Leviuüa8
1Nami kung kowi CHAKRAMANG tek pe Mosi mih,2“Arawn hai achapauüa kowi mami re-e uang pawla diah. Amatni kowi khup pe kown mih tawnguat, angak lawt lük müa uanap vüi chiala, nümnap müa sau, ruapurla pre pum hai the pe tuah dowi mih kawm kharang paw uang pawla diah.3Israeluüa maten kowi paw taklowp taklangra te plawt re-e uang pe takua talawmah diah,” pape khai.4Now CHAKRAMANG ana pek iawng rowprowp lup maten mih Mosi chang khai bowt. Israeluüa maten paw taklowp taklangra te plawt re-e uang takua talawm khai bowt.5Nakhowk khe Israeluüa kowi Mosi tek pe mih, “Maiawngün nachang kownkow CHAKRAMANG pe ang ana khai,” pakhai.6Naiawng ki tek pe hanow Mosi mih Arawn hai achapauüa kowi tui hown pe tasauah khai.7Nami kung kowi dow alak pra kowh khupah kown mih kowrmow bawngthawng athawngma mih Arawn kowi Mosi khup pe khai, now kekawm paw sük pe khai. Nami luk kowi dow aruama mih kowrmow athawngma mih khup pe khai, now nami luk kowi dow ephawd kowrmow khup pe khai. Now ephawd kowrmow kowi kowh tachawp mih kekawm hown ephawd kowrmow dow sük pe khai.8Nami ephawd kowrmow luk kowi dow dan pe owngphowr im hanow nami owngphowr im lak kowi dow Urim hai Thumim pape mih uanh tow pe khai.9Nami kung kowi dow Arawn lu kowi sui pe napawng hanow “CHAKRAMANG VÜI BAK” pahai arui uowi mih kuh apherklepchow mih napawng luk kowi sük pe khai. Naiawng hai CHAKRAMANG ana pek iawng rowprowp lup maten mih Mosi changah khai.10Nami kung kowi dow taklowp taklangra te hai te lak kowi kowh uanh maten luk kowi Mosi krawi thet pe nümnap müa sau hanow CHAKRAMANG vüi chimsaiah khai.11Nami sau dow aia kutplan pawah sangrum hanow phuchuara luk kowi ranit kat thetah khai. Nami sau hown aia dow phuchuara hai phuchuara kowi kowh tawngah mih puh bia aikam ün, achowm müa hailawm biatum mih CHAKRAMANG vüi chimsaiah khai.12Now nümnap müa sau aia kutplan pawah sangrum hanow Arawn lu kowi klai pe khai. Naiawng hai aia dow CHAKRAMANG vüi chimsaiah kownkow Arawn kowi nümnapah khai.13Nami kung kowi dow Arawn kowh chapauüa kowi uang pawla hanow aia khup pe kowrmow khai, now kawm pe kekawm hanow kruk pe lukruk khai. CHAKRAMANG ana pek iawng lup maten mih Mosi changah khai.14Nami kung kowi dow angak lawt lük müa uanap vüi chiala mih Mosi uang pawla khai. Now nami chiala lu kowi dow Arawn hai achapauüa tang pe rut khai.15Nami kung kowi dow nami chiala mih Mosi ngenah khai. Now nachim nasaila phuchuara kownkow nami chiala vi mih aia pawah sangrum khai. Nami vi dow rutchawk hown maiah hanow phuchuara luk kowi kowh anang tali klüng mih kowi aia krawi plikah khai. Now ta lat mih vi dow phuchuara daw kowi aia khükah khai. Naiawng hai angak lawt lük müa uanap vüi phuchuara mih naia tawngah kownkow aia chimsaiah khai.16Nami kung kowi dow nami chiala riaklah sau maten, plawng ram lang iuk mih hai asau hailawm akia pre buk mih pawah now phuchuara luk kowi aia tikah khai.17Nachenganchepaw chiala pik hai anga hown akih ün dow amatni uowi rah hownia alak sangrum re-e cham pawla hanow cham tikta khai. Naiawng hai CHAKRAMANG ana pek iawng rowprowp lup maten mih Mosi changah khai.18Nami kung kowi dow tikah mih uanap chang müa ruapurla uang pawla hanow nami ruapurla lu kowi mih Arawn hai achapauüa tang pe rut khai.19Nami ruapurla mih aia ngenah hanow avi dow phuchuara kowi tapat lut krawi patah khai.20Nami ruapurla dow leah hanow alu hai anga sek hown asau ün mih aia tikta khai.21Now akawlakchak hai akhawk ün dow tui hown aia sauah hanow nami ruapurla pabuk mih phuchuara kowi aia tikta khai. Nami dow chakkham uanap chekhai. Nami uanap nam hown dow CHAKRAMANG awmrawm reng chekhai. Naiawng hai CHAKRAMANG ana pek iawng rowprowp lup maten mih Mosi changah khai.22Nami kung kowi dow ap pe arah mih pawi vüi kowi kowh alowk mih ruapurla Mosi uang pawla khai. Nami ruapurla lu kowi paw Arawn hai achapauüa mih tang pe rut khai.23Nami ruapurla paw Mosi ngenah hanow avi pawah sangrum khai. Now nami vi dow Arawn kowh hawmlawm pra kowh param iah hai hawmlawm pra kowh rutma hown hawmlawm pra kowh khawkma kowi Mosi plik pe khai.24Nami kung kowi dow Arawn kowh chapauüa kowi uang pawla hanow kowbüah kowi paw hawmlawm pra kowh param iah hai hawmlawm pra kowh rutma hown hawmlawm pra kowh khawkma kowi nami ruapurla vi Mosi plik pe khai. Nami kung kowi kowh ta lat mih vi maten dow phuchuara kowi tapat lut Mosi krawi thetah khai.25Now ruapurla sau, amai tut, riaklah sau, plawng ram lang iuk mih, asau hailawm akia pre buk mih hai hawmlawm thung mih aia pawah khai.26Nami kung kowi dow CHAKRAMANG kowi ap-ah mih the pe tuah dowi mih kawm kharang hownia apalachow ngaiah mih kawm hai lawk pe kanrawn sau mih hai lawk pe kanrawn sau dowi mih kawm pawah apah chi khai, now naiawngün kawm dow ruapurla sau hai ruapurla thung luk kowi Mosi kowtowah khai.27Naiawngün srui dow Arawn hai achapauüa rut kowi Mosi ap pe hanow CHAKRAMANG pur kowi Mosi pe krowngah khai. Nami dow amülüngma mih uanap chekhai.28Nami kung kowi dow naiawngün srui mih kowbüah rut hownia Mosi pawah hanow phuchuara luk kowi kowh tikah mih uanap luk kowi tikah khai. Nami dow Arawn hai achapauüa kowi ap pe arah mih pawi kowi kowh uanap chekhai. Nami dow CHAKRAMANG vüi chakkham uanap chekhai. Nami uanap nam hown dow CHAKRAMANG awmrawm reng chekhai.29Nami kung kowi dow ap pe arah mih pawi kowi kowh ruapurla sakowuh aiamat kakbak mih Mosi pawah hanow CHAKRAMANG pur kowi krowngah khai. Nami dow amülüngma mih uanap chekhai. Naiawng hai CHAKRAMANG ana pek iawng rowprowp lup maten mih Mosi changah khai.30Nami kung kowi dow nümnap müa sau hai phuchuara kowi kowh vi mih Mosi pawah sangrum chi khai. Nami sau hai vi dow Arawn hai achapauüa luk kowi hown amatni kowh tawnguat kowi aia thet pe khai. Naiawng hai Arawn hown achapauüa hai amatni kowh tawnguat kowi dow CHAKRAMANG vüi Mosi chimsaiah khai.31Nami kung kowi dow Arawn hai achapauüa kowi Mosi tek pe mih, “CHAKRAMANG ana pek ang tek enni khowk iawng dow taklowp taklangra te plawt re-e nami chaknga mih engah büa diah, now ap pe arah mih pawi kowi kowh kawm hown nami re-e chaah büa diah. Nami chakkham dow enni kowh chakbak chekhai.32Now ki cha ki kham kung kowi kowh ta lat mih chaknga hai kawm dow enni natikta kown takla.33Nami ap pe arah mih pawi dow ranit ni mowr nauowi kown. Naiawng rakowi nami ranit ni chur dowi mowr dow taklowp taklangra te hownia enni nacham ia lawt kown nadowi.34Ani kowh changah mih dow CHAKRAMANG ana pek iawng hai enni kowh angak nalawtta enni kownkow chang mih chekhai.35Enni nakowngla dowi kownkow ani hownia ranit ni mowr ni chut uar prowt chi taklowp taklangra te lak kowi enni nauowi kown takla, now CHAKRAMANG ana pek iawng enni nachang kown takla. Maiawngün ana dow CHAKRAMANG pe ang mih chekhai,” pape khai.36Mosi kowi kowh CHAKRAMANG peah ana iawng rowprowp lup maten mih Arawn hai achapauüa chang khai bowt.
The Seed Company