Leviuüa26
1“Tawng iawng mih arup aren paw enni nathawp kown nadowi. Singh hown chepaw, hua hown chepaw enni nathawp arup kown nadowi. Nachup naiiaah kownkow enni thawp pe arup mih hua dow enni pren kowi enni naia tow kown nadowi. Ang dow CHAKRAMANG enni kowh Thurai chekhai.2Ang kowh Tanai Ni maten enni nasunah reng kown takla; ang kowh taklowp taklangra te chimsaima mih kowi enni naring nakawah kown takla. Ang dow CHAKRAMANG chekhai.3“Enni che ang kowh ari arow hai ang kowh ana pek chün khai hanow akhin khe ang nape enni uang kown. Nahanow enni kowh üa hai laih kowi luprak ahuma naphaw kown, now uih-ien pantawn paw ahuma nauih napau kown.5Nami khin khe dow luprak phaw lai rakowi grep uih klek khin mowr enni nathua püm kown, now grep paw uih lai rakowi püm sawt khin mowr enni naka klek kown. Nakhowk khe dow mu duma enni naka cha kown, now pren kowi mih thaulangma enni nauowi kown.6“Pren kowi mih thaulangma ang natowah kown. Nahanow thaulangma hown enni naka müi bowt kown, now amia iawng mih maru paw natüng enni kramra kown nadowi bowt. Arangpranma mih kaurawng uaramchak kowi paw enni pren hownia alakma kowi ang nacham prütta kown. Enni pren kowi tawng iawng mih ransu-uüa paw nauang sen enni kown nadowi bowt.7Tawkche enni mih ransu-uüa kowi nakawikrawiah kown, now amatni kowi dow saidawng hown enni nakrawi saita bowk kown.8Akawm ia ransu-uüa kowi dow tanga iachow hown enni nakrawiah kown, now hamüt thawng ransu-uüa kowi dow akawm iachow hown enni nakrawiah kown. Amatni kowi dow saidawng hown enni nasaita bowk kown.9Nakhowk khe dow ang nasaksing sana enni kown, now maru iun paw ahuma ang nape prung enni kown. Enni hown kowh ang kowh sangbowk laitawm mih anikma ang natowah bowt kown.10Enni kaah mih luprak hu lai rakowi ning sar kowi kowh luprak enni nanungah kownkow anungra kowi kowh luprak prim enni nakuakta kown.11Enni tut-e ang natawi uowi reng kown; ang nasui enni kown nadowi bowt.12Enni hown ang natawi taiua mang reng kown; enni kowh Thurai ang nachowng kown. Now enni dow ang kowh maru nachowng kown.13Ang dow CHAKRAMANG enni kowh Thurai chekhai. Aigupta pren hownia ang uang lawtla enni mih dow Aigupta nar lup chang hownia enni pacham khalat lah pakowh chekhai. Enni pangkawt kowi kowh namuai ang klüpta enni hanow thaulangma hown ang pe mang enni khai.14“Nachenganchepaw enni che ang laiklow sünta dowi, ang kowh ana pek maten chün dowi,15ang kowh ari arow ün nuata khai, ang kowh ari aiang sui khai, now ang kowh sangbowk laitawm enni piakta khai hanow16maiawng ang nachang enni kown: Enni luk kowi kramra uowima mih rawka hai krau ang nauang pawla enni kown. Naiawngün rawka hown enni kowh mik napiak kown, now enni kowh kür paw na-e rürü kown. Nami khin khe dow enni sawt liu chepaw mrawkra nauowi kown nadowi. Tawngplawng kowchow panow enni kowh luprak dow ransu-uüa chowtaih nacha enni kown.17Enni kowi dow ang nakingküa enni kown. Naiawng rakowi enni dow ransu-uüa tut-e nasum kown. Enni suiah mih maru-uüa mih enni luk kowi nachang alow kown, now maru krawi enni dowi chepaw enni napowt kown.18“Naiawng phaw kung kowi paw enni che ang laiklow chün dowi hanow enni kowh angak ripra ang nalang chüt enni ranit phow kown.19Enni kowh kür hown enni chang bawri khai. Nami bawrira dow ang napiakta enni kown. Mukuang dow lawngha iawng, now krawng dow kri iawng akhawtma ang nachangta enni kown. Mapaw ang nape enni uang kown nadowi.20Nakhowk khe dow enni kowh üa hai laih kowi mapaw luprak naphaw kown nadowi, now uih-ien pantawn paw naphaw kown nadowi. Nakhowk khe dow kawmkratma hown enni chang lup chepaw tawngpaw mrawkra nauowi kown nadowi.21“Naiawng ang chang enni kung kowi paw enni che kingküa ang hai ang laiklow chün kown nau dowi hanow enni kowh angak ripra mih ang nalang chüt enni ranit phow iawk kown.22Enni pungmadawng kowi arangpranma mih kaurawng uaramchak ang nauang chin enni kown. Naiawngün kaurawng uaramchak dow enni kowh chauüa kowi nakowngta kown, now enni kowh tawncher maten kowi paw nakowngta bowk kown. Nakhowk khe dow enni kowh maru iun na-e kown towbowt. Naiawng hai enni kowh tiama ün akhaw aklaima nauowi kown.23“Naiawng phaw kung kowi paw enni che ang tek iawng chün dowi kowi kingküa ang reng tak hanow24ang matia ngengche nachowng enni kowh ransu hanow enni kowh angak ripra ang nalang chüt enni ranit phow iawk kown.25Now ang kowh sangbowk laitawm chün dowi rakowi enni luk kowi ang nauang pawla enni tasenra kown. Enni khita ransu-uüa now marow lak kowi enni nakup kown. Nakhowk khe dow enni luk kowi makowng hawi ang nauang chin enni kown, now ransu-uüa rut kowi ang naap enni kown.26Chakkham kramra tia ang napitta enni hanow akhawr hown enni nauowi kown. Nakhowk khe dow kawmdi e lai rakowi lowkchow mih taping kowi masiuüa hamüt ia naia awp kawm kown. Now chak khin khe dow nowkah khaiah rak hown enni nachaah kown. Mu du pat enni naka cha kown nadowi.27“Naiawng phaw kung kowi paw enni che ang laiklow chün dowi kowi kingküa ang reng tak hanow28ang paw kunmarauma hown nakingküa enni kown, now enni kowh angak ripra ang nalang chüt enni ranit phow iawk kown.29Nakhowk khe dow sakkrai lai bowt rakowi enni matia kowh chauüa nga enni nacha kown.30Arah kroma mih kowi kowh chupiiara maten ang napiakta enni kown, enni kowh maikhük towk müa phuchuara paw ang napiakta enni kown. Enni kowh uak dow asung uowi dowi mih arup aren luk kowi mawngchawng iawng ang nakuakta enni pan kown. Now lainowmma ang nasui enni bowt kown.31Enni kowh marow maten ang napiakta enni kown, now enni kowh arah chimsai mih maten paw ang napiakta enni kown. Enni kowh uanap nam ang naawmrawm enni kown nadowi.32Enni kowh pren dow ang napiakta enni kown. Nami khi hanow enni kowh ransu-uüa mih natakrow kown.33Akeng chenchapuüa pungmadawng kowi ang nauet enni kown, now saidawng hown ang nasaita enni kown. Enni pren kowi kowh laih hai marow maten dow napiak bowk kown towbowt.34“Enni kowh pren kowi ari kowi uowi iawng tanai ning towng enni pe tanaiah dowi chekhai. Naiawng rakowi ransu-uüa pren kowi enni cham uowi mih khin khe enni kowh piaknama mih pren naka tanai bowt kown.35Enni matia pren kowi enni uowi mih khin khe enni kowh krawng bawn tanai mih ning kowi ün ka tanai dowi chekhai. Naiawng rakowi pren piak mih khin khe dow enni kowh krawng bawn naka tanai bowt kown.36Enni pungmadawng kowi kowh ta sing uowi miuüa kowi dow ransu-uüa pren kowi cham uowi khe amatni sak kowi ang napeah kramra kown. Nakhowk khe amatni dow li hut khe kowh singh ram chü mih tün kowi paw napowt büah kown. Tasenra kowi kram kowng kowh powt mih maru iawng amatni dow napowt kown. Now kung hownia amiapaw krawiah dowi chepaw amatni dow tingling townglowngma napowt hanow natatheu büah kown.37Kung hownia amiapaw kawikrawiah dowi chepaw amatni dow tasenra hownia naplaila kownkow powt mih maru iawng napowt hanow lowkkowlowk natachawn büah kown. Ransu-uüa kowi nakingküala kown mih kür enni kowh nauowi kown nadowi bowt.38Akeng chenchapuüa pren kowi enni nacham tauet hanow enni nacham kowng kown.39Nami kung kowi paw enni pungmadawng kowi ta sing ne chepaw amatni dow amatni kowh angak hai amatni pipu-uüa kowh angak rakowi kow napiak rürü now nakowng büah kown.40“Kingküa ang hai ang kaah sakowm iawng uowi büah dowi rakowi amatni kowi dow ang nakingküaah kown, now amatni kowi dow ransu-uüa pren kowi ang pawla kown. Tawkchedow nami ransu-uüa pren kowi che amatni kowh angak hai amatni pipu-uüa kowh angak rakowi lü lawt khai, amatni kowh saktuak paw khawtah dowi bowt, amatni kowh angak ripra kham kown mih nau khai bowt hanow42Jakawb hai Isak hown Abraham büah hown kowh ang kowh sangbowk laitawm laiklow hai amatni kowh pren lawnguan ang naka tuakah kown.43Amatni dow pren hownia napowt takla ngengche kown, now pren dow nata piak kown. Nami khin khe dow akhaw aklaima mih pren aia kowh Tanai Ni naka sun bowt kown. Ang kowh ari aiang chün dowi mih hai ang kowh rirow sui mih rakowi amatni dow naka angak ripra ngengche kown.44“Nachenganchepaw ransu-uüa pren kowi amatni cham uowi khe paw chum pat dow ang nachumta kown nadowi. Amatni hown kowh ang kowh sangbowk laitawm dow ang napiakah kown nadowi. Tawngplawng kowchow panow ang dow CHAKRAMANG amatni kowh Thurai chekhai.45Amatni vüi amatni pipu-uüa hown kowh ang kowh sangbowk laitawm laiklow dow ang naka tuakah kown. Amatni pipu-uüa kowh Thurai nachowngla kownkow amatni kowi dow akeng chenchapuüa pur iawng Aigupta pren hownia ang uang lawtla mih chekhai. Ang dow CHAKRAMANG chekhai,” pakhai.46Naiawngün ana pek, ari aiang hai rirow dow Israeluüa vüi Sinai hungh kowi Mosi kowi CHAKRAMANG peah mih chekhai.
The Seed Company