Chanlai Lawng28
1Maru krawiah dowi chepaw maru ngak dow powt reng.Tawkche achinawmma mih maru dow krangsi iawng sakkraingma chekhai.2Prenchakuüa chang lup ngak rakowi kruitown miuüa tale reng.Tawkche kruitown mih kowh prengia hai tukra uowima hanow prenchakuüa iung reng.3Ngaraima mih lala tachang nowng hanow,nami dow luprak piakla mih uangchak mang iawng chekhai.4Ari aiang chün dowi miuüa dow maru ngakuüa pra tawi tangi reng.Tawkche ari aiang chün miuüa dow maru ngakuüa kowi kingküa reng chekhai.5Maru ngak dow tara nowm lawnguan kowi tuk dowi chekhai.Tawkche Thurai low iawng uowi miuüa dow tara nowm lawnguan kowi tuk reng.6Kureng chepaw chang lup ngak mih maru dow iung dowi,nami lak-e ngarai chepaw chang lup iung mih maru lang iung chekhai.7Ari aiang chün mih chauüa dow prengia uowima chekhai.Tawkche maru ngak hown kowh taiua mih chauüa dow u-pa kowi pe rukrai reng.8Tawngbak mih maru dow achütma paw tangka hanow kowmatia dawngthawnguan ahuma changah khai.Tawkche aia kowh dawngthawnguan dow ngarawng ngarai miuüa kowi saksing sana mih maru nakata pe kown.9Tawngbak mih maru dow ari aiang kowi nowng mü dowi chekhai,naiawng mih maru kowh prasi lük dow Thurai sui chekhai.10Maru iung kowi angak pra pawla mih dow aia nga rakowi napiak kown.Tawkche chang angak dowi mih maru dow naiung kown.11Kurengma miuüa dow kowmatia kowi tanü chanlai reng.Tawkche prengiama mih ngarai mih maru dow kurengma mih maru chanlai chow chanlai dowi chow mih tuk reng.12Achinawmma mih maru ka kruitownra now maru piaw reng.Tawkche maru ngak ka kruitownra now kram kowh maru tapet reng.13Kowmatia angak pet mih maru dow iuksown dowi chekhai.Tawkche taphuang angak kung kowi tarip mih maru dow ka saksing sanara reng.14Ngak chang kowi atungma kram mih maru dow prasira uowima chekhai.Tawkche saktuak akhawtma mih maru dow ngak chang kowi kram dowi rakowi kla phih reng.15Angakma mih pren kruitown mih dow hek rangrang mih krangsi iawng hai krawi mak reng mih tawm iawng,aia tut-e ngarawng ngarai miuüa lainowmma ngare chekhai.16Prengia uowi dowi mih kruitown mih dow lainowmma krawi chang nowng reng,lawpha kowi sui mih kruitown mih dow chowngdawng sakklangma sing uowi reng.17Sai maru sak mih dow tuak krat hown kawm reng,aia dow kowng dowi mowr cham powt panglang reng.Aia kowi dow miapaw hangkow pacham khowngah lah.18Achinawmma uowi mih maru dow naka lawngra kown.Tawkche chang ngak mih maru dow linlanma napiak kown.19Kowmatia krawng bawn kowi aklumma chang lup mih maru dow ahuma ka chakkham reng.Tawkche asung uowi dowi mih lup kowi pe khin mih maru dow achur khe ngarai reng.20Kaah sakowmma mih maru dow prasi ahuma ka reng.Tawkche alenma kureng kown nau mih maru dow ka ripra reng chekhai.21Chet tara khe amia pra paw tawi tangi kown mih iung dowi,kawmpah asekchow mih rakowi paw maru chang ngak reng chekhai.22Lawphama mih maru dow kureng kowi towsak reng chekhai.Tawkche lawphara hownia aia nangarai kown mih aia tuk dowi chekhai.23Dai lai hown kiow mih lak-e lainowm hown krawi hawi mih lang iung,achur khe lainowm tek mih maru dow nalang ka ringkawra kown.24U-pa kowh uanh kuta kung kowi angak nadowi pahai ka tuak mih maru dow maru ngak chekhai,aia dow krawi chang anowng apowng mih maru ngak iawng chekhai.25Lawphama mih maru dow towk ran reng.Tawkche CHAKRAMANG luk kowi owmsak mih dow iuksown reng.26Kowmatia tukra luk kowi owmsak mih maru dow abualama chekhai.Tawkche chanlaira tiama kowi mang mih maru dow ka lawngra reng.27Ngaraima mih kowi khowng mih maru dow khawr dowi chekhai.Tawkche ngarai miuüa kowi khowng kown nau dowi mih dow ahuma ka piati reng.28Maru ngakuüa che ka kruitownra now maru tapet reng.Tawkche maru ngakuüa piak now achinawmma miuüa kowh nowng changra uang hu reng.
The Seed Company