Amaws9
1Nami kung kowi dow phuchuara ria kowi CHAKRAMANG iowng mih ang khi khai. CHAKRAMANG tek ang mih,“Amaws, Thurai chup kim kimchüng maten aluk prakowi krawi sam bawp madiah.Kimluk mih nachü hanow pacham tapiak lah,now nakowi kowh maru maten lu luk kowi pacham iu dowh lah.Nakhowk khe kowh tawi kowng dowi miuüa kowi dow tasenra kowi ang nakowngta kown;miapaw nanowng powt kown nadowi.2Amatni mih makownguüa uowi rah abüpma thaiah mih kowi cham uowi chepaw nami hownia ang nauang pawla kown,now kuang dawng alowngma kowi cham uowi büah chepaw nami hownia ang nauang klala kown.3Karmel hungh chem kowi cham tapet büah chepaw ang nakrawi chamah hanow ang nakrawi khümah kown.Sata thingh kowi cham tapetta ang büah chepaw nakowi nahawt chawtah kownkow rua kowi ang napeah ana kown.4Ransu-uüa khümla kowh akeng pren kowi cham takhang chepaw amatni dow nakowng kown;amatni kowi nakowngta kownkow nakowi kowh saidawng kowi ang napeah ana kown.Amatni kowi ang nakrawi müah reng kown;tawkche amatni kowi ang napeah iungra kownkow nadowi,amatni kowi ang napiakah kownkow chowtaih,” pakhai.5Lang kri lang kraing mih CHAKRAMANG Thurai che pren kowi kakta khowk now pren dow chü reng.Aia che towpta büt now paprenma dow Aigupta pren kowi kowh Nail aw tui iawng pün lai sut lai phaw reng.Naiawng rakowi pren kowi kowh uowi mih maru maten dow aprüa aiia hown uowi reng chekhai.6CHAKRAMANG dow lusa luk kowi aküm müa powm iawng mukuang mih thawpah khai,now nami luk kowi dow aia thawp kim khai.Aia dow sata tui kowi hawah hanow süngkangma kowi khükah khai.Naiawngün maten chang miia ming dow CHAKRAMANG chekhai.7CHAKRAMANG tek mih,“Aw Israeluüa, Ethiawpia pren kowi kowh maru-uüa hown enni tatu chekhai.Aigupta pren hownia ang uang lawtla enni iawng Kret pren hownia Filistinuüa kowi paw ang uang lawtla nadowi bow,now Kir pren hownia Assuriauüa kowi paw ang uang lawtla nadowi bow?8Mami pren angak kangowh mih luk kowi ang kowh mik uowi reng.Lusa kowi mami pren mih ang napiakta kown.Nachenganchepaw Jakawb chenchapuüa kowi bowkbowk pat dow ang piakta dowi tham.9Ang nape ana hanow per hown kowh krap cha iawng chenchapuüa pungmadawng kowi Israeluüa kowi ang nakrapah kown.Nami khin khe dow maru ngakuüa mih natawi takrap bowk kown;naiawng hown maru ngakuüa kowi dow ang nahenah kown.10Ang maru-uüa pungmadawng kowi kowh maru ngakuüa dow,‘Tawng angak paw a-i luk kowi nauang ting kown nadowi,’ pakhai.Tawkche amatni bowkbowk kowi saidawng hown nasaiah kown,” pakhai.11CHAKRAMANG tek mih, “Nami ni khe dow mang David kowh kim tim khowk mih ang narüngah iawk kown;nami ni khe dow apiaknama mih arah ang nakrawi rawah kown,now alai kowh iawng ang nachangah iawk kown.12Edawmuüa kowh ta lat mih pren Israeluüa napowngta kown,now ang kowh pahai ang khamah mih akeng chenchap maten kowh pren paw napowngta büah kown,” pakhai.Nami laiklow dow CHAKRAMANG tek khowk,now naiawngün lup dow aia mih nachang kown.13CHAKRAMANG plan tek mih,“Akhin nauang ting kown.Nami khin khe dow luprak ahuma naphaw kown;cha ngen chur dowi rawn cha sawt khin nauang ting kown.Grep uih küa chur dowi rawn achowk khin nauang ting kown;aiuk aiukma mih hungh hownia ahuma naka grep tui sar kown,now asowm asowmchow mih hungh maten dow grep tui hown nalim kown.14Ang maru Israeluüa kowi cham takhang mih rah hownia ang nauang plan pawla iawk kown;amatni dow tapiak khowk mih marow narawah büah hanow nakowi nauowi büah kown.Amatni dow nachang grep krum hanow nakhamah atui kown,nachang kheti bakan büah hanow nami uih mih nacha büah kown.15Amatni pren kowi kowh singh iawng Israeluüa kowi ang nachowkah kown;ang peah mih pren hownia amatni kowi miapaw nachawiah kown nadowi bowt,” pakhai.Mami laiklow dow enni kowh CHAKRAMANG Thurai tekah mih chekhai.
The Seed Company