Tarüa12
1Mosi kowh dow Kus chenchap masiuüa paw masi uowi ama tak chekhai. Nami masiuüa hown tachawng rakowi Miriam hai Arawn iüah mih Mosi kowi kingküaah khai.2Amatchi tatek mih, “Mosi hown krowngchow taih bow CHAKRAMANG tek lai? Achi hown dow CHAKRAMANG tek lai dowi bow?” paiüah khai. Naiawng amatchi tatek mih dow CHAKRAMANG ta khai.3(Mosi dow mapaw bawri dowi mih maru chekhai. Aia iawng bawri dowi mih maru lusa kowi miapaw uowi dowi bowt).4Arawn hai Miriam iüah kowh laiklow tata hown akrowksang CHAKRAMANG mih Mosi, Arawn hai Miriam büah kowi hawah khai. CHAKRAMANG tek pe mih, “Tangbung hownia uang lawt hanow taklowp taklangra te re-e enni sum ia uang büa diah,” pakhai. Nami tata hanow Mosi, Arawn hai Miriam büah mih taklowp taklangra te re-e kowkowi büah khai.5Nakhowk khe CHAKRAMANG dow uangnim iowng chunglung mih kowi taklowp taklangra te plawt re-e uang iowng khai, now Arawn hai Miriam iüah kowi hawah khai. Now amatchi dow CHAKRAMANG re-e kowtatawn khai. Nami khin khe CHAKRAMANG tek pe amatchi mih, “Ang laiklow sünta iüa diah. Enni pungmadawng kowi che akeng mih risiuüa uowi khai e dow mukmang kowi ang CHAKRAMANG nauang tatüng pe kown taih diah, now amatni tut-e mang kowi ang nauang klangah kown taih diah.7Tawkche ang kowh nar Mosi kowi dow naiawng ang changah dowi chekhai. Aia dow ang kowh maru Israeluüa pungmadawng kowi kowh ang kaah sakowm mih maru chekhai.8Naiawng rakowi aia hown dow tatingtangah klowk now ang klangah reng, aia kowi dow laiuat hown ang klangah dowi chekhai. Aia tut-e dow ching kowi ang uang tatüng pe reng chekhai. Naiawng chepaw ang kowh nar Mosi kowi nakingküaah kown mih mapaw enchi kram dowi chekhai!” pakhai.9Naiawng rakowi CHAKRAMANG mih Arawn hai Miriam iüah luk kowi lainowmma kunmarauah khai. Nami kung kowi aia dow amatchi hownia powt khai bowt.10Taklowp taklangra te hownia aluk prakowi nami uangnim iowng chunglung mih awr pün hanow Miriam buk kowi nang iawng akawma par uang phaw khai. Nami par rawka dow Miriam prakowi Arawn haimü hanow khita khai.11Nahanow Arawn tek pe Mosi mih, “Aw, ang kowh chakramang, smuma mih maru iawng angching changta lup ngak khai. Angching kowh angak lawtta angching diah.12U mu lak hownia akowngma mih ngiachow uang dia khe kowh pik tanir mih iawng Miriam kowi hangkow towta hüah diah” pakhai.13Now atün atünma CHAKRAMANG tut-e Mosi lü prasi mih, “Aw Thurai, sakrauma hown Miriam kowh par rawka iungta pe diah,” pakhai.14CHAKRAMANG tek pe Mosi mih, “A-pa che thawk pe aia kowh lumowr khai e dow ranit ni mowr aia narukrai kown. Aia kowi mih ranit ni mowr tangbung khup rah uat kowi cham lang pe uowiah diah. Now nami ranit ni kung kowi par rawka iung khowk khe chiang aia kowi mih tangbung khup rah kowi nauang ia pawla kown,” pakhai.15Naiawng rakowi ranit ni mowr Miriam kowi tangbung khup rah uat kowi cham lang pe uowiah khai. Now aia kowi uang plan pawla dowi mowr akeng mih arah kowi Israeluüa cham süt dowi chekhai.16Nami kung kowi dow Israeluüa mih Hazerawt hownia lawt hanow Paran pami süngrüp süngkangma kowi kowkhup tangbung büah khai.
The Seed Company