Malaki2
1Lang kri lang kraing mih CHAKRAMANG tek mih, “Aw uamowuüa, mami dow enni nauowi kaneu kown mih laiklow chekhai.2Enni che ang laiklow chün dowi, now ang kowh ringkawra prakowi paw pe ching dowi hanow enni luk kowi ang nauang pawla enni piati kown. Enni kaah mih prasira maten kowi ang nape enni piati kown. Nami piati dow kawmat ang peta enni khowk. Tawngplawng kowchow panow nauowi kaneu kownkow ang tek enni mih kowi enni sünta dowi chekhai.3Enni rakowi enni kowh krungchakuüa kowi ang naripah kown. Enni changla phuchua pawi mih tawncher kih enni kowh lumowr kowi ang naplik enni kown, now nami kih hailawm alakma kowi ang naprütta enni kown.4“Enni nauowi kaneu kownkow ang tek enni khai. Nami dow Levi krungchakuüa hown ang towta sangbowk laitawm mih naia townla reng kownkow chekhai pami tukah büah reng diah.5Leviuüa hown ang tatowah mih sangbowk laitawm dow nasingla kown mih hai naiungla kown mih müa chekhai. Nami sangbowk laitawm dow amatni kowi ang peta khowk chekhai. Ang peah sangbowk laitawm mih dow amatni pacham ringkaw ang lah pakowh chekhai. Amatni dow ringkaw hai kram ang reng chowdiah.6Amatni nawr kowi dow achingma mih tüngsangra uowi reng chowdiah. Nami tüngsangra kowi dow mapaw dai lai uowi dowi chowdiah. Amatni dow anowmma hai thaulangma ang hown taiua mang reng chowdiah, now maru sangrum kowi angak hownia uang pe planah reng chowdiah.7Thurai lawnguan kowi kowh tüngsangra natamata dowi kownkow uamowuüa nakrawi tüngsang kown takla chowdiah. Now maru kawmuüa paw Thurai laiklow natukla kownkow uamowuüa tut-e kowkowi takla chowdiah. Tawngplawng kowchow panow uamowuüa dow mukuang siphaiuüa kowh CHAKRAMANG kowh satang phowng mih chekhai.8Nachenganchepaw enni dow tiama nowm hownia süt khai bowt. Naiawng rakowi enni kowh tüngsangra hownia angak prakowi maru akawmma mang khowk chekhai. Naiawng hown Levi chenchap hown ang tatowah mih sangbowk laitawm dow enni piakta khai. Mami laiklow dow ang mukuang siphaiuüa kowh CHAKRAMANG tek khowk.9Enni mih ang tiama kowi mang dowi chekhai. Ang tiama kowi enni namang lak dow maru kawmuüa kowi ang kowh ari aiang arisang enni tüngsangah dowi chekhai. Naiawng rakowi maru maten pur kowi prawng renra hai rensi küakau ang changla enni khai,” pakhai.10A-i kowh pa lowk iachow taih nadowi bow? Thawp a-i mih Thurai paw lowk iachow taih nadowi bow? Nahanow tawngplawng kowchow lowkkowlowk a-i takuan khai? Tawngplawng kowchow a-i pipu-uüa vüi kowi kowh thawpah mih sangbowk laitawm kowi a-i ringkaw dowi?11Judauüa dow kaah sakowm dowi bowt chekhai. Amatni dow Israel pren hai Jerusalem marow kowi suiiai kaniaima mih lup chang reng khai. Judauüa mih akeng thuraiuüa kowi kowh chup mih masiuüa hawmh hown tachawng hanow chimsaima mih Thurai chup kim kowi sürlawkah khai.12Naiawng chang miuüa kowi dow mukuang siphaiuüa kowh CHAKRAMANG vüi uang pawla phuchua chepaw Jakawb krungchak hownia CHAKRAMANG pacham piakta lah.13Nami klen kowi enni chang lup ngak mih uowi lowk tak. Nami lup ngak dow enni uang kar uang nguk hanow mik tui hown enni uang sik CHAKRAMANG kowh phuchuara mih chekhai. Tawngplawng kowchow panow naiawng enni uang chang mih dow enni uang pawla phuchua mih kowi CHAKRAMANG awmrawm dowi hai pe enni ching dowi rakowi chekhai.14Enni tek mih, “Tawngplawng kowchow hawt awmrawm dowi?” pakhai. CHAKRAMANG awmrawm dowi mih auan dow enni tachawng khe aia tawi uowi saksi khowk chepaw masi kaah sakowm dowi iawng enni uowi rakowi chekhai. Enni chawngah mih masi hown enni takham khowk chepaw enni kowh masi kaah sakowm dowi iawng enni uowi khai.15Masi huaiu kowi CHAKRAMANG bawngah mih chowbowt nadowi bow? Buk hai lümla mih aiamat kowh chekhai. Tawngplawng kowchow panow amatchi hownia dow Thurai kowi ringkaw mih krungchak pe uowiah kownkow pabuk panga sang changah mih chekhai. Naiawng rakowi enni kowh saktuak lawnguan kowi uowiah büah kaneu diah. Enni kowh masi kaah sakowm dowi iawng hang uowi büa diah.16CHAKRAMANG Israeluüa kowh Thurai tek mih, “Khua masi mih maru kowi ang sui khai,” pakhai. Nami klen kowi paw lang kri lang kraing mih CHAKRAMANG tek mih, “Tawnguat iawng le masi prawn rawn mih maru kowi ang sui chekhai. Tawngplawng kowchow panow naiawng chang mih dow masiuüa kowi chang nowng mih iawng chekhai. Naiawng rakowi enni kowh saktuak mih kaneuma khetah büa diah. Enni kowh masi kaah sakowm dowi iawng hang uowi büa diah,” pakhai.17Enni matia laiklow hown CHAKRAMANG kowi enni towkah kawm khai. Nachenganchepaw enni tek mih, “Tawng iawng chow CHAKRAMANG kowi anging towkah kawm?” pakhai. CHAKRAMANG kowi enni towkah kawm mih dow, “Chang lup ngak miuüa maten dow CHAKRAMANG mik kowi aiungma kangowh, now aia dow amatni luk kowi sak-ih reng,” pahai enni tek mih chekhai. Nami klen kowi enni plan tek mih, “Sow, tara nowm chet mih Thurai tawng kowi chow?” pakhai.
The Seed Company