Leviuüa6
1Nami kung kowi CHAKRAMANG plan tek pe Mosi mih, “Maru kowh tangka pawisa khet lawnguan kowi chepaw, maru uang pawngah mih uanh lawnguan kowi chepaw, kür hown cham rupah mih uanh lawnguan kowi chepaw, maru kowi kuanah mih lawnguan kowi chepaw, maru cham mata mih uanh ka khe küa dai mih chepaw, dai lai hown kham sawi mih chepaw naiawngün dow CHAKRAMANG mik kowi angak chekhai. Naiawng rakowi cham kuah mih chepaw, cham kuanah mih chepaw, maru uang towah mih chepaw, maru mata kowh kaah mih chepaw, uanh rakowi dai lai hown kham sawi chepaw naiawngün dow uanh iah kowi naiawng chang mih maru achima naplanta pe kown takla. Nami klen kowi uanh sung changah tanga bak kowi pabak mih aia nachüt pela kown takla. Nami dow aprek sung uanap aia chang mih ni khe uanh iah kowi aia naplan peta kown.6Nami klen kowi paw changta angak mih sung dow CHAKRAMANG pur kowi nachangla aprek sung uanap kown takla. Naiawng rakowi en khowm pe bowk pe asung khowt mih ruapurla uamow kowi aia nauang peah apum kown takla. Tawkche aser auowk uowi dowi mih ruapurla naown kown takla.7Now uamow mih CHAKRAMANG pur kowi nami ruapur naphuchuaah kown. Nahanow CHAKRAMANG mih aia kowi nalawtta kown towbowt,” pape khai.8Nami kung kowi CHAKRAMANG tek pe Mosi mih,9“Arawn hai achapauüa kowi tek pe diah. Mami dow tikah mih uanap rirow chekhai: Tikah mih uanap kowi kowh uanh dow uar prowt phuchuara kowi kowh maih luk kowi nauowi kown, now nami maih paw atungma hing changta hüah kown takla.10Now rau-e khe dow adipükchow mih la hown kowh kowrmow khupma hai kraksa dawngh kruama tikah mih uanap hownia kowh plawi nahenta kownkow uamow napawah hanow phuchuara ria kowi natowah kown.11Nami kung kowi dow naiawngün tawnguat naklüpta hanow akeng mih tawnguat nakhup kown, now nami plawi dow tangbung khup rah uat kowi kowh lang kraah mih plawi kuakra kowi nacham pawla kown.12Phuchuara luk kowi mih nahing changta maih hüah kown takla; nami maih dow naia mitta kown nadowi. Nami phuchuara luk kowi dow rau towng uamowuüa nabawk pe sawp hanow nami sawp luk kowi mih tikah mih uanap natowah kaneu kown, now nami luk kowi dow taking tasangra uanap kowi kowh tawncher sau natikah kown.13Phuchuara kowi kowh maih dow atungma nape lünah reng kown; nami maih dow naia mitta kown nadowi,” pape khai.14“Mami dow kawmdi uanap rirow chekhai. Kawmdi uanap kowi kowh uanh srui dow CHAKRAMANG vüi naapah kownkow phuchuara kowi uamowuüa nakowpawla kown.15Uamow mih nami hownia kawmdi lang iung mih pachawm, sau hai kawmdi uanap luk kowi kowh towah mih anam iungma mih maikhük towk müa than maten napawta kown. Now nami kawmdi uanap hownia naap-ah kown mih krowngchow uamow napawah hanow phuchuara kowi kowh maih kowi nanawmah kown. Nami dow CHAKRAMANG vüi apta khowk pami amat müa chekhai. Nami dow chakkham uanap chekhai. Nami uanap nam hown dow CHAKRAMANG awmrawm reng chekhai.16Nami kawmdi uanap kowi kowh ta lat mih srui dow Arawn hai achapauüa kowh vüi bak naown kown. Nami kawmdi hown thawp kawm büah mih khin khe nathela pe tuah büah kown nadowi. Nami kawm dow chimsaima mih arah kowi nachaah büah kown takla. Naiawng rakowi taklowp taklangra te viadawng kowi nachaah büah kown.17Nami kawm kowi dow tuah hown lawkah now naia awpah kown nadowi. Ang vüi chakkham uanap kowi kowh ta lat mih uanh dow uamowuüa kowi ang peta mih chowbowt. Angak lawt lük müa uanap hai aprek sung uanap iawng kawmdi uanap kowi kowh ta lat mih srui paw achimsaima chekhai.18Naiawngün dow Arawn krungchak kowi kowh kachakuüa maten naiung cha kown. CHAKRAMANG vüi kowi kowh chakkham uanap hownia naiawngün dow chowngchowng saksakma pat amatni kowh vüi bak chekhai. Naiawngün kowi kowh kak mih srui dow ang vüi kowi kowh chimsaiah mih naown kown takla,” pape khai.19Nami kung kowi CHAKRAMANG tek pe Mosi mih,20“Arawn kowi nümnapah mih ni khe Arawn hai achapauüa paw chang kawmdi uanap reng khe kowh iawng kawmdi lang iung mih aset hown 400 gram CHAKRAMANG vüi nauang pawla kown. Nami kawmdi hownia dawnglang mih dow rau-e khe kowh phuchua müa naown kown, now ta lat dawnglang mih dow sat kowi khe kowh phuchua müa naown kown.21Kawmdi uanap iawng nami kawmdi paw kanrawn sau hown nalawkah hanow apherklapma mih angai müa hown naheuah kown. Now nami kawm ngai ia dow asek asekma CHAKRAMANG pur kowi nakowpawla kown takla. Nami uanap nam hown dow CHAKRAMANG awmrawm reng chekhai.22Arawn kowng kung kowi achapauüa pungmadawng hownia uamow lang kri mih rah ta paw mih kowi nümnapah khe paw nami uanap nachang kown takla. Nami uanap dow CHAKRAMANG kowh kakbak chekhai; nami dow natikta bowk kown takla.23Uamow uang pawla mih kawmdi uanap dow natikta bowk kown takla; nami dow nachaah kown nadowi,” pape khai.24Nami kung kowi CHAKRAMANG tek pe Mosi mih,25“Arawn hai achapauüa kowi tek pe diah. Mami dow angak lawt lük müa uanap rirow chekhai: Angak lawt lük müa uanap kowi kowh ngar paw tikah mih uanap chang müa ngar ngen rah re-e CHAKRAMANG pur kowi nangenah kown takla. Nami uanap dow achimsaima chekhai.26Nami uanap kowi kowh lup chang mih uamow chowtaih nami chaknga mih nacha kown. Nami chaknga dow chimsaima mih arah kowi nachaah büah kown takla. Naiawng rakowi taklowp taklangra te viadawng kowi nachaah büah kown.27Nami chaknga kak mih srui dow ang vüi kowi kowh chimsaiah mih naown kown takla. Now tawncher vi che tawnguat kowi talük takak khai hanow nami tawnguat dow taklowp taklangra te viadawng chimsaima mih arah kowi nachuah kown takla.28Nami uanap kowi kowh chaknga che bawn puh hown engah khai hanow ki eng kung kowi nami bawn puh mih nateuta kown takla. Now kri puh hown che engah khai hanow ki eng kung kowi nami kri puh mih nasawk nasauah kown takla.29Nami chaknga dow uamow kimchak kowi kowh kachakuüa maten naiung cha kown. Nami uanap dow achimsaima chekhai.30Tawkche angak lawt lük müa uanap kowi kowh tawncher vi che nalüla alawt kownkow taklowp taklangra te lak kowi uang pawla khai hanow nami chaknga dow nachaah kown nadowi; nami chaknga dow natikta bowk kown takla.
The Seed Company