Leviuüa5
1CHAKRAMANG tek pe Mosi mih, “Lowra maru aiamat khi-ah mih lah, taah mih lah nami lawnguan kowi chet tara mih khin khe tawi thuak saksi kownkow ka khin chepaw naia kown. Nami khin khe tara chet miuüa pur kowi tawngpaw tawi tek dowi kowh chalow now nami maru luk kowi mih angak nauowi kown. Now nami angak rakowi aia mih naka ripra kown.2“Lowra maru tuk dowi kowh asür alawkma mih chap kakta khai hanow aia mih natasür talawk kown. Kaurawng uaramchak uak lah, tawncher uak lah, krawng kowi kowh kam hai sowr mih asadua uak lah kakta khai hanow aia mih natasür talawk kown. Aia luk kowi mih aprek nauowi kown.3“Lowra maru tuk dowi kowh kow kowi kowh asür alawkma awr phaw mih kakta khai chepaw nami aia tatuk kung kowi dow aia luk kowi aprek nauowi kown.4“Lowra maru aiung lawnguan lah, angak lawnguan lah tuakah kaneu dowi kowi khamta sawi khai hanow nami maru mih aia tuk dowi chepaw aia tuk kung kowi aia luk kowi aprek nauowi kown.5“Lowra maru naiawngün angak changta kowh ka aprek khai hanow aia changta angak mih nataphuang kown takla.6Now aia kowh angak rakowi iawk müa iawng hai CHAKRAMANG vüi ruapur iia chepaw, rua iia chepaw nauang pawla apum kown takla. Nami hown aia kowh angak lawt müa uamow nachangla phuchua kown. Nahanow aia kowi mih Thurai nalawtah kown towbowt.7“Nami maru che aia kowh angak rakowi iawk müa iawng hai CHAKRAMANG vüi ruapur iia uang ia pawla dowi hanow kaurawng uatur chepaw, kimtawn uatur chepaw nauang pawla pre buk chi kown takla. Nami pre buk mih hownia lowk dow angak lawt lük müa uanap vüi, now alowk mih dow tikah mih uanap vüi chekhai.8Nami uatur mih uamow kowi nauang peah kown. Now uamow dow angak lawt lük müa uanap vüi uang pawla mih uatur hown narik chang phuchua kown. Nami uatur kowi mih alu tarai dowi krowngchow namer pe angawng kown.9Nami uatur vi dow napawah sangrum hanow phuchuara tapat lut nakrawi thetah kown, now ta lat mih vi dow phuchuara daw kowi uamow nachüngah kown; nami dow angak lawt lük müa uanap chekhai.10Now alowk mih uatur hown paw rirow kowi uowi iawng tikah mih uanap nachangla kown. Nahanow nami maru kowi mih Thurai nalawtah kown towbowt.11“Nami maru che kaurawng uatur chepaw, kimtawn uatur chepaw pre buk chi uang ia pawla dowi hanow angak lawt lük müa uanap vüi kawmdi aiungma mih aset hown 400 gram aia nauang pawla kown takla. Nami dow angak lawt lük müa uanap chekhai rakowi nami kawmdi kowi mih nathe pe sau kown nadowi, now than paw natowla pe kown nadowi.12Nami kawmdi mih uamow tut-e aia nakowpawla kown takla. Nami kawmdi hownia uamow napawah achawm hanow CHAKRAMANG vüi chakkham uanap chang müa phuchuara kowi nanawmah kown. Nami dow CHAKRAMANG vüi apta khowk pami amat müa chekhai. Nami dow angak lawt lük müa uanap chekhai.13Nami uanap hownia dow nami maru kowi Thurai nalawtah kown towbowt. Nami uanap kowi kowh ta lat mih kawmdi dow kawmdi uanap kowi kowh iawng uamow kowh kakbak naown kown,” pakhai.14Nami kung kowi CHAKRAMANG tek pe Mosi mih,15“Lowra maru chimsaima mih uanap CHAKRAMANG kowi peah kown mih tawita mata khai hanow aia luk kowi mih aprek nauowi kown. Now aia dow aprek iawng hai aser auowk uowi dowi mih ruapurla CHAKRAMANG tut-e nauang pawla apum kown takla. Naiawng nadowi now en khowmta pe asung khowt mih ruapurla aia naran apum kown takla. Asung dow taklowp taklangra te kowi kowh akhai müa hown khaiah mih tai khowt naown kown takla. Nami dow aprek sung uanap chekhai.16Nami maru dow chimsaima mih uanh luk kowi changta angak khai rakowi naiaw kown takla. Now nami ruapurla sung iawta klen kowi paw nami asung changah tanga bak kowi pabak mih uamow kowi napeah chüt kown takla tak. Now uamow mih aprek sung uanap iawng hai nami ruapurla hown nachang phuchua kown. Nahanow nami maru kowi mih Thurai nalawtah kown towbowt.17“Lowra maru CHAKRAMANG ana pek kowi kowh hangah mih sia tuk dowi kowh changta angak khai chepaw nami maru luk kowi mih aprek nauowi kown. Now aia mih naka ripra kown.18Nami maru mih nachangla aprek sung uanap kownkow en khowmta pe asung khowt mih ruapurla aser auowk uowi dowi mih uamow tut-e nauang pawla apum kown. Nahanow tawita mata mih angak dow Thurai nalawtah kown towbowt.19Nami dow CHAKRAMANG tut-e enni changta angak khe kowh aprek sung uanap chekhai,” pakhai.
The Seed Company