Chanlai Lawng27
1Tharau kowh lawnguan kowi hang chang bawri diah.Tawngplawng kowchow panow tawng khe chow tawng chow own kown mih en tuk dowi chekhai.2Akeng mih maru pacham kiow en lah taih,en mih kowmatia kowi hang takiow diah.3Hua dow adikma, now se paw adikma chekhai.Tawkche bualama mih maru towkah mih kunmarau dow naiawngün lak-e lang dih chekhai.4Kunmaraura hai sak-ih dowi mih ra dow angakma chekhai.Tawkche khowrbown dow nami lak-e paw lang nga chekhai.5Kukpa sakrau en mih maru lak-etüng en atawi mih maru lang iung.6Auiua pe arau mih dow en iung müa chekhai.Tawkche ransu nam en awm mih dow nachang en angak kownkow chekhai.7Mu duma mih maru dow kuai tui khowm kham kown nau dowi chekhai.Tawkche sakkraima mih maru tut-e dow akhakma mih chap paw adingma chekhai.8Towla kim hüah now cham mang panglang mih maru dow uakling iawng chekhai,aia dow towla bai hüah kowh cham iow panglang mih uakling iawng chekhai.9Paingbawng hai nam iungma mih maikhük nam hown dow kow sowr reng,nami iawng auiua kowh prengia pek dow aiungma chekhai.10En auiua hai en pa kowh auiua kowi hangkow nuata diah,kla phih mih khin khe alakma kowi uowi mih en tasin taken miuüa tut-e hangkow lü khowng diah.Atawnchow mih kimping namkhet dow alakma kowi kowh tainau lak-e lang iung chekhai.11Chapa ow, chanlai diah, pe ang awmrawmra diah,nahanow en rakowi khare ang miuüa kowi ang naia klangah kown towbowt.12Prengiama mih maru dow phih uang kla kown mih satang tuk hanow lang tahen reng.Tawkche abualama mih maru dow kla phih kown mih tuk chepaw thüa reng rakowi kawm reng.13Prenlang maru paw lowi khe hang tawi takham diah,tawi takham khai hanow aia kowh tawnguat pawta pe diah.14Amia iawng mih chow mur rü hanow kimping namkhetuüa kowi atünma krawi pe prasi khai.Nami dow prasi nadowi kowi piati iawng maru nadowkah kown.15Taran dawma mih masi dow siadawng khe uangchak tahow dowi mih iawng,aia dow aia kowh nawr kowi pe tanaiah dowi chekhai.16Li hai sau kowi dow rut hown ia dowkah dowi chekhai,nami iawng taran dawma mih masi kowi dow ririmma ia towah dowi chekhai.17Lawngha kowi achukma changah kown nau now lawngha lala asük takla,nami iawng lusa maru mih lowkkowlowk natatüng tasang kown takla.18Khet uidut singh mih maru dow ka cha uidut uih reng,kim iah kowi chang pe lup mih maru dow ka ringkawra reng.19Tui kowi tatamü hanow kowmatia powm takhi reng chekhai,nami iawng maru kowh uowi krang khi hanow kowmatia kowh uowi krang paw tuk reng.20Makownguüa uowi rah hai maisingkan dow katpaw du dowi chekhai,nami iawng maru kowh nau rah sia dow katpaw adu uowi dowi chekhai.21Kuh hai tai kowi dow achangma chünchü mih natukla kownkow maih hown chaingah reng.Tawkche maru kowi dow ka kiowrira mih hown chaingah reng chekhai.22Abualama mih maru kowi cha thua iawng thuaah chepawaia kowh bualara mih aia hownia napowt kown nadowi.23En kowh rua hai ruapur hawmh kowi khetah kaneu diah,en kowh tawncher hawmh prakowi pela ching reng diah.24Tawngplawng kowchow panow dawngthawnguan dow nik dowi chekhai,mangra paw chowngchowng saksakma nik dowi chekhai.25Ngenta bawrchak kung kowi kowh bawrchak sar awr awm mih uang pawla pe diah,now hungh kowi kowh awm mih pram sar paw cham krawi ngenah now uang pawla pe diah.26Nahanow en kowh ruapur pawi hownia en naka tawnguat kown,now en kowh rua sung hown en naia ranla krawng bawn kown towbowt.27Nami klen kowi en hai en kimchakuüa vüi paw ahuma en naka iawn tui kown,nami kham hanow en kowh nar malauüa hawmh paw kow naiung kown towbowt.
The Seed Company