Chanlai Lawng26
1Satma khin khe nang kla mih hai luprak ngen khin uang uang mih taklak dowi chekhai,nami iawng bualama mih maru kowi naringkawah kown mih paw auan uowi dowi chekhai.2Aiawnglowma maru pe en piati mih dow en luk kowi nauang kla kown nadowi.Nami dow kimpuk ua hai kirchow cham iow panglang mih iawng naown kown.3Kawrnga kowi dow müa hown bawpah kown takla reng,kawrngaramchük kowi dow kruk pe nawrbawng kown takla reng.Nami iawng bualama mih maru kowi dow müa hown kumlawng kowi ahup takla reng.4Bualama mih maru kowh asung uowi dowi mih laiklow kowi hangkow klangah diah,en che klangah hanow en paw aia iawng natawi phaw kown chekhai.5Bualama mih maru kowh laiklow kowi aklang takla khai hanow aia iawng klangah diah,naiawng nadowi hanow aia dow chanlaima pahai natanü kown chekhai.6Abualama mih maru kowi cham chinah satang phowng mih maru dow cham paw phih mih iawng chekhai;aia dow kowmatia klowng dungta mih iawng chekhai.7Abualama mih maru kowh chanlaira laiklow dow asung uowi dowi chekhai.Nami dow klowng baima mih maru kowh asung uowi dowi mih klowng iawng chekhai.8Bualama mih maru kowi tüng pe ringkawra mih maru dow ap iaiba mih maru iawng chekhai;aia dow iaiba kim kowi tap pe iaiuih now ap iaiba reng chekhai.9Abualama mih maru kowh chanlaira laiklow dow apuama mih maru iawng chekhai;aia dow rak pua lai bowt kowh rut kowi cham ka sat khai.10Abualama mih kowi hai apuama mih maru kowi pe changah lup mih maru dow kramra uowima chekhai;aia dow tawngah kaneu dowi matchang ap leba naklak kowh maru kowi pe arau mih iawng chekhai.11Kui dow aia hükta mih kowi plan chaah kownkow plan kowi reng,nami iawng bualama mih maru paw bualama mih lup plan chang reng chekhai.12Tanü chanlai mih maru kowi dow tüngsang kratma,nami lak-e bualama mih maru kowi tüngsang lang iah chekhai.13Silikma mih maru dow maiawng tek reng, “Tiama kowi krangsi uowi,kramra uowima mih krangsi tiama kowi len iawklawk mih uowi lowk,” pakhai.14Kimplawt kowi kowh akli kowi dow kimbüng tachawp hüah reng,nami iawng silikma mih maru dow phangbek kowi hing mawk hüa chekhai.15Silikma mih maru dow hawm rowm kowi tangta rut hüah khowk chepawnawr kowi awr sawk hawm kown mih khowm silik chekhai.16Tuakah kaneu kowh klang maru mih chanlaima mih maru ranit ia lak-eaiamat lang chanlai pahai silikma mih maru dow tatuak reng chekhai.17Tiama kowi maru taran khe cham tawi klang mih maru dow kramra uowima chekhai;aia dow cham mang panglang mih kui kowi town pe paramkui mih iawng chekhai.18Kuan maru kung kowi, “Ang ngawkah mih taih,” pahai tek mih maru dow kramra uowima chekhai;aia dow lün pluplup mih leba sek ap naklak mih athuklama mih maru iawng chekhai.20Maih kowi bawk pe sawp dowi hanow maih mit reng chekhai,nami iawng lai dawma mih maru uowi dowi now taran prowng reng.21Maru taran khe tawi towk ran mih maru dow mairing kowi tow pe maivia mih iawng chekhai,naiawng mih maru dow maih lün kowi bawk pe sawp mih iawng chekhai.22Taprawng taren mih laiklow dow asowrma mih chakkham iawng,naiawng mih laiklow dow maru sak lak kowi kup ruirui reng chekhai.23Saktuak ngakma mih maru kowh sakraura laiklow dow uanh kowi sow pe tai mih iawng chekhai;aia kowh laiklow dow bawn kawng kowi kowh sow pe tai mih iawng chekhai.24Sui maru mih dow aia kowh sangkrangra ngak mih lai iung hown petah reng.Tawkche aia kowh sak kowi dow limmara kangowh chekhai.25Naiawng mih maru kowh laiklow dow adingma chepaw hangkow owm diah.Tawngplawng kowchow panow aia sak kowi dow suiiai kaniaima mih chap uowi huma chekhai.26Aia kowh sangkrangra ngak dow lai iung hown aia petah reng.Tawkche aia kowh nami sangkrangra dow bowkbowk pur kowi natatung kown.27Maru vüi kowi krawi chak leng mih maru dow aiamat tasowk reng,maru luk kowi lün huaklu mih maru dow nami huaklu hown aia tanüm reng.28Dailama mih maru-uüa dow maru kowi sui reng,dai lai hown dow piakra uang ting reng chekhai.
The Seed Company