih maru dow pringhawi laiklow ta chepaw saktuak akhawtma changah khai,naiawng mih maru dow linlanma napiak hanow nami hownia naiung kown nadowi bowt.2Achinawmma mih maru ka kruitownra now maru awmrawm reng.Tawkche maru ngak ka kruitownra now maru kar reng chekhai.3Chanlaira kowi sakrau mih maru dow u-pa kowi pe awmrawmra reng.Tawkche chawkkrawma hown taiua mih maru kowh dow dawngthawnguan piak reng.4Mang che chet tara nowm hanow pren iung reng.Tawkche bümsua chak dawma now pren piak reng chekhai.5Tawngbak mih maru dow kowmatia kimping namkhetuüa kowi dai lai hown krawi kiow reng,naiawng mih maru dow kowmatia luk kowi uang pawla phih mih chekhai.6Maru ngak dow kowmatia angak rakowi takhuowk reng.Tawkche maru iung dow piaw se tek meng reng chekhai.7Achinawmma mih maru dow ngarai miuüa kowi nalawngah kown mih tuak reng.Tawkche maru ngakuüa dow ngarai miuüa lawnguan kowi tuak dowi chekhai.8Prawngren dawma miuüa dow marowchakuüa kowi krawi towk ran reng.Tawkche chanlai miuüa dow maru kowi prowng pe kunmarau reng chekhai.9Chanlaima mih maru che bualama mih maru kowi towng pe tara hanowbualama mih maru dow kunma chepaw narau kown, ren chepaw nalawt kown.Tawkche tawng iawng paw iungra sia nauang phaw kown nadowi.10Sai sak mih maru dow angak uowi dowi mih maru kowi sui reng,aia dow maru iung kowi krawi sai kown mih sangkrang reng chekhai.11Abualama mih maru dow tüng kunmarau reng.Tawkche chanlaima mih maru dow town sak reng chekhai.12Kruitown mih che daila laiklow sünta khai hanow,aia kowh maru iukuüa paw dailalu naphaw bowk kown.13Pachap kowi dow ngaraima mih maru hai nowng chang powng chang mih maru akat sang chekhai.Tawngplawng kowchow panow amatchi dow CHAKRAMANG peah mik mih maru kangowh chekhai.14Tawngbak mih mang dow ngarawng ngaraima miuüa kowi tara nowm chet pe reng,naiawng mih mang dow chowngchowng saksakma ka chowm mang reng chekhai.15Müa dangra hai pringhawira hownia dow ka chanlaira reng.Tawkche pring hawiah dowi mih chauüa dow u-pa kowi pe rukrai reng.16Maru ngak che ka kruitownra now angak prung reng.Tawkche amatni piak mih dow achinawmma miuüa nakhi kown.17En kowh chauüa kowi hawiah diah;nahanow aia rakowi dow en nathaulang kown,now aia dow nape en awmrawmra kown.18Thurai kruitownah dowi mih pren dow thaulangra uowi dowi chekhai.Tawkche CHAKRAMANG ari aiang chün mih maru dow prasira uowima chekhai.19Nar kowi dow laiklow hown nowng hawi dowi chekhai.Tawngplawng kowchow panow aia dow tukta chepaw nachün kown nadowi.20Rik tuakah kaneu dowi kowi alenma tek lai mih maru lak-eabualama mih maru kowh chownglawng lang iung chekhai.21En towah mih nar kowi che sowm hownia aia nau mih srui en peah hanow,achur kowi aia dow en kowh dawngthawnguan maten napawta en kown.22Kunma ngakma mih maru dow hau ran reng,kunma ngakma mih maru dow ahuma chang ngak reng chekhai.23Bawrima mih maru dow piak reng.Tawkche khamsum khamdaw mih maru dow ka ringkawra reng,24Kuk mih hown tawi tahum now kowmatia dow chowng kowmatia ransu reng,aia kowi dow towk pe sawi chepaw tawngpaw taphuang dowi chekhai.25Maru kowi kram mih maru dow leng kowi tasowk reng chekhai.Tawkche Thurai luk kowi neplawng nesak mih dow thaulangma uowi reng.26Tawngbak mih maru dow chet tara khe aia prakowi mang tawi tangila mih nau reng.Tawkche maru kowi kowh tara nowm chet mih dow CHAKRAMANG chowtaih.27Achinawmma mih maru dow maru ngak kowi sui reng,now tiama nowm kowi mang mih kowi dow maru ngak suiah reng chekhai.
The Seed Company