Mika4
1Khin chur khe dow CHAKRAMANG Thurai chup kim hungh kowi nalang peah ringkawra kown;nami hungh kowi dow akeng mih hungh maten lak-e nalang lowngah kown,now chenchap maten tui hawr iawng nami prakowi nauang hawr iualua kown.2Chenchap ahuma nauang hanow, “Chu! CHAKRAMANG hungh kowi a-i kowpün lah,chu, Israel kowh Thurai chup kim kowi a-i kowkowi lah.Aia dow aia tiama kowi a-i namangla kownkow aia tiama lawnguan natüngsang a-i kown,” napa büah kown.Tawngplawng kowchow panow CHAKRAMANG mih Zaiawn hungh hownia nape ana kown,now Jerusalem marow hownia aia kowh laiklow mih nauang lawt kown chekhai.3Aia dow chenchapuüa pungmadawng kowi nachet pe tara kown,now alakma kowi kowh akürma mih chenchapuüa hown taking tasangra nathawp pe kown.Amatni dow amatni kowh saidawng naphengah hanow nathawpla laithawn tim bowt kown,now amatni kowh reh dow nathawpla tangchen büah bowt kown.Chenchapuüa mih akeng chenchap kowi nasen kownkow napar saidawng kown nadowi bowt,now cham tasen kown mih paw natatüng tasang büah kown nadowi bowt.4Maru maten mih athaulangma nauowi bowt kown,chowlowkkow grep tut hai uidut singh tut kowi nachowm bowt kown,Amatni kowi dow miapaw natüng pe kramra kown nadowi bowt.Tawngplawng kowchow panow lang kri lang kraing mih CHAKRAMANG mami laiklow tek khowk.5Chenchap maten amatni chowlowkkow thuraiuüa low iawng uowi chepawanging tarapchedow chowngchowng saksakma anging kowh CHAKRAMANG Thurai low iawng nauowi reng kown.6CHAKRAMANG Thurai tek mih,“Nami ni khe dow tabai miuüa hown,akeng pren kowi kowh cham takhang miuüa hown,ang pe ngareah miuüa kowi arasang ang natowah bowt kown.7Tabai miuüa kowi ang natow pe asak reng kown,alakma kowi prütta khowk miuüa kowi akürma mih chenchap ang nathawpah kown.Ang CHAKRAMANG, nami ni hownia dow chowngchowng saksakmaJerusalem kowi amatni luk kowi ang nachowm mang bowt kown,” pakhai.8Aw Jerusalem!En dow ruapur thing miuüa kowh kimkrowng iawng,en dow Zaiawn chama kowh tap kri chekhai.Alai kowh mangra naplan pe en iawk kown;mang dow en lak kowi nauowi iawk bowt kown.9Tawngplawng kowchow atün atünma en tuk kar khai?En kowh mang uowi nadowi chow?Tawng rakowi chow masiuüa penchow kimuowi mu rau iawng arau tuk dowk en khai?En kowh prengia pek mih uowi nadowi chow?10Aw Jerusalem maru-uüa, kawmat towla marow nowdowm akuangma kowi en nacham uowi kown takla.Naiawng rakowi masiuüa kimuowi mu rau ngare iawng arau hown nguk diah,Alakma kowi kowh Babel pren kowi en nacham takhang kown.Tawkchedow nakowi en naka lawngra kown;CHAKRAMANG Thurai mih nakowi dow en ransu-uüa rut hownia nalawng en kown.11Nachenganchepaw kawmat mih kingküa en kownkowchenchapuüa akawmma takua khai bowt.Amatni dow, “Pacham tapiak lah.Chu, Jerusalem kowh akrat pusara mü hanow i piaw lah,” padow tatek büah khai.12Nachenganchepaw amatni dow CHAKRAMANG kowh saktuak tuk dowi,amatni dow CHAKRAMANG kowh kamrütra tuk dowi chekhai.Cha kowi thuaah kownkow chengah reng chekhai,nami iawng amatni kowi aia kuaah mih pami tuk büah dowi.13CHAKRAMANG tek mih, “Aw Jerusalem maru-uüa,Akeng chenchapuüa kowi nowng thuala kownkowlawngha iawng anang khawtma mih chiala iawng ang nape enni kür kown;kri iawng akeh akhawtma mih chiala iawng ang nape enni kür kown.Tasenra hownia kowh enni cham kaah mih uanh maten enni nauang ap ang kown,now dawngthawnguan srui palusama kowh CHAKRAMANG kowi enni nauang pe kown,” pakhai.
The Seed Company