Mika5
1Aw Jerusalem! En kowh siphaiuüa kowi kuaah lawmah diah;ransu-uüa uang rum a-i khowk.Ransu-uüa dow Israel pren kruitown mih ngeupa kowi müa hown bawpah khai.2Nachenganchepaw CHAKRAMANG tek mih,“Aw Bethlehem-Efrat kua,Juda pren kowi en lang sowm chepawen hownia ang vüi mang nauang lawt lowk ia kown;Aia dow alai hownia kowh uowi mih chekhai,” pakhai.3Naiawng rakowi masiuüa ki penta chah dowi mowr dow CHAKRAMANG mih Israeluüa kowi ransu-uüa rut kowi naap-ah kown;ki penta chah kung kowi dow cham takhang miuüa mih nauang plan kown,now amatni pren kowi kowh tainau-uüa hown nauang tabawng büah kown.4Nami mang dow ruapur thing miuüa iawngaia maru-uüa kowi CHAKRAMANG Thurai kür hown nakruitownah kown.Aia dow CHAKRAMANG aia kowh Thurai kraingra hown aia maru-uüa kowi naming nakhetah kown,amatni dow athaulangma nauowi bowt kown.Tawngplawng kowchow panow nami mang dow akri kraingma paminami khin khe palusama kowi naphuangah bowt kown chekhai.5Nahanow aia dow nauang pawla takingra kown.Asuriauüa uang sen a-i pren hanowa-i kowh tap khawk hown uang thua a-i khe,amatni kowi nasenah kownkow kruitown mih ranit ia chepawaluchow raiat ia chepaw nape iowngah kown.6Amatni dow tasen müa rutchün khawkleng hown Asuria hai Nimrud-uüa pren namingkhet kown;Asuriauüa uang sen a-i kowh a-i pren sünghi uang chawp hanow nami mang dow nauang lawng a-i kown.7Chenchapuüa pungmadawng kowi Israel maru ta lat miuüa dow maru kowi naneplawng nesak kown nadowi;amatni dow Thurai kowi chowtaih naneplawng nesak kown.Amatni dow maru vüi nachowng prasira kown.8Chenchapuüa pungmadawng kowi Jakawb krungchak ta lat miuüa dowkaurawng uaramchak dawng kowi kowh krangsila iawng naphaw kown,amatni dow ruapur hawmh dawng kowi kowh krangsila powrchow iawng naown kown.Nami krangsi dow ruapur hawmh dawng kowi krawi len khe krawi mak naklak reng chekhai;aia rut hownia dow miapaw uang nowng lawngah dowi chekhai.9Israel maru-uüa dow ransu-uüa luk kowi naawng kown,now amatni kowh ransu-uüa dow napiak bowk kown.10CHAKRAMANG Thurai tek mih, “Aw Israel.Nami khin khe en hownia en kowh kawrnga ün ang nachumta en kown,now en kowh kawrnga kari ün ang napiakta en kown.11En pren kowi kowh marow ün ang napiakta en kown,now en kowh akhawtma mih kangchawngra kim maten ang napiakta en kown.12En kowh maiaklese tukra ang napiakta en kown,now en tut-e mih mantan chang miuüa nauowi kown nadowi bowt.13En thawpah mih arup hai en chupah mih arup maten ang napiakta en kown;rut hown kowh en thawpah mih uanh kowi en chupah kown nadowi bowt.14En phuchuaah mih Asera limpu maten ang nabüita en hanowen kowh marow ün ang napiakta en kown.15Ang laiklow chün dowi mih chenchapuüa luk kowikunmarauma hown ang nasat pe aklai kown,” pakhai.
The Seed Company