Tarüa32
1Jazer hai Gilead süng kowi kowh kaurawng dow tawncher thing rah lainowmma iung chekhai. Nami süng khita hanow Reuben hai Gad krungchakuüa dow nami süng kowi nauowi kown mih lainowmma nau büah khai. Tawngplawng kowchow panow amatni kowh dow chia, rua hai ruapur tawn ahuma chekhai. Naiawng rakowi amatni dow Mosi, uamow Eleazar hai Israel aluchowuüa kowi tek pe mih,3“Atarawt, Dibawn, Jazer, Nimra, Hesbawn, Eleale, Sebam, Nebo hai Beawn pami marow maten dow CHAKRAMANG pe powng a-i khai. Maiawngün arah dow tawncher thing rah aiungma chedow makowi pe uowi anging towbowt. Tawngplawng kowchow panow anging kowh dow tawncher hawmh ahuma chekhai. En che saksing sana anging khai hanow mami en naruüa kowi maiawngün arah dow dawngthawnguan iawng hai pe anging diah. Jawrdan aw paipra pown kowi hauang pawla anging diah,” pabüah khai.6Nami laiklow tata hanow Gad hai Reuben krungchakuüa kowi Mosi tek pe mih, “Enni kowh tainau-uüa cham dowk tasen mih khin khe makowi enni ta uowi phülü kown tiah?7CHAKRAMANG pe enni mih pren kowi nakowkowi kown mih sakkraingra enni kowh tainau-uüa kowi tawngplawng kowchow enni tuk piakta pe khai?8Kades-Barnea kowi uowi khe CHAKRAMANG pe a-i mih pren nakowkumü kownkow enni kowh pipu-uüa kowi ang kowchinah khai. Nami khin khe kowbüah paw kawmat kowh enni iawng rowprowp chang büah khai.9Amatni dow Eskawl lawngrawi mowr kowkrawi kumüla hanow uang plan büah khai. Amatni dow uang ting now CHAKRAMANG pe a-i mih pren kowi nakowkowi kown mih sakkraingra Israeluüa kowi uang piakta pe khai.10Naiawng rakowi CHAKRAMANG dow nami ni khe amatni kowi lainowmma kunmarauah khai. Now aia dow takham se tek mih,11‘Abraham, Isak hai Jakawb büah kowi napeah kownkow ang khamah mih pren dow Aigupta pren hownia kowh uang lawt miuüa pungmadawng kowi 20 ning chih mih hownia nami luk kowi kowh maru maten natawi ka khi kown nadowi. Tawngplawng kowchow panow amatni dow ang laiklow achima chün ang büah dowi chekhai.12Keniz krungchak Jefune kowh chapa Kaleb hai Nun kowh chapa Josua iüah chowtaih nami pren dow naka khi kown. Tawngplawng kowchow panow kowiüah dow ang kowh laiklow achima chün iüah khai,’ pakhai.13Nami khin khe Israeluüa luk kowi CHAKRAMANG dow lainowmma kunmarau khai. Naiawng rakowi CHAKRAMANG dow süngrüp süngkangma kowi towta a-i hüah khai. Aia mik kowi kowh angakma miuüa kowng bowk dowi mowr aia dow süngrüp süngkangma kowi 40 ning mowr krawi pe len a-i panglang khai.14“Enni dow maru ngak chekhai. Enni paw enni pipu-uüa changla mih lup ngak iawng enni plan chang khai iawk. Israeluüa luk kowi kowh CHAKRAMANG kunmaraura dow enni pe huah ngamlam khai.15Enni che aia laiklow chün dowi hanow khaleng paw mami süngrüp süngkangma kowi CHAKRAMANG natowta a-i hüah iawk kown chaw. Maiawngün maru-uüa luk kowi piakra nauang ting kown mih dow enni rakowi chekhai,” pape khai.16Nakhowk khe Reuben hai Gad krungchakuüa mih Mosi re-e kowtatawnah now tek pe mih, “Anging kowh tawncher uowi rah kim hai anging kowh masi chauüa uowi rah marow krowngchow taih makowi thawpla kown anging nau.17Nachenganchepaw anging matia dow Israeluüa maten chowlowkkow uowi rah kowi ting dowi mowr tasen tawnguat khupma hown amatni pur kowi rik mang hanow natawi saah kown taih. Amatni kowi naiawng anging tawi sa mih khin khe anging kowh kimchakuüa kowi mami prenchakuüa uang nowng senla dowi kownkow tap uowi mih marow kowi towla krowngchow kown anging nau.18Israeluüa maten chowlowkkow dawngthawnguan bak ka dowi mowr dow makowi anging nauang plan kown nadowi.19Nachangla dawngthawnguan kownkow satlawt prakowi che en pe uowi anging hanow Jawrdan aw satkup prakowi dow Israeluüa hown anging tawi paw dawngthawnguan bak dowi bowt tham,” pabüa khai.20Nami laiklow tata hanow Mosi tek pe mih, “Enni che tasen tawnguat khupma hown Jawrdan aw paipra pown kowi tawi khai, now CHAKRAMANG pur hownia aia kowh ransu-uüa kowi prütta bowk dowi mowr enni tawi khowng tasen khai hanow22Jawrdan aw paipra pown kowi kowh pren CHAKRAMANG pe powngta a-i bowk kung kowi dow makowi enni nauang ia plan kown taih. Nakhowk khe dow CHAKRAMANG hai Israeluüa vüi kowi kowh enni kowh kurdik nachur kown towbowt. Nahanow CHAKRAMANG alow hown mami pren dow enni kowh dawngthawnguan bak nachowng kown towbowt.23Nachenganchepaw naiawng che enni chang dowi hanow CHAKRAMANG kowi kingküala mih angak enni chang mih chekhai. Nami angak sung dow enni naka ngengche kown pami tukah büa diah.24Enni kowh tawncher uowi rah kim hai enni kowh masi chauüa vüi marow enni ia thawpla pe kown taih. Tawkchedow enni takhamta iawng enni nachang ngengche kown takla,” pape khai.25Nakhowk khe Reuben hai Gad krungchakuüa tek pe Mosi mih, “En dow anging kowh chakramang chekhai; anging dow en kowh nar chowtaih. En pe anging mih ana maten anging nachün kown taih.26Anging kowh masi chauüa hai anging kowh tawncher hawmh chowtaih mami Gilead süng kowi kowh marow maten kowi nata uowi kown.27Nachenganchepaw anging dow en tek anging iawng tasen tawnguat khupma hown natawi dowk tasen kownkow CHAKRAMANG pur kowi Jawrdan aw natawi pown kown taih,” pabüa khai.28Nakhowk khe Mosi mih uamow Eleazar, Nun kowh chapa Josua hai Israel chowlowkkow krungchak kowi kowh aluchowuüa kowi naiawngün maru-uüa lawnguan kowi peah ana khai.29Mosi tek pe mih, “Gad hai Reuben krungchakuüa kowi kowh kachakuüa nget tasen tawnguat khupma hown Jawrdan aw paipra pown kowi CHAKRAMANG pur kowi natawi khowng enni tasen kown. Naiawng che amatni tawi khowng enni khai hanow enni ia powngta pren mih khin khe dow mami Gilead süng mih nachangla dawngthawnguan kownkow amatni kowi peah büa diah.30Nachenganchepaw amatni che naiawng chang büah dowi hanow Kanan pren kowi chowtaih enni hown natawi ka dawngthawnguan bak kown,” pape khai.31Nami laiklow tata hanow Gad hai Reuben krungchakuüa tek mih, “CHAKRAMANG tek iawng en naruüa nachang kown taih.32Tasen tawnguat khupma hown CHAKRAMANG pur kowi Jawrdan aw anging natawi pown hanow Kanan pren kowi natawi kown taih. Nachenganchepaw anging kowh dawngthawnguan dow Jawrdan aw mapra pown kowi nata uowi kown,” pabüah khai.33Nakhowk khe Mosi dow Amawruüa kowh mang Sihun kowh pren hai Basanuüa kowh mang Awk kowh pren mih Reuben krungchak maten, Gad krungchak maten, now Josef kowh chapa Manase krungchak dawnglang vüi tow pe khai. Marow hai aria aret kowi kowh süng maten dow kowbüah vüi kowi Mosi tow pe khai.34Gad krungchakuüa dow Dibawn, Atarawt, Aroer, Atarawt-Sofan, Jazer, Jawkbeha, Bet-Nimra hai Bet-Haran pami marow kowi kowh tapat lut mih tap krawi plan raw büah khai, now amatni kowh tawncher uowi rah khah paw kawmla büah khai.37Reuben krungchakuüa dow Hesbawn, Eleale, Kiriathaim, Nebo, Baal-Meawn hai Sibma pami marow kowi kowh tapat lut mih tap krawi plan raw büah khai, now amatni rawah mih Nebo hai Baal-Meawn marow ming dow chapla pe ming sar büah khai.39Manase kowh chapa Makir krungchakuüa dow Gileaduüa kowi kowsenah now nami süng dow kowpowngta khai. Now nakowi kowh uowi mih Amawruüa maten kowi dow nami pren hownia prütta büah khai.40Naiawng rakowi Manase chapa Makir kowh krungchakuüa vüi Gilead süng mih Mosi tow pe khai. Makir krungchakuüa dow nami pren kowi uowi büah khai bowt.41Now Manase chapa Jair kowh krungchakuüa dow Amawruüa kowh marow kowkrawi powng khai, now naiawngün marow ming dow “Jair Marow” pahai chap pe ming sar khai.42Now Manase chapa Noba pami dow Kenat marow hai aria aret kowi kowh kua kowkrawi powng khai, now aiamat ming iawng dow nami marow ming Noba Marow pahai chap pe ming sar khai.
The Seed Company