Tarüa14
1Nami laiklow tata now Israeluüa dow uar prowt kar sawmlawm khai.2Amatni dow Mosi hai Arawn iüah kowi lainowmma kamcheah khai. Amatni tek pe mih, “Aigupta pren kowi chepaw, mami süngrüp süngkangma kowi chepaw anging kowng panü dow lang iung tak diah.3Tasen hown Kanan pren kowi nakowngta anging kownkow tawngplawng kowchow Aigupta pren hownia CHAKRAMANG uang tuk pawla anging khai? Kanan prenchakuüa dow anging kowh masi chauüa kowi narupta anging kown towbowt. Nami lak-e dow Aigupta pren kowi kowplan mih anging vüi lang iung nadowi bow?” pabüah khai.4Amatni dow lowkkowlowk tatek büah mih, “Chu, a-i thawp aluchow lowk ia now Aigupta pren kowi a-i kowplan lah,” pakhai.5Nami lawnguan tukta hanow Mosi hai Arawn iüah dow Israeluüa pur kowi krawng kowi tabawkah krawm khai.6Nakhowk khe kowkumü Kanan pren mih dumiowuüa pungmadawng hownia Nun kowh chapa Josua hai Jefune kowh chapa Kaleb iüah dow amatchi kowh tawnguat sekla se Israeluüa kowi tek pe mih, “Anging kowmüah mih pren dow lainowmma klangiung.8CHAKRAMANG che sak-ih a-i khai hanow aia dow iawn tui, kuai tui hai tawng chap paw akhawr uowi dowi mih pren kowi napawla a-i kown taih. Nami pren dow aia nape a-i kown taih.9Naiawng rakowi CHAKRAMANG kowi hang kingküa büa diah. Kanan pren kowi kowh maru-uüa kowi hangkow kram büah; amatni kowi dow kra dowi kowi a-i nowngta kown taih. Amatni dow tawng iawng paw ia plai dowi bowt tak. CHAKRAMANG tawi uowila a-i kown taih. Hangkow kram büa diah,” pakhai.10Nachenganchepaw Israeluüa dow Josua hai Kaleb iüah kowi hua hown kuakah now kowngta kown mih tatek büah khai. Nachenganchepaw nakhowk khe CHAKRAMANG kowh kraingra dow taklowp taklangra te hownia Israeluüa pur kowi uang tatüng khai.11Mosi kowi CHAKRAMANG tek pe mih, “Mün khowt tak chow maru kawmuüa nasui ang kown? Amatni kowi dow awdara lup ahuma ang tüng pe khowk. Nachepaw tawngplawng kowchow owm ang büah dowi reng tak?12Amatni luk kowi ang nauang pawla pe makowng hawi kown. Amatni dow ang kowh maru nachowng kown nadowi bowt. Nachenganchepaw en hownia dow kowbüah lak-e lang kür hai lang kawm mih chenchap ang nathawpah kown,” pape khai.13Nami laiklow tata hanow CHAKRAMANG kowi Mosi tek pe mih, “Mami maru kawmuüa kowi dow Aigupta pren hownia en matia kür hown en uang pawla mih chekhai. Naiawng che amatni kowi en ripah khai hanow nami lawnguan dow Aigupta prenchakuüa natawi ta kown towbowt.14Aiguptauüa dow ta hanow Kanan prenchakuüa kowi paw natek pe kown towbowt. Aw CHAKRAMANG, Israeluüa kowi en tawi uowila reng pami kawmat mowr dow mami prenchakuüa tuk chekhai. Aw CHAKRAMANG, ni-e dow uangnim iowng chunglung mih iawng, now uar-e dow maih lün iowng chunglung mih iawng en tawi uowila anging reng pami Kanan prenchakuüa tawi ta khowk chekhai.15Naiawng rakowi mami maru kawmuüa kowi che amaisang en kowngta bowk hanow en lawnguan kowi kowh tawi ta khowk mih chenchapuüa natek kown mih,16‘Napeah kownkow aia khamah mih pren kowi Israeluüa kowi CHAKRAMANG nowng pawla dowi bowt kowh süngrüp süngkangma kowi saita bowk khowk,’ napa kown.17“Naiawng rakowi Aw CHAKRAMANG, kawmat en kowh kür tüng anging diah, now en kham anging iawng chang anging diah.18En tek mih, ‘CHAKRAMANG dow kunmarau naklak dowi. Aia kowh sakraura dow achur uowi dowi chekhai. Aia dow atawi ama ün, angak ün lawt reng chekhai. Nachenganchepaw aprek uowi mih maru kowi dow aia ripah reng. Aia dow u-pa kowh angak sung chauüa luk kowi sum tali chowng mowr peah ripra reng chekhai,’ pakhai.19Aigupta pren hown uang lawt hownia kawmat mowr en pe anging alawt reng chekhai. Nami powm iawng dow en kowh sakraura achur uowi dowi mih mami maru kawmuüa kowi tüng pe iawk diah, now amatni kowh angak lawtta pe diah,” pakhai.20Nakhowk khe CHAKRAMANG tek pe Mosi mih, “En tek iawng amatni kowh angak dow ang lawtta pe khowk.21Nachenganchepaw ang dow sing uowi reng pami hai ang kowh kraingra dow palusama kowi atekma uowi reng pami anowm chekhai, nami powm iawng dow mami laiklow paw anowm chekhai.22Amatni pipu-uüa tut-e kowh ang khamah mih Kanan pren dow mami maru-uüa lowk iachow paw nakhi kown nadowi. Tawngplawng kowchow panow Aigupta pren kowi hai süngrüp süngkangma kowi kowh ang kowh awdara lup hai ang kowh kraingra khi büah reng khowk chepaw nuata ang büah khai. Naiawng hai amatni dow plan plan chaing ang büah khai. Sui ang miuüa dow miapaw natawi khi Kanan pren kown nadowi.24Nachenganchepaw ang nar Kaleb kowh saktuak dow naiawng nadowi. Aia dow ang kowh lai chün reng chekhai. Naiawng rakowi aia kowkowiah mih pren kowi dow aia kowi ang nakowpawla kown, now aia krungchakuüa dow nami pren kowi natawi ka dawngthawnguan kown.25Kanan pren kowi kowh lawngrawi kowi kawmat dow Amalekuüa hai Kananuüa uowi reng tak chekhai. Naiawng rakowi tharau khe mih kung prakowi plan büah hanow sata Rik pra kowh mangla mih tiama iawng süngrüp süngkangma kowi kowkowi büa diah,” pakhai.26Nami kung kowi CHAKRAMANG tek pe Mosi hai Arawn iüah mih,27“Israeluüa kamche ang mih laiklow ang ta chekhai. Mün khowt tak chow mami maru ngak chenchapuüa nakamche ang kown?28Israeluüa kowi maiawng kowtek pe iüa diah: Ang sak lüklau hown ang tek khowk, ang dow CHAKRAMANG chekhai. Enni tekah iawng enni luk kowi ang nachang kown.29Enni pungmadawng kowi kowh pirmi ning chih mih hownia nami luk kowi kowh rüala khowk mih maru maten dow mami süngrüp süngkangma kowi nakowng bowk kown. Kamche ang büa khai rakowi amatni kowi dow ang nakowngta bowk kown.30Enni nauowiah kownkow ang kham enni mih pren kowi Jefune kowh chapa Kaleb hai Nun kowh chapa Josua iüah klen kowi dow miapaw natawi ia kup kown nadowi.31Nami klen kowi enni kowh chauüa kowi chowtaih enni nuata khowk mih Kanan pren kowi ang nakowpawla kown. Enni kowh chauüa lawnguan maiawng enni tek khai, ‘Kanan prenchakuüa dow narupta anging chauüa kown chekhai,’ pakhai.32Enni kowh uak dow mami süngrüp süngkangma kowi natakuak hüah kown.33Enni chowng kowi kowh maru kowng bowk dowi mowr enni kowh chauüa mami süngrüp süngkangma kowi nakrawi mang panglang kown. Kaah sakowm iawng enni uowi dowi rakowi 40 ning mowr mami süngrüp süngkangma kowi enni kowh chauüa nakham ngare kown.34Kowkrawi kumü Kanan pren khe 40 ni lakke büah khai. Nami pani mih kowi paning chi ang nadowk enni kown. Enni kowh angak rakowi 40 ning mowr enni nakham ngare kown. Nakhowk khe chiang kingküa ang now tawng iawng chow own mih enni natuk kown.35Mami angakma mih chenchapuüa kowi kowh kingküa ang miuüa dow mami süngrüp süngkangma kowi nakowng bowk kown. Ang CHAKRAMANG mami laiklow ang tek khowk,” pakhai.36Kowkrawi kumü Kanan pren kownkow Mosi chinah mih dumiowuüa uang plan hanow pathum mih dow uang küa dai khai, now Mosi kowi nakamcheah kownkow maru kawmuüa kowi chükah büah khai.37Naiawng küa dai miuüa dow CHAKRAMANG pur kowi makowng hawi hown kowng bowk khai.38Nun kowh chapa Josua hai Jefune kowh chapa Kaleb iüah chowtaih ta sing khai.39Mosi mih CHAKRAMANG kowh laiklow maten Israeluüa kowi uang phuang pe khai. Nami satang tata hanow maru kawmuüa dow sak piak khai bowt.40Now auai rau murpa amatni dow Kanan pren kowi kowh hungma mawngma süng prakowi awr mang kownkow kamrüt khai bowt. Nakhowk khe Mosi kowi tek pe büah mih, “Mow, anging tarü mih chowbowt chaw. Anging changta angak khai nowm. Nachenganchepaw kawmat dow CHAKRAMANG kham a-i mih pren prakowi anging tarü mih chowbowt,” pakhai.41Nakhowk khe Mosi tek pe mih, “Süngrüp süngkangma prakowi naplan kownkow CHAKRAMANG pe enni ana mih tawngplawng kowchow enni chün dowi? Enni kowh nami lup dow nachawn kown nadowi.42CHAKRAMANG tawi uowila enni dowi chekhai. Naiawng rakowi hangkow tarü büa diah. Ransu-uüa rut kowi enni nasum kown taih.43Amalekuüa hai Kananuüa hown enni nacham takrum now amatni dow nadowk enni tasen kown towbowt. CHAKRAMANG kowi enni powtta khai bowt rakowi aia dow tawi uowila enni dowi bowt. Naiawng rakowi tasen hown enni nacham kowng kown taih,” pape khai.44Nachenganchepaw amatni dow Mosi hai sangbowk laitawm tawkpla mih towla hüah now hungma mawngma süng prakowi awr mang büah khai.45Israeluüa kowi khita hanow hungma mawngma süng kowi kowh uowi mih Amalekuüa hai Kananuüa dow tadowk tasen kownkow uang dowm khai, now amatni dow Hawrma marow mowr Israeluüa kowi kawikrawiah khai.
The Seed Company