Leviuüa7
1“Mami dow piakta rirow khe kowh aprek sung uanap krang chekhai. Mami uanap dow achimsaima chekhai.2Aprek sung uanap kowi kowh tawncher paw tikah mih uanap kowi kowh tawncher ngen rah kowi nangenah kown takla, now avi dow phuchuara kowi tapat lut nakrawi thetah kown takla.3Nami tawncher kowi kowh asau maten dow nachangla phuchua müa bowk kown takla. Naiawngün dow amai tut, riaklah sau,4asau hailawm akia pre buk mih hai plawng ram lang iuk mih chekhai.5Naiawngün dow CHAKRAMANG vüi chakkham uanap iawng hai phuchuara kowi natikah kown. Naiawngün sau dow aprek sung uanap chekhai.6Naiawngün sau tikta bowk kung kowi kowh ta lat mih chaknga dow uamow kimchak kowi kowh kachakuüa nget naiung cha kown. Tawkche taklowp taklangra te viadawng chimsaima mih kowi nachaah kown takla. Nami uanap dow achimsaima chekhai.7“Angak lawt lük müa uanap rirow iawng dow nami aprek sung uanap paw nachangah kown. Naiawngün uanap kowi kowh chaknga dow uang chang phuchua mih maru kowh angak nalawtta pe kownkow hawt chang lup mih uamow chowtaih naka kown.8Tikah mih uanap kowi kowh hawt chang lup mih uamow dow nami uanap kowi kowh chak pik aiamat vüi naia paw kown.9Taping kowi kowh awpah mih kawm hown chepaw, puh hown kowh ngaiah mih kawm hown chepaw, apherklapma mih angai müa hown kowh heuah mih kawm hown chepaw kawmdi uanap kowi kowh kawm dow hawt chang lup mih uamow chowtaih naka kown.10Tawkche lawk pe sau mih kawm lah, lawk pe sau dowi mih kawm lah, kawmdi uanap kowi kowh ap-ah mih uanh srui dow uamowuüa maten arisang nataretah kown.11“Mami dow CHAKRAMANG hown taking tasangra nauowila kownkow taking tasangra uanap rirow chekhai.12Lowra maru CHAKRAMANG tut-e tek awmrawm lai kown nau khai hanow taking tasangra uanap nachang kown takla. Now taking tasangra uanap chang müa klen kowi paw the pe tuah dowi kowi sau hown kowh lawkah mih kawm, the pe tuah dowi kowi apalachow ngaiah mih kawm, kawmdi lang iung mih kowi kowh sau hown kaneuma lawkah mih kawm nauang ap kown takla.13Awmrawm lai tek müa kowi kowh nami taking tasangra uanap kowi dow the pe tuah mih kawm paw nauowi ne kown takla.14Uang chang phuchua mih maru dow CHAKRAMANG kowi ap-ah kown mih vüi naiawngün kawm hownia pachap kowi lowk chi nauang pawla kown takla. Naiawngün dow taking tasangra uanap kowi kowh tawncher vi thet miia uamow kowh kakbak naown kown.15Awmrawm lai tek müa uanap kowi kowh ap-ah mih chaknga dow ap-ah mih ni kowi nachata kown takla; nami dow auai rau mowr natowah kown nadowi.16“Tawkche takhamta mih rakowi chepaw, kowmatia sak nau hown kowh chang mih chepaw taking tasangra uanap che chang khai hanow nami chaknga dow nami ni khe paw naia cha kown, now auai ni paw naiung cha kown taih.17Tawkche sum ni mowr chepaw uowi reng tak kowh chalow now nami chaknga mih maih kowi natikta kown takla.18Sum ni khowk chepaw nami chaknga che cha reng tak hanow nami uanap dow CHAKRAMANG naawmrawm pe kown nadowi bowt; nami uanap dow aia vüi mrawkra nauowi kown nadowi bowt. Nami dow asür alawkma padow nadowkah bowt kown; nami chaknga cha mih maru dow naka ripra kown.19“Taking tasangra uanap kowi kowh chaknga kowi che asür alawkma mih chap talük takak khai hanow nami chaknga dow nachaah kown nadowi bowt; nami dow natikta kown takla. Tawkche tawngpaw talük takak dowi kowh chalow now tasür talawk dowi miuüa nami chaknga naiung cha kown.20Now lowra maru asür alawkma hai taking tasangra uanap kowi kowh ap-ah mih chaknga che chata khai hanow nami maru kowi dow aiamat chenchap hownia nabatta kown takla.21Now maru kowi lah, tawncher kowi lah, lowra mih asür alawkma mih chap kowi lah cham kakta khai hanow aia dow natasür talawk kown. Nami kung kowi paw CHAKRAMANG hown taking tasangra nauowila kownkow taking tasangra uanap kowi kowh ap-ah mih chaknga che tawi cha khai hanow nami maru kowi dow aiamat chenchap hownia nabatta kown takla,” pape khai.22Nami kung kowi CHAKRAMANG tek pe Mosi mih, “Israeluüa kowi maiawng kowtek pe diah: Chia sau lah, rua sau lah, ruapur sau lah, tawng sau paw enni nacha kown nadowi.24Tawncher kowng mih sau lah, kaurawng uaramchak makta mih tawncher sau lah enni naia chaah kown nadowi. Tawkche akeng mih lup chang müa vüi dow enni naia tawng kown taih.25CHAKRAMANG vüi chakkham uanap chang müa kowi kowh asun uang mih tawncher chap kowi kowh asau maten dow enni naiung cha kown nadowi. Naiawngün sau cha mih maru kowi dow aiamat chenchap hownia nabatta kown takla.26Lowra kowi enni cham uowi chepaw uakling uaber vi lah, tawncher vi lah, kaurawng uaramchak vi lah enni nacha kown nadowi.27Cha vi mih maru kowi dow aiamat chenchap hownia nabatta ngengche kown takla,” pape khai.28Nami kung kowi CHAKRAMANG plan tek pe Mosi mih, “Israeluüa kowi maiawng kowtek pe diah: Lowra maru CHAKRAMANG hown taking tasangra nauowila kownkow taking tasangra uanap chang müa uang pawla mih tawncher hownia CHAKRAMANG kowi napeah ne kown takla.30CHAKRAMANG vüi chakkham uanap chang müa sakowuh hai asau maten dow aiamat rut hown uamow kowi nauang peah kown. Sakowuh nga dow CHAKRAMANG pur kowi uamow nakrowngah kown. Nami dow amülüngma mih uanap chekhai. Nami dow uamowuüa kowh vüi bak naown kown; tawkche asau tarapdow phuchuara kowi natikta kown takla.32Taking tasangra uanap kowi kowh tawncher hawmlawm thung dow uamowuüa kowi napeah kown. Nami tawncher thung dow avi hai asau ap mih uamow kowh kakbak chekhai.34Israeluüa pungmadawng kowi changla taking tasangra uanap mih hownia ang vüi kowi kowh krowngah mih sakowuh hai ang vüi kowi kowh ap-ah mih athung dow uamowuüa kowi ang peta khowk. Nami dow Israeluüa pungmadawng hownia chowngchowng saksakma amatni kowh vüi bak naown kown,” pape khai.35Arawn hai achapauüa kowi dow CHAKRAMANG kowi naia chupiia kownkow ap pe uamow rah khai. CHAKRAMANG vüi chakkham uanap chang müa tawncher kowi kowh sakowuh hai athung dow amatni kowi nümnapah mih ni hownia amatni kowh vüi bak pahai khowm pe bowk pe khowk chekhai.36Nami vüi bak dow chowngchowng saksakma Arawn hai achapauüa kowi napeah kownkow amatni kowi nümnapah mih ni khe Israeluüa kowi CHAKRAMANG peta ana khowk.37Maiawngün bowkbowk dow tikah mih uanap, kawmdi uanap, angak lawt lük müa uanap, aprek sung uanap, ap pe arah mih pawi kowi kowh uanap hai taking tasangra uanap rirow chekhai.38Sinai hungh uowi mih süngrüp süngkangma kowi uowi mih khin khe aia vüi nauang pawla uanap kownkow Israeluüa kowi CHAKRAMANG peah ana khai. Maiawngün rirow maten dow nami ni khe kowh Sinai hungh luk kowi Mosi kowi CHAKRAMANG peah mih chekhai.
The Seed Company