Tarüa1
1Aigupta pren hownia Israeluüa uang lawt mih pre ning kowi kowh pre la kowi lacher pani khe taklowp taklangra te lak kowi Mosi hown CHAKRAMANG uang taklang khai. Nakhowk khe Israeluüa uowi mih dow Sinai hungh uowi mih süngrüp süngkangma kowi chekhai. Now CHAKRAMANG tek pe Mosi mih,2“Enni Israeluüa pungmadawng kowi tasen uangh khowk mih kachakuüa mün iachow uowi mih natukla kownkow Arawn enchi natang pe ming kown. Pirmi ning chih mih hownia nami luk kowi kowh tasen uangh khowk mih kachakuüa nget kowi chowlowkkow krungchakuüa kowi akra akrachow enchi narüaah kown.4Nami lup nachang kownkow bowkbowk krungchak hownia nakhowng enchi lowk ia chi kown. Nakhowng enchi kown miuüa dow chowlowkkow krungchak kowi kowh aluchow mih naown kown takla.5Nakhowng enchi kownkow nauang kown mih aluchowuüa dow Reuben krungchak hownia Sedeur kowh chapa Elizur,6Simiawn krungchak hownia Zurisadai kowh chapa Selumiel.7Juda krungchak hownia Aminadab kowh chapa Nasawn.8Isakar krungchak hownia Zuar kowh chapa Nethanel.9Zebulun krungchak hownia Helawn kowh chapa Eliab.10Josef kowh chapauüa pungmadawng kowi dow Efraim krungchak hownia Amihud kowh chapa Elisama. Manase krungchak hownia Pedazur kowh chapa Gamaliel.11Benjamin krungchak hownia Gideawni kowh chapa Abidan.12Dan krungchak hownia Amisadai kowh chapa Ahizer.13Aser krungchak hownia Okran kowh chapa Pakiel.14Gad krungchak hownia Deuel kowh chapa Eliasaf.15Naptali krungchak hownia Enan kowh chapa Ahira büah chekhai.16“Naiawngünuüa dow Israeluüa pungmadawng hownia kowh kloah mih aluchowuüa chekhai. Amatni bowkbowk dow chowlowkkow krungchak kowi kowh aluchow chekhai,” pakhai.17Now CHAKRAMANG tek pe mih naiawngün aluchowuüa kowi hawla now Mosi hai Arawn iüah mih Israeluüa maten kowi kuaah lawmah khai bowt. Nami dow Aigupta pren hownia amatni uang lawt mih pre ning hown pre la khe kowh lacher pani khe chekhai. Israeluüa mih chowlowkkow krungchak ming tekla now aluchowuüa mih amatni kowh ming tang pe khai; amatni kowi dow pirmi ning chih mih hownia nami luk kowi kowh tasen uangh khowk mih kachakuüa ming maten lowkchow lowkchow aluchowuüa tang pe khai.19CHAKRAMANG ana pek iawng Sinai hungh uowi mih süngrüp süngkangma kowi Mosi mih Israeluüa kowi rüaah khai.20Israeluüa pungmadawng kowi kowh pirmi ning chih mih hownia nami luk kowi kowh tasen uangh khowk mih kachakuüa nget kowi dow chowlowkkow krungchak kowi akra akrachow aluchowuüa tang pe ming khai. Jakawb kowh chapa lang ta mih Reuben krungchak dow 46,500 ia, Simiawn krungchak dow 59,300 ia, Gad krungchak dow 45,650 ia, Juda krungchak dow 74,600 ia, Isakar krungchak dow 54,400 ia, Zebulun krungchak dow 57,400 ia, Efraim krungchak dow 40,500 ia, Manase krungchak dow 32,200 ia, Benjamin krungchak dow 35,400 ia, Dan krungchak dow 62,700 ia, Aser krungchak dow 41,500 ia, Naptali krungchak dow 53,400 ia. Bowkbowk kowi 603,550 ia chekhai.47Naiawngünuüa pungmadawng kowi Levi krungchakuüa kowi tarapchedow rüala büah dowi chekhai.48Tawngplawng kowchow panow Mosi kowi CHAKRAMANG tek pe mih,49“En rüa maru iun khe Levi krungchakuüa kowi dow en narüala kown nadowi, now akeng mih Israeluüa hown paw en nabawngla kown nadowi.50Leviuüa kowi dow taklowp taklangra te kowi kowh tawngah kengah mih uanh maten en nape mingkhetah kown. Naiawngün naming nakhet kown mih kurdik dow amatni napaw kown takla. Amatni dow cham süt tangbung khup rah mih khin khe taklowp taklangra te napiakah hanow nakowi kowh tawngah kengah mih uanh maten nacham kawtla kown, now akeng kowi cham plan khup taklowp taklangra te khe paw amatni chowtaih nakhup kown. Now taklowp taklangra te riaret kowi tavir lut nakhup tangbung hanow nauowi kown mih paw amatni chowtaih. Akeng mih maru che taklowp taklangra te ria kowi kowtawi tatawn hanow nami maru kowi dow nakowngta kown takla.52Akeng mih Israeluüa dow chowlowkkow thumchakuüa arasang nakhup tangbung kown. Amatni dow chowlowkkow tamkhuown krüa kowi nauowi büah kown takla.53Tawkchedow taklowp taklangra te riaret kowi tawi ia tatawn büah kown nadowi. Amatni che tawi tatawn hanow nakowng büah kown. Naiawng rakowi Leviuüa mih taklowp taklangra te riaret kowi tavir lut nakhup tangbung hanow nauowi kown, now taklowp taklangra te mih namingkhet büah kown,” pape khai.54Mosi kowi kowh CHAKRAMANG peah ana mih maten iawng rowprowp Israeluüa mih chang khai bowt.
The Seed Company