Tarüa30
1Israel aluchowuüa kowi Mosi tek pe mih, “CHAKRAMANG tek mih maiawng:2CHAKRAMANG vüi tawng chü nachang kown kham sawi mih kachakuüa che uowi khai hanow aia takhamta iawng nachang ngengche kown takla.3“Cham mang dowi tak mih masiuüa che a-pa kim kowi uowi reng tak khe CHAKRAMANG vüi tawng chü nachang kown mih kham sawi khai hanow a-pa ta mih ni khe hangah dowi now aia takhamta mih iawng nachang ngengche kown takla.5Nachenganchepaw naiawng takham mih laiklow ta mih ni khe a-pa che hangah khai hanow aia takhamta mih dow aia chang kla dowi tham. A-pa hangah khai rakowi aia piakta sawi kham lai mih dow CHAKRAMANG nalawtah kown taih.6“Now u-pa kim kowi uowi reng tak khe CHAKRAMANG vüi tawng chü nachang kown mih kham sawi mih masiuüa paw nauowi kown. Nachenganchepaw nami masiuüa cham mang kung kowi aia takhamta mih lawnguan ahua tukta mih ni khe hangah dowi hanow aia takhamta iawng nachang ngengche kown takla.8Tawkchedow aia takhamta mih ta mih ni khe ahua che hangah khai hanow nami dow aia chang kla dowi tham. Ahua hangah khai rakowi aia piakta sawi kham lai mih dow CHAKRAMANG nalawtah kown taih.9“Mamaimow hai ahua khuata mih masiuüa dow takhamta khai hanow aia takhamta iawng nachang ngengche kown takla.10“Ahua uowi mih masiuüa che CHAKRAMANG vüi tawng chü nachang kown mih kham sawi khai chepaw ahua ta mih ni khe ahua hangah dowi hanow aia takhamta iawng nami masiuüa nachang ngengche kown takla.12Tawkchedow aia takham mih ni khe ahua che hangah khai hanow nami dow aia chang kla dowi tham. Ahua hangah khai rakowi aia piakta sawi kham lai mih dow CHAKRAMANG nalawtah kown taih.13Masi takhamta mih laiklow kowi pe changah kown mih hai pe changah dowi kown mih alow dow ahua kowh nauowi kown.14Amasi takhamta mih ahua tuk khowk chepaw lai dowi hanow amasi takham mih dow ahua tawi nauta pe mih iawng hai nadowkah kown. Amasi takham mih ta mih ni khe ahua che tawngpaw tek dowi hanow ahua tawi nauta pe mih iawng chekhai.15Nachenganchepaw amasi takham mih tukta mih ni khe lai dowi kowi pre sum ni kung kowi che ta hangah khai hanow amasi takhamta iawng chang dowi mih ripra dow ahua naka kown,” pakhai.16Mami dow kham sawi khe kowh vüi Mosi kowi kowh CHAKRAMANG peah mih rirow chekhai. Mami dow masi huaiu vüi, cham mang dowi tak mih masiuüa hai a-pa vüi kowi kowh rirow chekhai.
The Seed Company