Tarüa8
1CHAKRAMANG tek pe Mosi mih,2“Mami laiklow Arawn kowi kowtek pe diah: Maibu towng purdowng prakowi nowi bowk iawng maibu towng kowi kowh ranit klüng mih maibu dow natowah kown takla,” pakhai.3Nahanow Mosi kowi CHAKRAMANG tek pe iawng rowprowp Arawn mih chang khai bowt. Aia dow maibu towng purdowng prakowi nowi bowk iawng maibu towng kowi kowh ranit klüng mih maibu dow towah khai.4Maibu towng dow achowm müa hownia achem kowi kowh apau mowr achangma mih kuh akluchow hown kowh phengah now thawpah mih chekhai. Nami maibu towngh dow Mosi kowi kowh CHAKRAMANG tüng pe akuh mih iawng rowprowp thawpah mih chekhai.5CHAKRAMANG tek pe Mosi mih,6“Akeng mih Israeluüa pungmadawng hownia Leviuüa kowi pawla now lang kraah diah.7Amatni kowi dow maiawng en nasawk nasauah kown: Amatni kowi dow tachim tasai müa tui en nathet pe kown. Nami kung kowi dow pabuk pakowma pawi amatni kowi en nape khaita kown, now en nape chuta dawnguan hanow amatni dow natasawk natasau kown.8Nami kung kowi dow chiala papum hai nachangla kawmdi uanap kownkow kawmdi aiungma mih kowi kowh lawk pe kanrawn sau mih kawm nauang pawla büah kown. Now nachangla angak lawt lük müa uanap kown mih chiala paw en nauang pe pawla papum kown takla.9“Nami kung kowi dow taklowp taklangra te re-e Leviuüa kowi en nauang pawla kown, now Israeluüa maten kowi paw nami re-e en nakua nalawmah kown.10Leviuüa kowi dow ang pur kowi en nauang pawla kown, now amatni luk kowi dow Israeluüa natang pe rut kown.11Israeluüa pungmadawng hownia kowh amülüngma mih uanap iawng hai Leviuüa kowi dow ang pur kowi Arawn naap-ah kown. Nahanow Leviuüa dow ang kowh lup naia chang kown towbowt.12Nami kung kowi dow chiala pre pum mih luk kowi Leviuüa natang pe rut kown. Now chiala papum mih hown dow ang tut-e angak lawt lük müa uanap en nachangla pe kown, now alowk mih chiala hown dow tikah mih uanap en nachangla pe kown. Naiawng hai amatni kowh angak dow nalawtta pe kownkow en nachang pe kown.13Leviuüa kowi dow Arawn hai achapauüa pur kowi en nape iowngah kown, now amatni kowi dow amülüngma mih uanap iawng hai ang tut-e en naap-ah kown.14Naiawng hai akeng mih Israeluüa pungmadawng hownia Leviuüa kowi dow en nalang kraah kown, nahanow amatni dow ang kowh maru nachowng kown towbowt.15“Naiawng hai chimsaiah hanow amülüngma mih uanap iawng hai ang tut-e ap-ah kung kowi dow Leviuüa mih taklowp taklangra te kowi nauang chang lup bowt kown.16Israeluüa pungmadawng hownia Leviuüa dow ang kowh chekhai. Israeluüa pungmadawng kowi kowh chapa ta maten takcha Leviuüa kowi dow ang matia vüi ang pawta mih chowbowt.17Aigupta prenchakuüa kowh chapa ta maten kowi ang saita pe mih khin khe Israeluüa kowh chapa ta maten dow ang matia vüi ang lang towah khai. Naiawng rakowi Israeluüa kowh chapa ta maten hai tawncher kowi kowh rik pen mih ala maten dow ang matia kowh chekhai.18Nachenganchepaw kawmat dow Israeluüa kowh chapa ta maten takcha Leviuüa kowi ang pawta mih chowbowt.19Leviuüa kowi dow Israeluüa pungmadawng hownia Arawn hai achapauüa kowi natawi khowngah kownkow awmrawm sung iawng hai ang peah mih chowbowt. Leviuüa dow taklowp taklangra te kowi Israeluüa takcha nakowchang lup kown, now angak hownia Israeluüa naka alawt kownkow nachang pe lup kown. Nahanow taklowp taklangra te re-e Israeluüa uang tatawn chepaw amatni luk kowi dow phih nauang kla kown nadowi bowt,” pakhai.20Now Leviuüa lawnguan kowi kowh Mosi kowi CHAKRAMANG peah ana mih iawng Mosi, Arawn hai Israeluüa maten dow Leviuüa kowi changah khai bowt.21Leviuüa dow tachim tasai khai bowt, now amatni dow chuta dawnguan khai bowt. Nami kung kowi dow CHAKRAMANG vüi amülüngma mih uanap iawng hai amatni kowi Arawn ap-ah khai, now amatni kowh angak dow nalawtta pe kownkow Arawn chang pe lup khai.22Amatni dow Mosi kowi kowh CHAKRAMANG peah ana mih iawng rowprowp Leviuüa kowi changah khai. Nami kung kowi dow taklowp taklangra te kowi Arawn hai achapauüa nimkrüa kowi Leviuüa uown chang lup khai bowt.23Akung kowi CHAKRAMANG tek pe Mosi mih,24“Mami dow Leviuüa nachünah kown mih rirow chekhai: Amatni pungmadawng kowi kowh 25 hownia 50 ning takra kowi kowh kachakuüa chowtaih taklowp taklangra te kowi nauang chang lup kown.25Nachenganchepaw 50 ning chih khowk mih maru dow nami lup chang hownia natanai kown takla; amatni dow natawi chang lup kown nadowi bowt.26Nakhowk khe dow taklowp taklangra te kowi kowh chang lup miuüa kowi natawi ia mingkhet büah kown. Tawkche tawng lup paw natawi ia chang büah kown nadowi bowt. Mami rirow kowi uowi iawng Leviuüa kowi en nakhowm bowk pe lup kown,” pape khai.
The Seed Company