Obadia1
1Mami dow Edawm pren lawnguan kowi Obadia kowi CHAKRAMANG uang tüng pe mukmang mih laiklow chekhai. Nami mukmang kowi kramamu tek pe mih,“Chu, a-i bowkbowk kamrüt lah!Chu, a-i kowh siphaiuüa kowi kuala hanow kowsen Edawm lah,” pakhai.2Edawmuüa kowi CHAKRAMANG tek pe mih,“Mü büah, chenchapuüa pungmadawng kowi lang sowm mih chenchap ang nathawp enni kown;enni kowi dow mapaw maru nanü naklowk enni kown nadowi.3Enni kowh marow kri dow tapat lut huamang hown enni kawm pe tap khai.Enni kowh kim ün dow hungh iawng alowngma enni thawpah khai.Naiawng rakowi sakdawng kowi tatuak se maiawng enni chang bawri khai:‘Amia iawng mih paw uang nowng sen anging dowi bowt,’ pakhai.Tawkche enni matia kowi enni takuan mih chekhai.4Uamu lak-e alowngma kowi enni nowng iow chepaw,mukuang kowi kowh krek dawng kowi enni cham chang kim chepawenni kowi dow nami hownia ang nauang klala enni kown.Ang CHAKRAMANG mami laiklow ang tek khowk,” pakhai.5Enni purdowng kowi kowh phih nauang towm kown mih dow kramra uowi lai kowbow!Kuk mih hai damrauüa khowm padow amatni nauah mih krowngchow taih pawla reng,now grep uih klek miuüa paw katpaw klekla bowk dowi chekhai.Nachenganchepaw enni kowh ransu-uüa dow nalutta enni kriakria kown,tawngpaw nata towla enni kown nadowi.Esau krungchak Edawmuüa cham petta mih dawngthawnguan maten paw ransu-uüa nakrawi kata bowk kown.7Tangila enni mih pren maten dow enni matia pren hownia nakhün prüt enni kown.Enni kowh auiuauüa maten dow nakuan enni hanow piakra prakowi napakla enni kown.Enni hown kowh taiua cha taiua kham miuüa dow nachak enni leng kown.Tawkche enni dow tawngpaw natuk kown nadowi.8CHAKRAMANG tek mih, “Edawm maru-uüa kowi ang ripah mih ni khe chanlaima miuüa kowi ang nakowngta pe bowk kown,now Edawm hungh kowi kowh prengia uowima miuüa kowi paw ang nachumta pe kown.9Aw Teman marow, en kowh tasen kiakma miuüa dow lainowmma natakrow takrai kown.Edawm hungh kowi kowh siphaiuüa maten kowi dow ang nakowngta pe bowk kown.10“En tainau Israeluüa kowi en changah anowng khai rakowi en narukrai kown.En dow chowngchowng saksakma vüi napiak kown.11Akeng chenchapuüa mih uang khue Jerusalem tap hanow alak kowi uang kup khai;Israeluüa kowh dawngthawnguan maten amatni dow pawla pe bowk khai.Nami dawngthawnguan dow kuak pe plang now ransu-uüa taretah khai.Nami khin khe en paw en matia bak natawi paw kownkow amatni ria kowi en tawi chawng khai.En paw akeng chenchapuüa hown mapaw lang taklowi dowi chekhai.12En tainau-uüa kla phih mih khin khe en renah khai;Judauüa piak mih lawnguan kowi en awmrawmla khai,now en tainau-uüa kawmkrat mih khin khe en chang bawri khai.13Ang maru-uüa kla phih mih khin khe tapplawt hownia en kowtawi kup khai.Amatni kla phih mih en khi hanow lainowmma en awmrawm khai.Amatni kowh dawngthawnguan dow en kowtawi takhün khai.14Ang maru-uüa kla phih khe kowh ia powt miuüa kowi paw nakhümah kownkow tiama towng kowi en hawt pawmah khai;ia plai miuüa kowi paw khümah now ransu-uüa rut kowi en cham ap-ah khai.Naiawngün en nachang kown mih mapaw taka dowi chowdiah.15“Edawmuüa low, chenchap maten vüi ang kowh tara chetra ni uang tawn khai bowt.Maru kowi enni changah iawng enni kowi paw nachang enni kown,enni kowh lup sung dow enni luk kowi nauang ting ngengche kown.16 Tawngplawng kowchow panow en dow ang kowh chimsaima hungh kowi ang kowh kunmaraura bia hownia en kham khai,nami iawng dow ang maru-uüa riaret kowi kowh akeng chenchapuüa kowi paw ang kowh kunmaraura bia hownia ang nape khamah kown.Amatni dow nakham hanow nachum bowk kown;aliu khowm nata lat kown nadowi.17Nachenganchepaw Zaiawn hungh dow ta plai miuüa vüi chimsaima mih tatung tanimra nachowng kown;amatni dow Thurai vüi kowi kowh lang kloah mih maru naown büah kown.Israel chuprek chaprekuüa dow amatni kowh dawngthawnguan vüi bak naplan ka iawk kown.18Jakawb chuprek chaprekuüa hai Josef chuprek chaprekuüa dow maih iawng naown kown,now Esau chuprek chaprekuüa dow chida cheng iawng naown kown.Maih dow nami chida cheng kowi nakamah kown.Esau chuprek chaprekuüa dow miapaw nata lat kown nadowi.Ang CHAKRAMANG mami laiklow ang tek khowk,” pakhai.19Juda tawngphak pra kowh uowi mih ang maru-uüa dow Edawmuüa pren napowng büah kown,now satkup pra kowh hungh dak kowi uowi mih Israeluüa dow Filistinuüa pren napowng büah kown.Israeluüa mih Efraimuüa uowi rah hai Samariuüa uowi rah maten napowng kown,now Benjaminuüa dow Gileaduüa kowh uowi rah napowng kown.20Cham takhang mih Israeluüa dow nauang plan kown,now Kananuüa uowi rah Zarefat marow mowr nauang powng büah kown.Tawngphak pra kowh pren kowi cham takhang mih Jerusalem maru-uüa paw nauang plan kown,now tawngphak pra kowh Judauüa uowi rah nauang powng büah kown.21Takhangra hownia ka lawngra mih Israeluüa dow Zaiawn hungh hownia Edawmuüa pren maten kowi kowh maru-uüa kowi nakruitownah kown,now CHAKRAMANG dow amatni luk kowi nachowm mang kown.
The Seed Company