Chanlai Lawng14
1Prengia uowima mih masiuüa dow kimchak iuksown müa chang reng.Tawkche prengia uowi dowi mih masiuüa dow kimchak piak müa chang reng.2Anowmma chowm uowi mih dow CHAKRAMANG kowi ringkawma hown kram reng chekhai.Tawkche anowmma chowm uowi dowi mih maru dow CHAKRAMANG kowi sui chekhai.3Abualama mih maru dow aia kowh laiklow rakowi ka ripra reng.Tawkche chanlaima miuüa dow amatni kowh laiklow hownia ka lawngra reng chekhai.4Chiala uowi dowi now pram pek takla dowi chekhai.Tawkche chiala kür hown ahuma ka luprak reng chekhai.5Kaah sakowmma mih saksi thuak mih dow tek daila dowi chekhai.Tawkche kaah sakowm dowi mih saksi thuak mih dow tek daila reng.6Prengia lai kowi küala rensi mih maru dow krawi cham chanlaira chepaw ka dowi chekhai.Tawkche prengia uowima mih maru dow aiachow hown ka tukra reng chekhai.7Bualama mih maru hownia dow cham lang powt diah.Tawngplawng kowchow panow aia tut-e dow en naka tukra kown nadowi.8Tiama iung tiama ngak tuk mat mih maru dow chanlai mih chekhai.Tawkche abualama mih maru dow amatni lala takuan reng chekhai.9Abualama mih maru dow aia kowh aprek kowi cham küala rensi reng.Tawkche achinawmma mih maru dow changta angak now lü lawt reng chekhai.10En kowh sak kawmra dow en matia kowh chowtaih,en kowh awmrawmra dow miapaw tawi ia taret dowi chekhai.11Maru ngakuüa kowh kim dow napiak reng kown.Tawkche maru iunguüa kowh kim dow naiuk ngamlam kown.12Maru mih kowmatia mangah mih tiama kowi aiung pahai ka tuak reng.Tawkche nami tiama mih kowngra prakowi aia kowi napawla chepaw naia kown.13Ren dow saktuak kawm mih kowi nowng pet chekhai.Tawkche ren chur khe dow sak ngara ta uowi reng chekhai.14Maru ngakuüa dow amatni kowh chowm krang uowi krang sung naka ripra kown.Tawkche maru iunguüa dow amatni kowh lup iung rakowi naka awmrawm sung ngengche kown.15Bualama mih maru dow maru laiklow maten owm reng.Tawkche chanlaima mih maru dow taah mih maten tuakah kaneu reng.16Chanlaima mih maru dow uowi kaneu rakowi angak hownia tala reng.Tawkche abualama mih maru dow tuakah kaneu dowi kowi chang lup reng.17Kunma ngakma mih maru dow abualama mih maru iawng chang lup reng,lup ngak chang kowi sangkrang mih maru kowi dow maru maten suiah reng.18Abualama mih maru dow buala sung ka reng.Tawkche kaneuma uowi mih maru dow awmrawm sung iawng ka tukra reng.19Maru ngakuüa dow maru iunguüa pur kowi khamsum khamdaw reng,maru ngakuüa dow achinawmma miuüa tut-e krawi khamsum khamdaw reng.20Ngarai miuüa kowi dow klowkchakuüa khowm naukhi-ah dowi chekhai.Tawkche kurengma miuüa kowh dow auiua akawmma uowi reng.21Kowmatia klowkchak kowi sui mih dow chang ngak mih chekhai.Tawkche khawr miuüa kowi saksing sana mih maru dow ka prasi reng.22Nachang lup ngak kownkow sangkrang miuüa dow piak reng.Tawkche chang lup iung kownkow sangkrang miuüa dow owmra hai ringkawra ka reng.23Aklumma changah mih lup maten dow maratra uowi reng.Tawkche chang pe lup dowi kowi lai bawklawk mih dow khawr reng.24Chanlaima miuüa kowh awmrawm sung dow kurengra chekhai.Tawkche bualama miuüa dow buala sung buala ngamlam chekhai.25Thuak saksi nowm mih maru dow lawng maru chownglawng reng.Tawkche thuak daila saksi mih maru dow maru kowi pe arau reng.26CHAKRAMANG kowi ringkawma hown kram mih maru dow ka sakowmra reng,now aia kowh chauüa paw ka tatung tanimra reng chekhai.27CHAKRAMANG kowi ringkawma hown kram mih dow tui iawng pe singra reng.Nami dow nakowng kown mih tiama hownia maru kowi hen reng chekhai.28Maru iun akawmma now mang ka kiowrira reng.Tawkche maru iun e lai now mang piak reng chekhai.29Kunmarau naklak dowi mih maru dow prengia chakma chekhai.Tawkche kunmarau naklak mih maru dow aia kowh bualara tüng mih chekhai.30Saktuak thaulangra dow kow iung müa chekhai.Tawkche irsi tuak dow kow nga müa chekhai.31Ngaraima mih maru kowi chang nowng mih dow Thurai kowi pe rukrai mih chekhai.Tawkche khawr mih maru kowi saksing sana mih dow Thurai kowi ringkaw mih chekhai.32Maru ngakuüa dow amatni kowh angak rakowi piak reng.Tawkche achinawmma mih maru dow kowng chepaw ka naira reng.33Prengia uowi mih maru sak kowi dow chanlaira uowi chekhai.Tawkche bualama miuüa dow chanlaira lawnguan kowi tawngpaw tuk dowi chekhai.34Thurai kowi ringkawra dow pren kowi pe ringkawra reng;tawkche angak dow chenchapuüa kowi pe rukraira reng.35Chanlaima chang lup mih maru iuk kowi dow aiung hown mang müah reng.Tawkche kala rukrai mih lup chang mih maru iuk kowi dow mang kunmarauah reng.
The Seed Company