Mika1
1Juda pren kowi Jotham, Ahaz hai Hezekia büah chowm mang mih khin khe Mawreset kuachak Mika tut-e CHAKRAMANG laiklow uang ting khai. Nami laiklow dow Samari hown Jerusalem marow lawnguan kowi chekhai.2Chenchapuüa low, enni bowkbowk sünta büa diah!Krawng hai alak kowi kowh uowi mih maten pe ching büa diah!CHAKRAMANG Thurai mih kingküa enni khai,CHAKRAMANG Thurai mih mukuang kowi kowh aia kim chimsaima howniaenni kowi kingküa hown nathuak saksi kown.3Mü diah, CHAKRAMANG dow aia uowi rah hownia uang kown chowbowt.Aia dow uangah now lusa kowi kowh arah kroma mih kowi kowh chupiiara maten luk kowi nauang chowm mang kown.4Maih kowi iawn maih chawr mih iawng dow hungma mawngma nachawr kown,now arema kowi tui hawr mih iawng dow uang iu chan hanow lawngrawi mih natathia kown.5Jakawb chuprek chaprek Israeluüa kowh aprek rakowi maiawngün mih naphaw kown chowbowt.Israel pren kowi kowh aprek mia rakowi chow? Samari marow nadowi bow?Juda pren kowi kowh akroma mih arup chupra ün matawng kowi chow? Jerusalem marow kowi nadowi bow?6Naiawng rakowi CHAKRAMANG tek mih,“Samari marow dow ang napiakta kown,nami marow dow mawngchawng kuakra dowm ang nachangla kown.Nami dow grep ruih chowkra naown kown.Marow kowi kowh huaklu ün dow lawngrawi kowi ang cham kuakta kown,Marow kowi kowh kimchüng maten paw natim bowk kown.7Samari marow kowi kowh arup ün dow ang nadita pe nak kown,Thurai chup kim kowi kowh uanh ün dow chawkkrawmauüa kramah mih chekhai.Naiawng rakowi naiawngün uanh maten dow maih hown ang natikah kown.Nakowi kowh arup maten dow ang napiakta pe bowk kown,nakowi kowh arup, kuh hai tai dow chawkkrawmauüa hown kowh kaah mih chekhai.Naiawng rakowi akeng kowi kowh chawkkrawma vüi ransu-uüa nasunah iawk kown,” pakhai.8Naiawng rakowi ang nanguk ang nakar kown.Tatawng tauat dowi kowi tengiow tengklaima ang nalen kown.Kui au klow iawng dow ang nakar kown,pawngli nguk klow iawng dow ang nanguk kown.9Tawngplawng kowchow panow Samari marow kowh ma dow nowng rawah dowi bowt chekhai;nami dow Juda pren kowi uang towm khai bowt,now Jerusalem marow kowi kowh ang maru-uüa tut-e pat khowk uang towm.10Judauüa low, mami laiklow Gath marow kowi kowh enni ransu-uüa kowi hangkow tek pe diah.Kar paw mapaw hangkow kar büa diah.Enni taprüa taiia mih natüngla kownkowa-i maru-uüa uowi rah Bet-Le-Afra kowi kowh dinchow dawng kowi phai kowtaiüa büa diah.11Safir kowi kowh maru-uüa low,tengiow tengklaima hown tawmpa rukrai ransu-uüa kung tawi büa diah.Zanan kowi kowh uowi miuüa dow ransu-uüa umta lut rakowi uang nowng lawt dowi bowt.Bet-Ezel kowi kowh uowi miuüa dow kar büah nguk büah khai;amatni kowi paw ransu-uüa senah khai rakowi tawi nowng khowng enni dowi bowt.12CHAKRAMANG hownia kowh piakra dow Jerusalem tapplawt kowi uang towm khai bowt.Naiawng rakowi Maruth kowi uowi miuüa dow plawplaira nakala kownkow kaneuma hawt chawng büah khai.13Lakhis kowi kowh uowi mih maru-uüa low,enni napowtla kown mih kawrnga kari dow kawrnga kowi asima tapah büa diah.Israeluüa kowh aprek uang uown towm mih dow enni hownia chekhai.Jerusalem maru-uüa kowi angak tia pra pawla mih dow enni chowtaih.14Juda maru-uüa dow Mawresheth-Gath kowi kowh maru-uüa kowi nakowchangah tapraira chibai kown.Israel manguüa dow Azip marow luk kowi naneplawng nesak kown nadowi bowt.15Maresa kowi kowh uowi miuüa low,CHAKRAMANG mih nauang chin enni maru lowk ia kown.Nami maru dow uang sen enni hanow enni kowh marow mih napowngta enni kown;Israeluüa kowh aluchowuüa maten dow Adulam kowi kowh puk kowi nacham tapet kown.16Enni lang sakrauah mih ngeuüa hawmh kowi alakma kowi nacham pawla kown chowbowt,now amatni kowi dow nar kowi natowah kown chowbowt.Naiawng rakowi nauowila uiting uangtak kownkow khaita sam büa diah;khang hawm se kar hai nguk hown uowi büa diah.
The Seed Company