Leviuüa27
1Nami kung kowi CHAKRAMANG tek pe Mosi mih, “Mami laiklow Israeluüa kowi kowtek pe diah: Nape changah CHAKRAMANG lup kownkow CHAKRAMANG tut-e naap maru kown mih enni takhamta chepaw naia kown. Naiawng enni takhamta khai hanow enni naap ngengche kown takla. Nami maru kowi che enni kutplan klanta kown nau khai hanow uamow khowmta bowkta mih sung khowt napela kown takla. Nape kown mih dow maiawng.3Pirmi ning luk hownia 60 ning mowr mih kachakuüa vüi dow tai 50 iun, now nami ning kowi kowh masiuüa vüi dow tai 30 iun chekhai. Tanga ning luk hownia pirmi ning mowr mih kachakuüa vüi dow tai 20 iun, now nami ning kowi kowh masiuüa vüi dow tai 10 iun chekhai. Palachow hownia tanga ning mowr mih kachakuüa vüi dow tai 5 iun, now nami ning kowi kowh masiuüa vüi dow tai 3 iun chekhai. Taruk kawm ning luk kowi kowh kachakuüa vüi dow tai 15 iun, now nami ning kowi kowh masiuüa vüi dow tai 10 iun chekhai. Naiawngün tai dow taklowp taklangra te kowi kowh akhai müa hown kowh khaiah mih chekhai.8“Takhamta mih maru che ngarai lai kowh khowmta bowkta mih iawng ia pe dowi hanow naap-ah kown mih maru kowi uamow tut-e aia nakowpawla kown. Nahanow takhamta mih maru nowng pe mowr uamow nakhowm bowk pe kown.9“CHAKRAMANG vüi naap tawncher kownkow enni takham khai hanow nami tawncher dow chimsaima pahai enni nadowkah kown takla.10Nami tawncher takcha kowi akeng mih tawncher enni nape kown nadowi. Aiungma chepaw, angakma chepaw takhamta khowk mih tawncher takcha kowi akeng mih tawncher enni nape kown nadowi. Nami takcha kowi akeng mih tawncher che enni uang pe khai hanow pre pum trui CHAKRAMANG vüi achimsaima pahai enni nadowkah kown takla.11Sürlawkma mih tawncher che CHAKRAMANG tut-e naap kownkow enni takham khai hanow nami tawncher dow uamow tut-e enni nakowpawla kown takla.12Nami tawncher mih iung chepaw, nga chepaw uamow nahawt müah hanow nakhowm bowk pe asung kown, now nami tawncher sung dow uamow khowmta bowkta iawng towbowt nauowi kown.13Takhamta mih maru che nami tawncher naklanta kown nau khai hanow uamow khowmta mih asung klen kowi changah tanga bak kowi pabak sung nachüt pela kown takla.14“CHAKRAMANG vüi kowi enni pe kim khai hanow nami kim dow iung chepaw, nga chepaw uamow namüah now nakhowm nabowk pe asung kown, nahanow nami kim sung dow uamow khowmta bowkta iawng towbowt nauowi kown.15Nami kim che kim iah kutplan klanta kown nau khai hanow uamow khowmta bowkta mih asung klen kowi changah tanga bak kowi pabak sung nachüt pela kown takla.16“Kowmatia kimchakuüa kowh krawng bawn che CHAKRAMANG kowi apta ne kown nau khai hanow mün khowt chow naia sawt liu kown mih changah ingsap now nami iawng asung enni nadowkah kown. Püm 180 set rawng krawng kowi tai 50 iun chi asung enni nadowkah kown takla.17Jubili ning kowi che CHAKRAMANG vüi enni pe krawng bawn khai hanow nami krawng bawn sung dow uamow khowm bowkta iawng achima nauowi kown.18Tawkche Jubili ning kung kowi che enni ap krawng bawn khai hanow auai kowh Jubili ning uang ting kown mih mün ning tak chow kra mih uamow nachangah ingsap kaneu kown. Now nami ning klowk uowi iawng uamow nakhowm enni asung kown. Naiawng chang hanow asung paw nalang e kown towbowt.19CHAKRAMANG kowi enni peta mih krawng bawn che enni naklanta kown nau khai hanow nami krawng bawn sung uamow khowmta bowkta mih klen kowi changah tanga bak kowi pabak sung enni nachüt pela kown takla. Nahanow nami krawng bawn dow enni naplan kata iawk kown towbowt.20“Nachenganchepaw nami krawng bawn che enni klanah dowi kowi akeng mih maru tut-e cham sumta khai hanow enni nau chepaw enni naka klan kown nadowi bowt.21Jubili ning uang ting khe paw nami krawng bawn mih enni naplan ka kown nadowi bowt; nami dow chowngchowng saksakma CHAKRAMANG vüi lang krata mih nachowng kown towbowt. Nami krawng bawn dow uamow kowh dawngthawnguan nachowng bowt kown.22“Kowmatia kimchakuüa kowh krawng bawn nadowi kowi cham ranah mih krawng bawn che CHAKRAMANG vüi enni ap khai hanow23auai kowh Jubili ning uang ting mowr e mün ning chow uowi tak mih uamow nachangah ingsap kaneu kown. Nami ning klowk iawng uamow nakhowm enni asung kown. Tawkchedow nami krawng bawn sung mih nami ni kowi CHAKRAMANG vüi chimsaima mih uanh iawng enni napeta kown takla.24Nachenganchepaw Jubili ning uang ting khe dow enni ran pe krawng bawn mih maru tut-e chepaw, aia krungchakuüa tut-e chepaw enni nakowplanta pe iawk kown takla.25“Naiawngün sung maten dow taklowp taklangra te kowi kowh akhai müa hown enni nakhai kown. Taklowp taklangra te kowi kowh akhai müa sekel hown pasekel now tai aiun dik chekhai.26“Chia chah chepaw, ruapur chah chepaw tawncher kowi kowh rik pen mih ala dow CHAKRAMANG vüi enni naap-ah kown nadowi bowt. Tawngplawng kowchow panow tawncher kowi kowh uang rik pen mih ala maten dow CHAKRAMANG kowh chekhai.27Now tawncher sürlawkma mih kowi kowh rik pen mih ala chah CHAKRAMANG vüi ap kown mih enni takhamta chepaw naia kown. Naiawng enni takham khai hanow uamow khowm bowk enni mih asung klen kowi changah tanga bak kowi pabak sung nachüt pela now tawncher mih enni naia klan kown. Now klan kown che enni nau dowi hanow uamow khowmta bowkta mih sung khowt nacham sumah kown takla.28“Kimchakuüa kowh krawng bawn chepaw, maru chepaw, tawncher chepaw CHAKRAMANG vüi enni lang krata khowk hanow nami dow naia sumah kown nadowi bowt, now klan paw enni naia klan kown nadowi bowt. Naiawngün dow CHAKRAMANG vüi lang chimsai mih uanh pahai enni nadowkah kown takla.29Now lowra mih maru kowi nakowngta kownkow khowm bowkta khai bowt hanow nami maru kowi dow enni naia klan kown nadowi bowt. Nami maru kowi dow nakowngta ngengche kown takla.30“Üa hai laih hownia kowh kaah mih luprak srui dow hamüt bak kowi pabak mih CHAKRAMANG vüi chekhai. Uih-ak chepaw, luprak chepaw hamüt bak kowi pabak dow CHAKRAMANG vüi lang krata mih chekhai.31Nami hamüt bak kowi pabak mih uanh che enni klan kown nau khai hanow nami uanh sung klen kowi changah tanga bak kowi pabak sung enni nachüt pela kown takla.32Tawncher hawmh pungmadawng kowi paw rüaah hanow hamüt kowi kowh tatawng mih dow CHAKRAMANG vüi enni nalang krata papum chi kown takla.33Rüaah khe kowh CHAKRAMANG vüi bak tatawng mih tawncher dow iung chepaw, nga chepaw enni naia klingklai kown nadowi. Nami tawncher takcha akeng mih hown che enni klingklaiah khai hanow nami pre pum trui CHAKRAMANG vüi lang krata mih nachowng kown towbowt; nami dow naia klan kown nadowi bowt,” pakhai.34Naiawngün ana maten dow Israeluüa vüi Sinai hungh kowi Mosi kowi CHAKRAMANG peah mih chekhai.
The Seed Company