Chanlai Lawng16
1Lusa maru dow thawp sangkrangra reng chekhai.Tawkche CHAKRAMANG chowtaih pe phawah reng.2Maru-uüa dow amatni changah mih lup maten anowmma padow tatuak reng.Tawkche CHAKRAMANG dow amatni sak naura nowk pe khai pe reng chekhai.3CHAKRAMANG kowi owmsakma hown en kowh lup maten changah diah,nahanow en sangkrangta mih iawng aiungma naphaw kown.4CHAKRAMANG thawpah mih uanh maten auan uowima kangowh chekhai,maru ngak kowi aia towah mih paw piakra uang ting khe napiakta kownkow chekhai.5Abawrima miuüa kowi dow CHAKRAMANG suiah reng,naiawng mih maru-uüa dow naka ripra ngengche kown mih enni aiawng tuk towbowt.6CHAKRAMANG luk kowi kaah sakowmma hai anowmma uowiah büa diah,nahanow enni kowh angak dow aia nalawtta enni kown.CHAKRAMANG kowi ringkawma hown kramah diah,nahanow angak hownia lang tahen büah reng diah.7CHAKRAMANG sak-ih en iawng uowiah diah,nahanow en kowh ransu-uüa hown paw athaulangma en naia uowi kown.8Lup ngak changra hownia dow tangka pawisa ahuma ia ka reng.Tawkche tangka pawisa kakra a-echow chepaw chang lup iung mih lang iung rowt chekhai.9Lusa maru dow thawp sangkrangra reng chekhai.Tawkche amatni kowh lup khowm bowk pe mih dow CHAKRAMANG chowtaih.10Mang dow Thurai hownia kowh prengia hown chet tara reng,aia dow anowm nadowi iawng chet tara dowi chekhai.11CHAKRAMANG nau mih dow achima maru nakhai uanh kown mih chekhai,aia nau mih dow adik chima mih set maru natawng kown mih chekhai.12Mang dow nachang angak kown mih mapaw taka dowi chekhai.Tawngplawng kowchow panow mang chowm rah ia uowi mih dow lup iung chang hown chekhai.13Tek lainowm mih maru kowi dow manguüa awmrawmah reng,tek lai ching mih maru kowi dow manguüa sakrauah reng chekhai.14Mang kunmarau now maru kowng ne chepaw naia.Tawkche chanlaima mih maru dow mang kowi klam pe kunma reng chekhai.15Mang awmrawm mih khin khe dow maru-uüa ka singra reng,aia kowh sanara dow uang iawng pe singra reng chekhai.16Ka kuh mih lak-e ka chanlaira mih lang iung,ka tai mih lak-e ka prengia mih lang iung chekhai.17Anowmma mih maru-uüa dow angak hownia lang tahen reng,kaneuma chowm uowi miuüa dow aia kowh sak nowng lawng reng chekhai.18Piak dowi rawn dow maru chang bawri reng,tim dowi rawn dow maru chang owrow reng chekhai.19Bawrima miuüa hown kür hown cham rupah mih uanh tabak mih lak-engaraima miuüa hown khamsum khamdawma uowi mih lang iung chekhai.20Thurai laiklow chün mih maru dow ka iungra reng,CHAKRAMANG luk kowi neplawng nesak mih maru dow prasira uowima chekhai.21Chanlaima mih dow aia kowh prengia rakowi ming nang uowima chekhai,tuk tek lai iung mih maru dow maru saktuak akat sang ia chang reng chekhai.22Prengia uowima mih maru tut-e dow aia kowh prengia mih tui iawng pe singra reng.Tawkche bualama miuüa kowi dow tüngsangah chepaw mrawkra uowi dowi chekhai.23Chanlaima mih maru dow rik tuakah kaneu dowi matchang tek naklak dowi chekhai.Naiawng rakowi aia kowh tüngsangra dow chawn reng chekhai.24Kuai tui dow akham sowrma,now kow vüi paw aiungma chekhai.Lai iung dow nami kuai tui iawng chekhai.25Maru maten dow kowmatia mangah mih tiama kowi aiung pahai ka tuak reng.Tawkche nami tiama dow kowngra prakowi aia kowi napawla chepaw naia kown.26Sakkrai mih maru dow aklumma chang lup reng,aia lup chang takla mih dow sakkrai rakowi chekhai.27Maru ngak dow nachang ngak kownkow sangkrang reng,aia kowh laiklow dow lün pluplup mih maih iawng chekhai.28Maru ngak dow krawi towk ran reng,prawngren dawma mih maru dow auiua hown tanga reng chekhai.29Chang nowng chang powng mih maru dow a-auiuauüa kowi tüng pe lawphara reng,naiawng hai amatni kowi dow angak tia kowi aia pawla reng chekhai.30Krawi klip mik mih maru dow nachang ngak kownkow tuakta hüah chekhai,mak ve mih maru dow nachang lup ngak kownkow kamrütta hüah chekhai.31Sam pau dow klangiungma mih mang lukruk iawng chekhai,nami ka mih dow achinawmma uowi rakowi chekhai.32Kunma thawngma mih maru dow akürma mih maru lak-e lang iung,nowng town sak mih maru dow nowng powngta marow mih maru lak-e lang iung chekhai.33Maru-uüa dow kuak plang reng.Tawkche khowm bowk pe mih dow Thurai chowtaih.
The Seed Company