Tarüa13
1Paran pami süngrüp süngkangma kowi uowi khe CHAKRAMANG tek pe Mosi mih,2“Israel laipre chen kowi kowh aluchowuüa kowi pachen e lowk ia chi Kanan pren kowi kowchinah dumiow diah. Amatni dow ang nape enni kown mih Kanan pren tawng iawng chow uowi mih pakowku mü lah,” pakhai.3Naiawng rakowi Mosi dow CHAKRAMANG ana iawng rowprowp chang khai bowt. Aia dow Israel aluchow laipre ia kowi Paran pami süngrüp süngkangma hownia kowchinah khai. Naiawngün aluchowuüa dow4Reuben krungchak hownia Zakur kowh chapa Samua;5Simiawn krungchak hownia Hori kowh chapa Safat;6Juda krungchak hownia Jefune kowh chapa Kaleb;7Isakar krungchak hownia Josef kowh chapa Igal;8Efraim krungchak hownia Nun kowh chapa Hosea;9Benjamin krungchak hownia Rafu kowh chapa Palti;10Zebulun krungchak hownia Sodi kowh chapa Gadiel;11Josef kowh chapa Manase krungchak hownia Susi kowh chapa Gadi;12Dan krungchak hownia Gemali kowh chapa Amiel;13Aser krungchak hownia Mikael kowh chapa Sethur;14Naptali krungchak hownia Vofsi kowh chapa Nabi;15Gad krungchak hownia Maki kowh chapa Geuel büah chekhai.16Kanan pren kowmü kownkow Mosi kowchinah mih dumiowuüa dow naiawngün aluchowuüa chekhai. Nun kowh chapa Hosea kowi Mosi rük pe mih ming dow Josua chekhai.17Kanan pren kowi kowchinah mih khin khe Mosi krawi tek pe dumiowuüa mih, “Negeb iawng kowrik kowiah büah hanow hungma mawngma süng iawng kowkupah büa diah.18Kanan pren tawng iawng chow uowi mih kowkrawi kumü büa diah. Nakowi kowh maru-uüa akürma bow kür dowi bow, now maru iun akawmma bow kawm dowi bow,19now tawng iawng mih süng kowi chow uowi büah mih, nami süng dow iung bow iung dowi bow mih enni namüla kown. Amatni uowiah mih marow maten dow akhawtma mih kangchawngra kim uowi bow uowi dowi bow?20Nakowi kowh krawng kowi luprak iung bow iung dowi bow? Nakowi dow singh kau uowi bow uowi dowi bow? Nakowi kowh uih-ak küklük enni nauang pawla ne kown,” pakhai. Kowbüah kowkowi mih khin khe grep uih klek khin uown thüm chekhai.21Nami laipre ia aluchowuüa dow Zin pami süngrüp süngkangma hownia kowuown kowiah hanow Hamat marow re-e kowh Rahab marow mowr kowkrawi müla büah khai.22Amatni dow Negeb iawng tarü hanow Hebrawn marow kowi kowtowm büah khai. (Hebrawn marow dow Aigupta pren kowi kowh Zoan marow lak-e lang ta 7 ning chekhai). Hebrawn marow kowi uowi miuüa dow Anak kowh chuprek chaprek Ahimanuüa, Sesaiuüa hai Talmaiuüa chekhai.23Amatni dow Eskawl lawngrawi kowi kowkowiah büah hanow nakowi kowh grep uih klekla papawt büah khai; amatni dow amia hailawm rowila büah khai. Nami grep uih pawt dow dih lai rakowi cham tu pe akawtlawng hanow kawtla pre ia khai. Nami klen kowi amatni dow dalim uih hai uidut uih paw pawla ne khai.24Nami re-e Israeluüa klekla grep uih papawt khai rakowi nami lawngrawi ming dow Eskawl pahai chap pe khai. (Eskawl pami dow “Pawt” pami chekhai).25Now 40 ni mowr krawi kumüla pren kung kowi dow Israel aluchowuüa mih uang plan khai bowt.26Nami aluchowuüa dow Mosi, Arawn hai Israeluüa pungmadawng kowi uang plan mang khai bowt. Nami khin khe amatni uowi mih dow Paran pami süngrüp süngkangma kowi kowh Kades marow kowi chekhai. Amatni dow khila mih srui Mosi, Arawn hai Israeluüa maten kowi uang lawp pe khai, now amatni uang pawla mih uih-ak paw tüng pe büah khai.27Amatni dow Mosi kowi tek pe mih, “En kowchin anging mih pren kowi anging kowkowi khowk. Nami pren kowi iawn tui, kuai tui hai tawng chap paw akhawr uowi dowi nowm pami mami uih-ak kowi müah now tuk mih towbowt.28Tawkche nami pren kowi kowh uowi miuüa dow akürma kangowh chekhai. Amatni kowh marow paw aiukma kangowh, now tap uowi bowk chekhai. Nami klen kowi lang ngah nowm nowm mih dow Anak kowh chuprek chaprekuüa kowi paw nami pren kowi anging khila chekhai. (Amatni dow aiuk akroma kangowh chekhai).29Amalekuüa uowi mih dow Negeb kowi chekhai. Hituüa, Jebusuüa hai Amawruüa uowi mih dow hungma mawngma süng kowi chekhai. Now Kananuüa uowi mih dow Mediteranean sata riaret kowi hai Jawrdan aw riaret kowi chekhai,” pakhai.30Nami laiklow tata now maru kawmuüa dow kram kowh Mosi pur kowi pawpanla ur khai. Nakhowk khe Kaleb tek pe mih, “Chu, nami pren a-i kowpowng madiah sik. A-i naia powng ngengche kown taih,” pakhai.31Nachenganchepaw Kaleb hown kowh kowkowi mih akeng miuüa tek mih, “Paimi pren kowi kowh maru-uüa hown tasen kown mih mapaw a-i nowng dowi tham. Kowbüah dow a-i lak-e lang kür chekhai,” pakhai.32Kaleb hown kowh kowtawi mih akeng mih dumiowuüa dow Israeluüa tut-e Kanan pren lawnguan kowi küa dai mih, “Anging kowmüah mih pren dow aia prenchakuüa kowi iawnah reng chekhai. Nakowi kowh anging khila mih maru maten abawlima kangowh chekhai.33Nephilimuüa kowi paw nakowi anging khila chekhai. Anak krungchakuüa dow Nephilimuüa kowh chuprek chaprek chekhai. Kowbüah kowi khita now plawng khowt chow anging matia kowi anging tatuak khai, now kowbüah paw naiawng khowt chowtaih tuakla anging khai,” pakhai.
The Seed Company