Malaki3
1Mukuang siphaiuüa kowh CHAKRAMANG tek mih, “Sünta, ang kowh satang phowng mih kowi ang uang chin enni khowk; aia dow ang dowi rawn nauang rik kamrüt tiama kown. Nami kung kowi dow enni hawt chawngah reng mih CHAKRAMANG mih mingmang dowi khe aia chup kim kowi nauang kown. Süngürma hown enni hawt chawngah mih satang phowng mih dow CHAKRAMANG hown enni tatowah mih sangbowk laitawm nauang phuang kownkow uang tarü thüm khowk.2“Tawkche CHAKRAMANG uang mih ni khe dow miapaw naia kham kown nadowi, now aia pur kowi miapaw nowng iowng kown nadowi. Tawngplawng kowchow panow aia dow chaingla tai mih maih hai chula uan mih dua iawng naown kown chekhai.3Tai kowi achangma nathawpah kownkow chawr tai mih maru iawng aia dow nauang kown. Aia dow Leviuüa kowi nauang chimsaiah kown, now amatni kowi dow kuh hai tai kowi achangma changah iawng aia nachangah kown. Nami kung kowi dow amatni mih anowmma mih saktuak hown CHAKRAMANG vüi nachang phuchua pawi bowt kown.4Nakhowk khe dow auown khe kowh iawng Juda prenchakuüa hai Jerusalem marowchakuüa kowh phuchua uanh mih CHAKRAMANG nasak-ih pe bowt kown.5“Nakhowk khe mih nachet tara kownkow enni tut-e ang nauang kown. Nami khin khe maiaklese sarauüa, iang chang miuüa, dai lai saksi thuak miuüa, sukkri kowi miuüa kowi kuan miuüa, mamaimowuüa, saratchowuüa kowi chang nowng miuüa hai prenlang maru-uüa kowi chet pe tara nowm dowi miuüa maten kowi alenma ang nakingküaah kown. Tawngplawng kowchow panow amatni dow kram ang dowi chekhai.6“Ang dow CHAKRAMANG, ang dow katpaw taklowi dowi chekhai. Naiawng rakowi Jakawb krungchakuüa low, kawmat pat paw enni piak dowi tak chekhai.7Ang kowh ari aiang maten hownia enni süt mih hai ang kowh ari aiang enni chün dowi mih enni kowh pipu-uüa chowng hownia chowbowt. Nachenganchepaw ang prakowi che enni uang plan hanow ang paw enni prakowi nauang plan iawk kown. Tawkchedow enni tek mih, ‘Tawng iawng chow anging nauang planah kown?’ pakhai.8Lusa maru mih Thurai kowi nakuan kown mih taka khai bow? Nachenganchepaw kawmat dow enni kuan ang khai. Enni tek mih, ‘Tawng iawng chow anging kuan en?’ pakhai. Enni kuan ang mih dow hamüt bak kowi pabak nape ang kown mih hai uanpek kowi chekhai.9Enni dow ka piati khowk chekhai; tawngplawng kowchow panow enni pachenma kuan ang khai.10Ang kim kowi chakkham naia uowila reng kownkow enni kowh hamüt bak kowi pabak mih uanh maten anungra kowi uang pawla büa diah. Enni che uang pawla hanow ang mukuang siphaiuüa kowh CHAKRAMANG, mukuang kimplawt maten ang nauow enni kown, now enni lakkeah mih klen kowi achütma ang nape enni prasi kown. Nami lawnguan kowi enni che owm dowi hanow chaing ang büa diah.11Enni kowh luprak napiakta enni dowi kownkow krawi piak luprak mih chap hai rawka maten kowi ang nahangah kown. Nami klen kowi enni kowh grep krum kowi kowh grep ruih hownia paw auih naprua kown nadowi.12Nakhowk khe dow chenchapuüa maten mih prasira uowima padow natek enni kown. Tawngplawng kowchow panow enni kowh pren dow apiaw apama naown bowt kown. Mami laiklow dow ang mukuang siphaiuüa kowh CHAKRAMANG tek khowk,” pakhai.13CHAKRAMANG plan tek iawk mih, “Enni dow kingküala ang mih laiklow akhawt akhawtma enni tek ang reng chekhai. Tawkche enni tek mih, ‘Tawng iawng chow kingküala en mih laiklow anging tek en?’ pakhai.14Enni tek mih, ‘Chang Thurai lup mih aiawnglowma taih. Aia rirow iawng chang lup mih hai changta angak rakowi tarip kowh kar hai nguk hown mukuang siphaiuüa kowh CHAKRAMANG pur kowi uowi mih tawngpaw mrawk dowi.15Kawmat hownia dow chang bawri miuüa kowi phai prasira uowima pahai a-i tek pe diah sik. Chang lup ngak miuüa dow iuksown rereng; amatni dow Thurai kowi chaingah chepaw tawngpaw own dowi chekhai,’ pakhai,” pape khai.16Nakhowk khe CHAKRAMANG kowi ringkawma hown kram miuüa dow lowkkowlowk lang talawp khai. Nami laiklow dow CHAKRAMANG mih pe ching se tawi sünta khai. Now CHAKRAMANG kowi ringkawma hown kram mih hai aia lawnguan kowi abüpma tuak miuüa kowh ming mih aia pur kowi kowh charam tua kowi rui pe khai.17Amatni lawnguan kowi mukuang siphaiuüa kowh CHAKRAMANG tek mih, “Tara chetra ni khe amatni dow ang kowh amülüng mih dawngthawnguan nachowng kown; amatni dow ang kowh maru chowtaih nachowng kown. Amatni kowi dow chün lai mih chah kowi u-pa sanaah mih iawng ang nasanaah kown.18Nakhowk khe dow maru iung hai maru ngak, now chang ang lup mih hai chang ang lup dowi mih kowi tawng iawng chow ang nakraah kown mih enni nakhi bowt kown,” pakhai.
The Seed Company