Chanlai Lawng30
Agur kowh laiklow
1Mami dow Jake kowh chapa Agur tekah mih laiklow chekhai.Aw Thurai, ang kawm lai bowt kowbow,ang kawm krang sak ter iawmlawm towbowt kowbow.2Ang dow maru lak-e kowh lang buala mih maru chekhai,ang kowh dow maru kowh iawng tukra uowi dowi.3Ang dow tawi tasang chanlaira dowi chekhai,chimsaima mih Thurai lawnguan kowi tukra paw ang kowh uowi dowi.4Mukuang kowi pün mih hai mukuang hownia uang dowm mih mia chow uowi?Rut hown ka dowk li mih mia chow uowi?Tawnguat hown nowng krüm tui mih mia chow uowi?Lusa tali tingnui rihi amia chow thawp?Aia ming hai achapa ming tawng chow?En che tuk khai hanow tek ang diah.5Thurai lai maten dow anowmma pami khi-ah amatra khowk chekhai,aia tut-e kowh tatung tanim miuüa tut-e aia dow kawngma iawng chekhai.6Aia laiklow hown tawng laiklow paw hangkow bawngla diah,nadowi now aia mih natüng en atawi hai en dailama pami natüng en kown chekhai.7Aw CHAKRAMANG, en hownia ang nau mih uowi pre chap;nami dow ang sing uowi reng tak khe pe ang ngengche diah.8Lowk kowi dow limmara hai dai lai tek mih ang hownia alakma henta ang diah;now pre kowi dow ngaraima hai kurengma hauang chang ang diah,ang lakkeah mih chakkham krowngchow pe ang reng diah.9Ka hu lai paw ang natamata en hanow, “Mia chow CHAKRAMANG?” padow ang tek kown chekhai,now ngarai lai paw cham ku hanow ang kowh CHAKRAMANG ming ang napiakta kown chekhai.10Kim iah tut-e nar kowi hangkow howng pe ming ngak diah,nadowi now aia nape en piati kown, now en nangare kown chekhai.11Pa kowi kowh pe piati mih maru paw uowi chekhai,now u kowi ringkaw dowi mih maru paw uowi chekhai.12Amatni dow kowmatia kowi achinawmma tanü khai.Tawkche amatni dow asür alawkma kangowh chekhai.13Amatni kowh mik dow bawrira atekma chekhai,amatni kowh mik mük dow suiiai kaniaima chekhai.14Amatni kowh iüng dow saidawng iawng,now amatni kowh sah dow saichow iawng chekhai.Amatni dow naiawngün hown ngarawng ngaraima miuüa kowi krawi chata reng chekhai.15Lawphama mih maru dow ka hu nau hu chekhai,amatni dow, “Pe küng, pe küng,” pahai lü haplap chekhai.Katpaw du dowi mih uowi sum chap,now katpaw sak-ih dowi mih paw uowi tali chap chekhai.16Naiawngün dow kowng miuüa uowira, ka chah dowi mih masiuüa,katpaw du tui dowi mih krawng hai katpaw sak-ih dowi mih maih chekhai.17Kowmatia pa kowi khare mih maru kowh mik dow nalaita pe kown,now u laiklow chün dowi mih maru kowh mik paw nalaita pe kown.Naiawng mih maru kowh mik dow lawngrawi kowi kowh uaak hawmh nalaita pe kown,naiawngün mik dow langta chauüa nachata pe kown.18Ang awdaah nowm nowm mih uowi sum chap,mapaw ang tuktaah dowi mih paw uowi tali chap chekhai.19Kuang dawng kowi tawng iawng chow uamu tuk iow khai,hua luk kowi tawng iawng chow rua tuk sowr khai,sata kowi tawng iawng chow chawnlawng tuk tapowng khai,tawng iawng chow masiuüa hown kachakuüa tuk tanau khai.20Chang iang mih masiuüa dow maiawng:aia dow cham ki taphua taiua kung kowi luta prowng hanow,“Tawng angak paw ang chang dowi,” pahai tek reng chekhai.21Lusa dow sum chap mih dik hown chür reng chekhai,lusa nowng kham dowi mih dik dow uowi tali chap chekhai.22Nami dow nar uang chowng mang khe,bualama mih maru aduma ka cha khe,23suiiai kaniaima mih masiuüa ka hua khe,narma chowng kim iah masi khe chekhai.24Lusa kowi achachow mih asadua uowi sum chap.Tawkche naiawngün dow prengia chakma chekhai.25Lowng dow kür lang e nowm nowm mih chap chekhai.Tawkche amatni dow satma khin khe krüm chakkham reng.26Klüi dow kür uowi dowi mih asadua chap chekhai.Tawkche amatni dow hua pheng kowi chang kim reng chekhai.27Plawng hawmh kowh dow mang uowi dowi chekhai;nachenganchepaw amatni dow ahawmsang cham iow reng.28Tuisrambowngmow kowi dow rut hown plawmah chep chepaw ia.Tawkche aia dow mang kim kowi ka uowi reng chekhai.29Amang krang bawrima mih uowi sum chap,aw nadowi, uowi tali chap chekhai.30Naiawngün dow kaurawng uaramchak kowi kowh lang kür mih krangsi,aia dow lowra mih kaurawng uaramchak kowi khi chepaw kram dowi chekhai.31Hawkawma mih uaklang hai hawktawkma mih ruala,now aia kowh siphaiuüa kowi kruitown mih mang chekhai.32Kowmatia kowi che en tanüla aiuk khai hanow nami tuak taingta diah;now maru kowi nachang angak kown mih tuak taingta diah.33Iawn tui klawk khe haiah rengreng now chowng thuapat reng,nakawng kowi merta naknak now vi lawt reng chekhai.Nami iawng kunmarau mih kowi dua pe kunma rengreng now taran reng chekhai.The Seed Company