Mika3
1Now ang tek mih,“Jakawb kowh aluchowuüa hai Israel pren kruitown miuüa low, sünta!Tara chet anowmma mih lawnguan kowi enni tuk kown takla.2Enni dow lup iung kowi suiah hanow lup ngak kowi lang nauah khai;Enni kowh angak krang dow maiawng chekhai:Ang maru-uüa buk kowi kowh pik hai hut hownia nga mih enni klawngah khai.3Enni mih ang maru-uüa kowh nga chaah khai,amatni kowh pik kleuta pe nowahut alang ün adung adungma enni klowkta pe khai;puh kowi kowh chaknga iawng dow asek asekma enni tawpah khai.4Enni aluchowuüa mih chang lup ngak khai;naiawng rakowi CHAKRAMANG tut-e enni nanguk nakar kown mih khin uang towm khowk.Nachenganchepaw aia dow naklang enni kown nadowi;nami khin khe aia dow nacham dangta enni kown,” pakhai.5CHAKRAMANG tek mih maiawng:“Enni risi iuauüa dow ang maru-uüa kowi kuanah khai.Nowng pe enni chakkham miuüa kowi dow Thurai pe enni iungra kown pahai enni tekla pe khai,now nowng pe enni chakkham dowi miuüa kowi dow Thurai nape enni ngakra kown pahai enni tekla pe khai.6Naiawng rakowi enni risi iuauüa vüi uar nauang ting kown chowbowt,pur prakowi tawng chow naown kown mih mukmang enni nakhi kown nadowi bowt.Enni vüi aiiu uang ting kown chowbowt;enni mü hawra chepaw tawngpaw enni nowng tek kown nadowi bowt.Enni vüi sat nakup bowt kown,now uar nauang iiu bowt kown,” pakhai.7Naiawng rakowi risiuüa dow narukrai kown,hawra sarauüa dow naka ringkawra kown nadowi bowt.Amatni kowi dow Thurai naklangah kown nadowi bowt.Naiawng rakowi amatni dow napetta lumowr kown.8Nachenganchepaw CHAKRAMANG lümla pe ang mih kür hown,anowmma mih tara ang chet khai,sakkraingra atekma hown ang uowi khai.Jakawb kowi aia kowh angak ang phowk pe khai,Israel kowi aia kowh aprek ang phuang pe khai.9Jakawb krungchak aluchowuüa low, sünta büa diah,now Israel pren kruitown miuüa low, sünta büa diah.Enni dow tara chet anowmma mih kowi nüah dowi chekhai,now tiama atengma mih maten akhawnma enni changah khai.10Zaiawn marow kowi maru vi hown enni changah khai,Jerusalem marow kowi angak hown enni thawpah khai.11Enni aluchowuüa dow tara chetra kowi cha büm khai,enni uamowuüa dow tüngsang mih kha enni paw khai,now enni risiuüa dow lai phuang sung paw tangka khai.Nachenganchepaw CHAKRAMANG khowngra ka kown mih sakowm hai enni tek mih,“Anging tut-e CHAKRAMANG uowi dowi pabow?Tawng phih paw anging luk kowi nauang ting kown nadowi,” pakhai.12Tawkchedow Jerusalem marow kowi laih thawn iawng nathawnah kown.Nami marow dow mawngchawng kuakra nauang own kown.Nakowi kowh Thurai chup kim chimsaima mih hungh dow ruih mung hown natamung hüah kown.Naiawngün nauang own kown mih dow enni rakowi chekhai.
The Seed Company