Chanlai Lawng15
1Sangprowk laitek klam now kunmarau prowng reng.Tawkche lairang dow towk kunmarau reng chekhai.2Chanlaima mih maru-uüa kowh nawr dow tukra kowi kiowah reng.Tawkche bualama mih maru nawr hownia dow buala laiklow uang lawt reng.3CHAKRAMANG kowh mik dow lowra re-e krawi uowi reng,aia dow maru iung hai maru ngak luk kowi tang mü reng chekhai.4Lai iung dow pe singra mih singh iawng chekhai.Tawkche arangma mih lai dow maru kowi krawi piak sak reng chekhai.5Bualama mih maru dow u-pa pringhawi laiklow kowi nü dowi klowk dowi chekhai.Tawkche kaneuma uowi mih maru dow u-pa pringhawi mih laiklow sünta reng chekhai.6Achinawmma mih maru-uüa kim kowi dow dawngthawnguan ahuma uowi reng.Tawkche maru ngakuüa kramah mih hownia dow piakra uang ting reng chekhai.7Chanlaima mih maru kowh nawr dow krawi uet tukra reng.Tawkche bualama mih maru kowh sak dow naiawng nadowi chekhai.8Maru ngakuüa kowh phuchua dow CHAKRAMANG sui reng chekhai.Tawkche achinawmma miuüa awr chupah mih dow aia awmrawm reng chekhai.9Maru ngakuüa kowh tiama dow CHAKRAMANG sui reng chekhai.Tawkche lup iung chang kowi thüa reng miuüa kowi dow aia sakrauah reng chekhai.10Anowmma mih tiama kowi nuata mih maru dow naka ripra kown,pringhawi laiklow sünta dowi mih maru dow nakowng kown.11Kowng miuüa uowi rah pren paw CHAKRAMANG dow khi bowk chekhai.Naiawng rakowi aia dow maru saktuak ngam padow lang khi tak chekhai.12Prawngren dawma mih maru dow pringhawi laiklow nauta dowi chekhai,naiawng mih maru dow chanlaima miuüa tut-e krawi kowi dowi chekhai.13Saktuak sowrchow now lumowr paw chimprowngchow chekhai.Tawkche saktuak krat lai now lumowr paw klimthupma chekhai.14Prengia uowima miuüa kowh sak dow krawi cham tukra ngamlam chekhai.Tawkche bualama miuüa dow bualama uowi mih kowi sak-ih chekhai.15Tuak kawm tuak krat miuüa dow ni towng akrat pusara krum reng.Tawkche saktuak sowrma miuüa tut-e dow ni towng pawi ni iawng chekhai.16Dawngthawnguan huma chepaw thaulangra uowi dowi now tawngpaw mrawk dowi,nami lak-e a-echow chepaw CHAKRAMANG kowi ringkawma hown kram mih lang iung chekhai.17Kurengma mih kim kowi cha chaknga chepaw tasakraura uowi dowi now iung dowi chekhai.Tawkche ngaraima mih kim kowi pram kan chowtaih cha chepaw tasakraura uowi now lang iung.18Kunma ngakma mih maru dow krawi uown taran reng chekhai.Tawkche kunmarau naklak dowi mih maru dow prowng taranra reng.19Silikma mih maru kowh tiama kowi dow chuh atekma uowi reng.Tawkche aklumma mih maru kowh tiama dow asaima uowi reng.20Chanlaima mih chauüa dow amatni kowh pa kowi pe awmrawmra reng.Tawkche bualama mih chauüa dow amatni kowh u kowi sui reng chekhai.21Bualama mih maru dow aia buala mih kowi awmrawmla reng.Tawkche chanlaima mih maru dow tiama nowm kowi mang reng.22Prengia pek mih che khawr now sangkrangta mih iawng lup phaw dowi chekhai.Tawkche prengia pek mih che hu now sangkrangta mih iawng lup phaw reng chekhai.23Maru lünta khe athikma nowng klang mih maru dow maru kowi pe awmrawmra reng,maru lakke mih khin khe taka mih laiklow tuk tek mih maru dow lainowmma iung.24Chanlaima mih maru-uüa dow singra tiama kowi mang reng,amatni dow kowngra tiama kowi mang dowi bowt chekhai.25Bawrima mih maru kowh kim dow CHAKRAMANG piakta pe reng.Tawkche mamaimowuüa kowh dawngthawnguan dow aia khet pe reng chekhai.26Angakma mih sangkrangra maten CHAKRAMANG sui reng.Tawkche aiungma mih laiklow dow CHAKRAMANG nauta reng chekhai.27Lawphama mih maru dow kimchakuüa luk kowi uang pawla akrat reng.Tawkche paw bümsua dowi mih maru dow chowngdawng sakklangma sing reng.28Achinawmma mih maru dow klang dowi rawn rik tuakah kaneu reng.Tawkche maru ngakuüa hownia dow lai ngak mih tui hawr iawng uang lawt reng.29Maru ngakuüa hownia dow CHAKRAMANG mih alakma uowi reng.Tawkche achinawmma miuüa kowh prasi lük dow aia hawt sünta pe reng.30Aiungma mih mik mük dow maru awmrawm reng,satang iung dow maru kow kowi pe iungra reng chekhai.31Singra nakala kownkow pringhawi laiklow sünta mih maru dow chanlaima chekhai,aia dow chanlaima mih maru-uüa pungmadawng kowi natawi uowi reng kown.32Pringhawi laiklow kowi nuata mih maru dow kowmatia kowi nü dowi klowk dowi mih chekhai.Tawkche pringhawi laiklow kowi sünta mih maru dow ka prengia reng chekhai.33CHAKRAMANG kowi ringkawma hown kram mih dow pe chanlaira mih chekhai,ka ringkawra dowi rawn khamsum khamdawra rik uowi kown takla.
The Seed Company