Leviuüa4
1Maiawngün laiklow Israeluüa kowi nakowtek pe kownkow Mosi kowi CHAKRAMANG tek pe mih, “Lowra maru CHAKRAMANG ana pek kowi kowh hangah mih sia dow tawita mata khai hanow nami maru mih maiawng nachang kown takla.3“Uamow lang kri mih che changta angak khai hanow maru-uüa luk kowi aprek nauang kla kown. Naiawng rakowi uamow lang kri mih dow aia kowh angak lawt lük müa uanap nachangla kownkow CHAKRAMANG tut-e aser auowk uowi dowi mih chiala powrchow nauang pawla papum kown takla.4Nami chiala powrchow dow taklowp taklangra te plawt re-e CHAKRAMANG pur kowi uamow lang kri mih nakowpawla kown. Aia mih nami chiala lu kowi aia kowh rut natangah kown. Nami chiala dow taklowp taklangra te plawt re-e CHAKRAMANG pur kowi aia nangenah kown.5Now nami chiala powrchow vi dow uamow lang kri mih napawah sangrum hanow taklowp taklangra te lak kowi kowh chimsaima mih arah kowi nakowpawla kown.6Nami vi kowi dow aia kowh rutchawk nachimah hanow CHAKRAMANG pur kowi arah chimsaima mih kowi kowh krala mih uaniang pur kowi ranit kat aia nathetah kown.7Now nami chiala powrchow vi plan pawah sangrum hanow taklowp taklangra te lak kowi CHAKRAMANG pur kowi kowh anam iungma mih maikhük towk müa phuchuara kowi kowh anang kowi uamow nakrawi plikah kown. Nami kung kowi dow ta lat mih vi mih taklowp taklangra te plawt re-e kowh tikah mih uanap chang müa phuchuara daw kowi uamow nakhükta kown.8“Nami kung kowi dow angak lawt lük müa uanap nachangla kownkow uang pawla mih chiala powrchow kowh sau napawta pe bowk kown. Naiawngün dow riaklah sau, akeng mih sau,9asau hailawm akia pre buk mih hai plawng ram lang iuk mih chekhai.10Taking tasangra uanap kowi kowh sunah mih chia kowi pawta pe asau iawng nami angak lawt lük müa uanap kowi kowh chiala powrchow kowi paw napaw pe asau kown. Naiawngün sau dow tikah mih uanap chang müa phuchuara luk kowi uamow nanawmah kown.11Nachenganchepaw nami chiala powrchow kowh apik, anga, alu, aklowng, akih hailawm aria ün dow tangbung khup rah uat kowi cham pawla hanow lang kraah mih plawi kuakra kowi kowh lün pluplup mih sawp luk kowi nanawmah kown.13“Israel pachenma che CHAKRAMANG ana pek kowi kowh hangah mih sia tawita mata khai hanow nami dow amatni tuk dowi chepaw amatni luk kowi aprek nauowi kown.14Amatni changta angak mih amatni tatuk mih khin khe dow angak lawt lük müa uanap nachangla kownkow taklowp taklangra te pur kowi nauang pawla chiala apum kown takla.15Nami chiala lu kowi dow Israeluüa pungmadawng kowi kowh lawngtang aluchowuüa CHAKRAMANG pur kowi amatni kowh rut natangah kown. Now nami chiala dow CHAKRAMANG pur kowi nangenah büah kown.16Nami chiala vi dow uamow lang kri mih napawah sangrum hanow taklowp taklangra te kowi nakowpawla kown.17Nami vi kowi dow aia kowh rutchawk nachimah hanow CHAKRAMANG pur kowi arah chimsaima mih kowi kowh krala mih uaniang pur kowi ranit kat aia nathetah kown.18Now nami chiala vi plan pawah sangrum hanow taklowp taklangra te lak kowi CHAKRAMANG pur kowi kowh anam iungma mih maikhük towk müa phuchuara kowi kowh anang kowi uamow nakrawi plikah kown. Ta lat mih vi dow taklowp taklangra te plawt re-e kowh tikah mih uanap chang müa phuchuara daw kowi uamow nakhükta kown.19Nami chiala sau dow napawta pe bowk hanow phuchuara luk kowi uamow nanawmah kown.20Angak lawt lük müa uanap kowi kowh chiala kowi changla phuchua iawng nami chiala kowi paw uamow nachangla phuchua kown. Nahanow Israeluüa kowi mih Thurai nalawtah kown towbowt.21Nami kung kowi dow nami chiala kowi mih tangbung khup rah uat kowi uamow nacham pawla kown, now angak lawt lük müa uanap kowi kowh chiala kowi tikah iawng nami chiala kowi paw uamow natikah kown. Nami dow Israel pachenma kowh angak lawt lük müa uanap chekhai.22“Aluchow mih che CHAKRAMANG ana pek kowi kowh hangah mih sia kowi tawita mata khai hanow nami dow aia tuk dowi chepaw aia luk kowi aprek nauowi kown.23Aia changta angak mih aia tatuk mih khin khe angak lawt lük müa aser auowk uowi dowi mih ruala aia nauang pawla apum kown takla.24Nami ruala lu kowi mih aia kowh rut aia natangah kown. Nami ruala dow tikah mih uanap kowi kowh tawncher ngenra re-e CHAKRAMANG pur kowi aia nangenah kown. Nami dow angak lawt lük müa uanap chekhai.25Angak lawt lük müa uanap kowi kowh ruala vi kowi dow uamow mih aia kowh rutchawk nachimah hanow tikah mih uanap chang müa phuchuara kowi kowh anang kowi nakrawi plikah kown, now ta lat mih vi dow phuchuara daw kowi nakhükta kown.26Taking tasangra uanap kowi kowh tawncher sau tikah iawng nami ruala sau paw phuchuara luk kowi natikah kown. Nahanow nami aluchow kowi mih Thurai nalawtah kown towbowt.27“Israeluüa pungmadawng kowi iawngpa mih maru che CHAKRAMANG ana pek kowi kowh hangah mih sia kowi tawita mata khai hanow nami dow aia tuk dowi chepaw aia luk kowi aprek nauowi kown.28Aia changta ngak mih aia tatuk mih khin khe angak lawt lük müa aser auowk uowi dowi mih ruama aia nauang pawla apum kown takla.29Nami maru mih angak lawt lük müa ruama lu kowi aia kowh rut natangah kown. Nami ruama dow tikah mih uanap kowi kowh tawncher ngenra re-e nangenah kown.30Nami ruama vi kowi dow uamow mih aia kowh rutchawk nachimah hanow tikah mih uanap chang müa phuchuara kowi kowh anang kowi nakrawi plikah kown, now ta lat mih vi dow phuchuara daw kowi aia nakhükta kown.31Taking tasangra uanap chang müa tawncher kowi kowh pawta pe asau iawng nami angak lawt lük müa uanap kowi kowh tawncher kowi paw uamow napawta pe asau kown. Naiawngün sau dow phuchuara luk kowi uamow nanawmah kown. Nami uanap nam hown dow CHAKRAMANG awmrawm reng chekhai. Nahanow aia kowi mih Thurai nalawtah kown towbowt.32“Nachenganchepaw nami maru che angak lawt lük müa ruama takcha ruapur chah che uang pawla khai hanow nami ruapur chah mih aser auowk uowi dowi mih aiia naown kown takla.33Nami ruapur iia lu kowi mih aia kowh rut natangah kown. Nami ruapur iia dow tikah mih uanap kowi kowh tawncher ngenra re-e nangenah kown.34Nami angak lawt lük müa uanap kowi kowh ruapur iia vi kowi mih aia kowh rutchawk uamow nachimah hanow tikah mih uanap chang müa phuchuara kowi kowh anang kowi nakrawi plikah kown, now ta lat mih vi dow phuchuara daw kowi aia nakhükta kown.35Taking tasangra uanap kowi kowh ruapur kowi pawta pe asau iawng nami angak lawt lük müa uanap kowi kowh ruapur iia kowi paw uamow napawta pe asau kown. Naiawngün sau dow CHAKRAMANG vüi maih kowi kowh tikah mih uanh luk kowi natikah kown. Nahanow aia kowi mih Thurai nalawtah kown towbowt,” pakhai.
The Seed Company