Tarüa11
1Israeluüa dow amatni kawmkrat mih lawnguan kowi CHAKRAMANG tut-e awr kamche khai. Naiawng Israeluüa awr kamcheah mih tata hanow CHAKRAMANG dow lainowmma kunmarau khai. Now aia dow Israeluüa pungmadawng kowi iu chin pe maih khai. Nami maih dow Israeluüa kowh tangbung khup rah kharia pra kowh maru-uüa kowi kamla ne khai.2Nakhowk khe maru kawmuüa dow Mosi tut-e kar se kowlü khowng khai. Now nami lawnguan kowi CHAKRAMANG tut-e Mosi awr phowk pe hanow nami maih dow mit khai.3Nami arah kowi dow CHAKRAMANG hownia kowh maih Israeluüa pungmadawng kowi uang kam khai rakowi nami arah ming dow Tebera pahai Mosi chap pe khai. (Tebera pami dow “Maih kamah mih arah” pami chekhai).4Israeluüa pungmadawng kowi kowh tawi uowi mih akeng chenchapuüa dow nacha chaknga kown mih nau büah khai. Now Israeluüa paw Mosi tut-e plan kamche khai iawk. Amatni tek pe mih, “Pe anging chaknga!5Aigupta pren kowi aiawng hown nau mowr chi anging ka cha dam kan mih dow anging ka tuak khai. Nami klen kowi sawsa uih, fre uih, iowu rik, iowu kaw hai iowu ram ün anging ka cha mih paw anging ka tuak khai.6Nachenganchepaw kawmat dow anging kowh kür khowk bowk khowk; manna kawm klen kowi tawngpaw anging khi dowi chekhai,” pakhai.7(Manna kawm dow bakkawr nuk powm iawng, now arawng dow akawma chekhai.8Iak-e nang uang kla khe nami manna dow amatni kowh tangbung khup rah kowi uang tawi dowh reng chekhai. Now maru kawmuüa dow naiawngün krawi lümah hanow sum kowi hai aküara kowi cham tungah hai cham küaah khai. Naiawngün dow atung ia chepaw, aküa ia chepaw puh kowi butah now thawpla kawm büah khai. Naiawngün kawm chak sowr dow kanrawn sau hown kowh ngaiah mih kawmpah chak sowr iawng chekhai).10Chowlowkkow kimchakuüa kowh tangbung plawt re-e Israeluüa kamcheah mih Mosi ta khai. Nami tata hanow CHAKRAMANG dow lainowmma kunmarau khai, now Mosi paw sak-hiah khai.11Mosi tek pe CHAKRAMANG mih, “CHAKRAMANG, en kowh nar kowi tawngplawng kowchow en tuk peah akrat khai? En sak-ih dowi mih lup tawng chow ang changta khai? Tawngplawng kowchow maiawngün maru kawmuüa kowh kurdik en tuk pe ang khai?12Maiawngün maru-uüa kowi ang matia thawpah mih nadowi; amatni dow ang muah mih paw nadowi, now ang penah mih paw nadowi chekhai. Nachenganchepaw achah kowi a-u paiah iawng amatni kowi naming nakhetah kown mih tawngplawng kowchow en tuk tek ang khai? Amatni pipu-uüa kowi napeah pren kown mih en khamah khai. Nachenganchepaw tawngplawng kowchow amatni kowi nakowpawla kown mih kurdik en tuk pe ang khai?13Amatni dow ‘Pe anging chaknga’ pahai kamche ang khai. Maiawngün maru-uüa vüi tawng kowi chow ang cham ka pe chaknga kown?14Maiawngün maru-uüa kowi naming nakhet kown mih kurdik ang lowk iachow dow ia kur dowi chekhai! Mami kurdik dow lainowmma dih khai!15Maiawng che en chang ang reng kown hanow kawmat mat saita ang diah! En che saksing sana ang khai hanow maiawng hauang towk ang kawm tham bowt!” pakhai.16CHAKRAMANG tek pe Mosi mih, “Israeluüa pungmadawng kowi kowh ringkawra uowima mih aluchowuüa kowi ang tut-e uang pawla 70 ia diah. Now taklowp taklangra te re-e amatni kowi dow en hown katsang pe iowngah diah.17Nami re-e dow ang nauang dowm hanow en hown ang nauang taklang kown. Now ang pe en mih lümla amatni kowi paw ang napela ne kown. Nahanow amatni dow maru-uüa kowi naming nakhet kown mih kurdik natawi khowng kur en kown towbowt. Now maru-uüa kowh kurdik en lowk iachow akur takla dowi bowt tham.18“Maru-uüa kowi maiawng kowtek pe diah: Tharau kowh vüi kowmatia kowi tachim tasai büa diah. Tharau khe dow enni naka cha chaknga kown towbowt. Tawngplawng kowchow panow chaknga rakowi CHAKRAMANG tut-e enni awr kar khai. Enni dow maiawng awr kar khai, ‘Kawmat kowh lak-e Aigupta pren kowi uowi khe lang iung chowdiah. Aigupta pren hownia tawngplawng kowchow anging uang tuk lawt khai?’ padow aia tut-e enni awr tek khai. Naiawng enni awr kamcheah mih dow CHAKRAMANG ta khowk chekhai. Naiawng rakowi kawmat dow CHAKRAMANG nape enni chaknga kown. Nami chaknga enni nacha reng kown takla.19Nami chaknga dow panichow, pre nichow, tanga nichow, hamüt nichow, pirmi nichow enni nacha kown mih nadowi;20nami dow pala mowr enni nacha kown. Nakhowk khe dow chaknga du lai bowt rakowi enni nadua bowt kown. Enni pungmadawng kowi kowh tawi uowi mih CHAKRAMANG kowi enni nuaah khai rakowi naiawng aia nachang enni kown mih chekhai,” pakhai.21Nakhowk khe Mosi tek pe CHAKRAMANG mih, “Tasen uang mih kachakuüa nget khowm padow ang tut-e uowi 600,000 ia chekhai. Nachenganchepaw maru kawmuüa kowi pala mowr en nape chaah chaknga kown mih en tek khai!22Amatni kowh chia hai ruapur maten ngenta bowk chepaw nalawk büah kown nadowi! Sata kowi kowh dam maten uang pawla bowk chepaw nalawk büah kown nadowi!” pape khai.23CHAKRAMANG tek pe Mosi mih, “CHAKRAMANG nowng changah dowi mih lup uowi khai bow? Ang laiklow ching chow ching dowi chow mih khaleng dow en nakhi bowt kown!” pakhai.24Now Mosi dow taklowp taklangra te hownia lawt hanow aia kowi kowh CHAKRAMANG tek pe mih srui prang kowi kowh maru kawmuüa kowi kowtek pe khai. Aia dow Israeluüa pungmadawng hownia lawngtang aluchowuüa kowi ruiah 70 ia khai, now naiawngünuüa kowi dow taklowp taklangra te tapat lut pe iowngah khai.25Nakhowk khe CHAKRAMANG dow uangnim dawng kowi uang dowm hanow Mosi hown uang taklang khai. Now Mosi kowi kowh aia peah mih lümla dow lawngtang aluchowuüa kowi paw aia pela ne khai. Now amatni luk kowi lümla uang ting hanow amatni dow risi iawng tek lai khai. Nachenganchepaw nami kung kowi dow risi iawng hai katpaw tek lai büah dowi bowt chekhai.26Eldad hai Medad iüah paw Mosi ruiah mih lawngtang aluchowuüa 70 ia pungmadawng kowi kowh maru chekhai. Taklowp taklangra te re-e akeng mih aluchowuüa takua talawm khe amatchi dow tangbung khup rah kowi ta uowi phülü khai. Nachenganchepaw nami lümla dow amatchi luk kowi paw uang uowi khai. Naiawng rakowi amatchi paw tangbung khup rah kowi risi iawng tek lai khai.27Now klanguüa lowk ia dow kowiowmah hanow Mosi kowi kowtek pe mih, “Eldad hai Medad iüah tangbung khup rah kowi risi iawng tek lai khai,” pakhai.28Nakhowk khe Nun kowh chapa Josua tek pe Mosi mih, “Aw ang kowh chakramang, kowiüah kowi hangta diah,” pape khai. Josua dow uown klanguüa hownia Mosi kowh akhowng mih chekhai.29Mosi tek pe Josua mih, “Maru kawmuüa ringkaw ang dowi bowt tham pami kowi en tawi taprüala ang bow? CHAKRAMANG kowh maru maten naphaw risi kown mih hai aia maru-uüa luk kowi aia kowh lümla nauowi kown mih ang nau,” pape khai.30Nami kung kowi Mosi hai Israel lawngtang aluchowuüa dow tangbung khup rah kowi plan büah khai bowt.31Akung kowi CHAKRAMANG dow uang chin pe li khai. Nami li dow sata hownia uang rownla uamuk khai. Naiawngün uamuk dow tangbung khup rah kowi tapat lut pani mang rawng mowr krawi hing tauet khai. Naiawngün dow atat pre muk mowr krawng kowi awr talüp khai.32Nami ni kowi maru-uüa dow ni chut uar prowt krawi kua uamuk büah khai. Nami klen kowi auai ni paw ni chut krawi kua uamuk büah khai. Amatni dow lowk ia kowi e pra 1,800 set chi kuala khai. Now naiawngün uamuk nga dow tangbung khup rah kowi tapat lut keuah büah khai.33Nachenganchepaw nami uamuk nga cha kowh ia iawn dowi krowngchow tak khe CHAKRAMANG dow amatni luk kowi kunmarauah khai. Aia dow amatni pungmadawng kowi makowng hawi akraingma uang chin pe khai, now amatni dow lainowmma kowng khai.34Naiawng rakowi nami arah ming dow Kibrawt-Hatava pahai chap pe khai. (Kibrawt-Hatava pami dow “Lawphama miuüa kowh tadupra” pami chekhai). Tawngplawng kowchow panow nami arah kowi dow lawphama miuüa kowi dupah khai.35Nami kung kowi dow Israeluüa mih Kibrawt-Hatava hownia lawt hanow Hazerawt marow kowi kowuowi büah khai.
The Seed Company