Tarüa9
1Aigupta pren hownia Israeluüa uang lawt mih pre ning hown pala khe Sinai hungh uowi mih süngrüp süngkangma kowi CHAKRAMANG tek pe Mosi mih,2“Takat Pawi dow khowmta bowkta mih khin kowi Israeluüa pacham sunah lah.3Amatni dow ning towng kowh mami la kowi lacher laitali ni khe sat kup khowk now ari arow kowi uowi mih maten iawng nami pawi nasunah büah kown takla,” pakhai.4Nami laiklow tata hanow nachang Takat Pawi kownkow Israeluüa kowi Mosi tek pe khai.5Amatni dow ning uown kowi kowh lacher laitali ni khe sat kup khowk now Sinai hungh uowi mih süngrüp süngkangma kowi nami Takat Pawi sun büah khai. Mosi kowi CHAKRAMANG peah ana mih iawng rowprowp Israeluüa dow changta bowk khai.6Nachenganchepaw Israeluüa pungmadawng hownia maru pre sum ia dow cham kakta uak khai rakowi Takat Pawi tawi ka sun büah dowi. Naiawng rakowi amatni dow nami ni kowi Mosi hai Arawn iüah tut-e kowkowi khai.7Now amatni tek pe Mosi mih, “Cham kakta uak khai rakowi anging dow tasür talawk khai bowt. Naiawng anging tasür talawk khai pache akeng mih Israeluüa hown khowmta bowkta mih khin kowi tawngplawng kowchow CHAKRAMANG vüi anging tawi ia phuchua dowi kown?” pakhai.8Nakhowk khe amatni kowi Mosi tek pe mih, “Chawng büa diah. Nami lawnguan kowi tawng iawng chow CHAKRAMANG natek kown mih ang lüntaah tak,” pape khai.9Nakhowk khe Mosi kowi CHAKRAMANG tek pe mih,10“Israeluüa kowi maiawng kowtek pe diah: Enni hai enni kowh krungchakuüa pungmadawng kowi cham kakta uak kowh tasür talawk khai chepaw, khari kowi rah la lai rakowi uang ia mang dowi chepaw CHAKRAMANG vüi Takat Pawi enni naia sun kown taih.11Pre la kowi kowh lacher laitali ni khe sat kup khowk now mami Takat Pawi mih enni naia sun kown. Mami Takat Pawi kowi kowh chaknga dow the pe tuah dowi mih kawm hai akhakma mih pram kan hown enni nachaah kown takla.12Nami chaknga dow rau-e mowr ditchow paw enni naia towah kown nadowi, now ahut paw enni naia klowkah kown nadowi. Takat Pawi sun mih khin khe ari arow kowi uowi mih maten enni nachünah kown takla.13Tawkche tasür talawk paw tasür talawk dowi, khari alakma kowi paw cham kowi dowi mih maru che Takat Pawi tawi sun dowi hanow nami maru kowi dow aia chen hownia enni nabatta kown takla. Aia dow aia kowh angak sung naka kown. Tawngplawng kowchow panow aia dow khowmta bowkta mih khin kowi CHAKRAMANG vüi Takat Pawi tawi sun dowi chekhai.14“Israeluüa pungmadawng kowi kowh tawi uowi mih akeng chenchapuüa che CHAKRAMANG vüi Takat Pawi tawi sun kown nau khai hanow ari arow kowi uowi iawng nasunah kown takla. Nami dow Israeluüa chepaw, akeng chenchapuüa chepaw arisang nasunah kown takla,” pakhai.15Ki khupta taklowp taklangra te mih ni khe taklowp taklangra te luk kowi dow uangnim uang tamum klum khai. Nami uangnim dow sat kup hownia rau-e mowr chi ni towng taklowp taklangra te luk kowi uang tatüng khai. Iak-e khe dow nami uangnim mih maih iawng uang tatüng khai.17Now taklowp taklangra te hownia uangnim cham süt mih khin khe dow Israeluüa mih tarowng mang khai. Now nami uangnim cham iowng rah re-e dow amatni mih khup tangbung reng chekhai. Naiawng hai amatni dow CHAKRAMANG ana pek iawng mang büah khai, now CHAKRAMANG ana pek iawng khup tangbung büah khai.20Nami uangnim che taklowp taklangra te luk kowi hing uowi hüah hanow pre ni sum ni chepaw, pre la sum la chepaw, paning chepaw uangnim uowi mowr dow nami re-e khup tangbung büa khai; nami hownia amatni dow cham süt dowi chekhai. Nachenganchepaw nami uangnim che cham süt hanow amatni dow plan tarowng mang khai.23Israeluüa dow CHAKRAMANG ana pek iawng khup tangbung hai mang büah khai. Amatni dow Mosi kowi kowh CHAKRAMANG peah mih ana chün büah khai.
The Seed Company