Tarüa31
1CHAKRAMANG tek pe Mosi mih,2“En kowng dowi rawn khe Midianuüa kowh ripra dow pela diah. Israeluüa luk kowi kowh amatni changta angak mih klai dow peah diah,” pape khai.3Naiawng rakowi Mosi tek pe Israeluüa mih, “Midianuüa kowi kowdowk tasen kownkow enni pungmadawng hownia maru sangrum kowi tasen tawnguat hown tawngah diah. Amatni dow CHAKRAMANG vüi Midianuüa kowi pacham peah ripra lah.4Israeluüa pungmadawng hownia pakrungchak kowi maru iun 1,000 ia chi cham dowk tasen kownkow chinah büa diah,” pape khai.5Naiawng rakowi Israel laipre krungchak hownia pakrungchak kowi 1,000 ia chi bowkbowk kowi 12,000 ia uang pawla khai, now naiawngünuüa kowi dow tasen tawnguat hown tawngah khai.6Now Mosi dow 12,000 ia maru kowi cham chinah tasen khai bowt. Cham dowk tasen miuüa hown uamow Eleazar kowh chapa Finehas paw tawi tarü khai. Finehas dow dowk tasen kown chowbowt khe kowh natüngla aklow kown mih baw hai taklowp taklangra te kowi kowh uanh pawla ne khai.7Cham dowk tasen miuüa dow Mosi kowi kowh CHAKRAMANG peah ana iawng rowprowp chang büah khai. Amatni dow Midianuüa hown tadowk tasen hanow kachakuüa maten kowi kowngta büah khai.8Amatni dow akeng miuüa kowi iawng Midianuüa kowh mang tanga ia kowi paw kowngla büah khai. Naiawngün manguüa ming dow Evi, Rekem, Zur, Hur hai Reba chekhai. Nami klen kowi Beur kowh chapa Balam kowi paw saidawng hown saila büah khai.9Amatni dow Midian prenchak masiuüa hai ngeuüa maten kowi khümla now uang pawla büah khai. Nami klen kowi chia, rua, ruapur hai dawngthawnguan srui uang rupla büah khai.10Midianuüa uowiah mih marow maten hai marow uat kowi kowh tangbung khup rah maten paw towkla pe büah bowk khai.11Nami kung kowi dow amatni khümla mih maru maten hai tawncher hown uanh srui pawla now Mosi, uamow Eleazar hai Israeluüa maten tut-e uang plan büah khai bowt. Nami khin khe Israeluüa uowi mih dow Moab pren kowi kowh dowm nai kowi chekhai. Nami dowm nai dow Jawrdan aw paipra pown kowi kowh Jeriko marow hown tatang klowk chekhai.13Now Mosi, uamow Eleazar hai Israel aluchowuüa maten dow uang mang tasen miuüa hown kowtakrum kownkow tangbung khup rah uat kowi kowkowi büah khai.14Israel siphai hawmh pungmadawng kowi dow 1,000 ia luk kowi hai 100 ia luk kowi aluchow uowi lowk ia chi chekhai. Tasenra hownia kowh uang mang mih naiawngün siphai aluchowuüa kowi dow Mosi kunmarauah khai. Mosi tek pe mih, “Tawngplawng kowchow naiawngün masiuüa maten kowi enni saila dowi?16Peur hungh kowi tawng chow own mih enni tamata khai bow? Balam kowh prengia hown naiawngün masiuüa hawmh chowbowt dow CHAKRAMANG hownia cham plengla enni mih; naiawngün masiuüa rakowi chowbowt dow CHAKRAMANG kowh maru-uüa luk kowi makowng hawi uang kla mih.17Naiawng rakowi taphua taiua khowk mih masiuüa maten hai kachakuüa chah maten kowi dow kawmat saita büa diah.18Nachenganchepaw taphua taiua dowi tak mih malauüa maten kowi dow enni matia vüi towah büah taih.19“Enni pungmadawng kowi kowh sai maru mih maten hai kakta uak mih srui dow ranit ni mowr tangbung khup rah uat kowi nauowi kown takla tak. Now sum ni mih ni hai ranit ni mih ni khe enni matia hai enni uang khümla mih masiuüa hawmh kowi enni nachimsaiah kown.20Nami klen kowi enni uang kala mih dawnguan hai chak pik ün, singh hai rua pawi hown kowh thawpah mih uanh ün enni nachimsaiah bowk kown takla,” pape khai.21Now cham dowk tasen mih siphaiuüa maten kowi uamow Eleazar tek pe mih, “Mosi kowi kowh CHAKRAMANG peah mih ana maiawng chekhai:22Kuh, tai, kri, lawngha, saingpru, khema hai maih kowi kowh kam naklak dowi mih uanh srui dow enni nachimsaiah kownkow maih kowi enni naawpah kown. Now maih hownia khowngta kung kowi paw tachim tasai müa tui hown enni nachimsaiah kown takla. Now maih kowi kowh kam mih chap maten paw tachim tasai müa tui hown enni nachimsaiah kown takla.24Ranit ni mih ni khe dow enni kowh tawnguat enni nachuta kown, now enni chimsai kown towbowt. Nami kung kowi dow tangbung khup rah kowi enni uang nowng uang kown towbowt,” pape khai.25Nami kung kowi CHAKRAMANG tek pe Mosi mih,26“Tasenra hownia kowh uang khümla mih maru iun hai uang kala mih tawncher maten uamow Eleazar hai Israel aluchowuüa enni mih rüaah hanow changah pre bak diah. Now pre bak mih kowi pabak dow cham dowk tasen mih siphaiuüa maten kowi pe pawah diah, now pabak mih dow tawi tarü tasen dowi miuüa maten kowi peah diah.28Now cham dowk tasen mih siphaiuüa vüi bak kowi kowh maru hai tawncher maten dow 500 kowi lowk chi CHAKRAMANG vüi nalang towta kown takla.29Now naiawngün dow CHAKRAMANG vüi uamow Eleazar rut kowi en naap pe kown.30Now tawi tarü tasen dowi miuüa vüi bak kowi kowh maru hai tawncher maten dow 50 kowi lowk chi en nalang towah kown. Now naiawngün dow taklowp taklangra te mingkhet mih Leviuüa rut kowi en naap pe kown,” pakhai.31Mosi kowi kowh CHAKRAMANG peah ana iawng rowprowp Mosi hai uamow Eleazar iüah dow lup maten changah khai.32Tasenra hownia kowh siphaiuüa uang khümla mih maten kowi rua hai ruapur dow 675,000 pum,33chia dow 72,000 pum, kawrngaramchük dow 61,000 pum, now taphua taiua dowi tak mih malauüa dow 32,000 ia chekhai.36Cham dowk tasen mih siphaiuüa vüi bak kowi kowh rua hai ruapur dow 337,500 pum, chia dow 36,000 pum, kawrngaramchük dow 30,500 pum, now taphua taiua dowi tak mih malauüa dow 16,000 ia chekhai. Nami hownia CHAKRAMANG vüi bak lang towta mih rua hai ruapur dow 675 pum, chia dow 72 pum, kawrngaramchük dow 61 pum, now taphua taiua dowi tak mih malauüa dow 32 ia chekhai.41Aia kowi kowh CHAKRAMANG peah ana iawng Mosi dow CHAKRAMANG vüi bak pawah hanow uamow Eleazar rut kowi ap pe khai.42Tawi tarü tasen dowi miuüa vüi bak kowi kowh rua hai ruapur dow 337,500 pum,44chia dow 36,000 pum, kawrngaramchük dow 30,500 pum, now taphua taiua dowi tak mih malauüa dow 16,000 ia chekhai.47Now tawi tarü tasen dowi mih Israeluüa vüi bak kowi kowh malauüa hai tawncher hownia paw 50 kowi lowk chi pawah now CHAKRAMANG ana pek iawng taklowp taklangra te mingkhet mih Leviuüa kowi Mosi peah khai.48Nami kung kowi siphai hawmh kowi kowh 1,000 ia luk kowi kowh aluchow hai 100 ia luk kowi kowh aluchowuüa dow Mosi tut-e kowkowiah now kowtek pe mih, “Anging dow en kowh naruüa chekhai. Anging krüa kowi kowh siphaiuüa kowi anging rüaah pache lowk iachow paw tasenra kowi kowng dowi chekhai.50Naiawng rakowi tasenra hownia kowh anging uang kala mih kuh hown kowh harkowi, kuaiseh, mur uowi mih rutbüt, ramseng hai kuh leng maten kawmat anging uang pawla khai. Maiawngün uanh dow anging kowh angak lawt lük müa CHAKRAMANG vüi ap-ah kown anging nau,” pabüah khai.51Nakhowk khe Mosi hai uamow Eleazar iüah mih siphai aluchowuüa hownia naiawngün kuh hown kowh tatawng müa uanh maten hawt paw iüah khai.52Siphai aluchowuüa hownia hawt pawah now CHAKRAMANG vüi Mosi hai uamow Eleazar iüah ap-ah mih kuh dow bowkbowk kowi adik 190 set chekhai.53Now cham dowk tasen mih siphaiuüa maten paw chowlowkkow vüi kuh hown kowh tatawng müa uanh uang rupla bowk chekhai. Nachenganchepaw amatni dow amatni kowh uanh mih aluchowuüa iawng CHAKRAMANG vüi kowi apek kla dowi chekhai.54Mosi hai uamow Eleazar iüah dow siphai aluchowuüa uang pawla mih kuh hown kowh uanh srui hawt paw iüah khai. Now aia kowh maru Israeluüa kowi CHAKRAMANG natuakla reng kownkow naiawngün uanh dow taklowp taklangra te lak kowi towah iüah khai.
The Seed Company