Leviuüa22
1Nami kung kowi CHAKRAMANG tek pe Mosi mih,2“Arawn hai achapauüa kowi mami laiklow kowtek pe diah: Ang vüi kowi kowh Israeluüa uang ap-ah mih chimsaima mih uanh srui naring nakawah büah kown takla. Nadowi now ang kowh ming chimsaima mih napiakta ang büah kown chekhai. Ang dow CHAKRAMANG chekhai.3Asürlawkma uowi khe ang vüi kowi kowh ap-ah mih chimsaima mih uanh re-e Arawn krungchakuüa pungmadawng hownia miapaw hang pacham uang lah; uang mih dow uamow lup naia chang kown nadowi bowt. Ang dow CHAKRAMANG chekhai.4Kow kowi pik rawka ngak uowi chepaw, khampha uanh tui towk chepaw Arawn krungchakuüa dow natasür talawk kown. Nami klen kowi cham kak uak mih maru kowi kakta chepaw, khampha uanh tui towk mih maru kowi kakta chepaw, asürlawkma mih chili chalachow mih asadua kowi kakta chepaw, asürlawkma mih maru kowi kakta chepaw — asür alawkma mih chap maten kakta khai hanow amatni dow natasür talawk kown. Naiawngün hownia kowh tasür talawk mih maru dow nalu tui kown takla, now sat kup dowi mowr asür alawkma nauowi kown. Chimsai dowi mowr dow CHAKRAMANG vüi ap-ah mih chimsaima mih uanh naiung cha büah kown nadowi tak.7Now sat kup kung kowi chimsai khowk khe dow nami chakkham naiung cha büah bowt kown. Tawngplawng kowchow panow nami dow amatni kowh chakbak chekhai.8Tawncher kowng nga ün, kaurawng uaramchak makta mih asadua nga ün nacha büah kown nadowi. Amatni che cha hanow natasür talawk büah kown. Ang dow CHAKRAMANG chekhai.9“Uamowuüa kowi kowh ang peah mih ana maten dow nachün büah kown takla. Nadowi now amatni luk kowi aprek nauowi kown, now chün lai dowi mih rakowi amatni dow nakowng kown chekhai. Ang matia vüi amatni kowi lang kraah mih dow ang CHAKRAMANG chekhai.10“Uamow kimchak klen kowi dow ap-ah mih chakkham chimsaima mih miapaw naiung cha kown nadowi. Uamowuüa kowh pinsüa hai sukkri kowi miuüa paw nami chakkham dow natawi ia cha kown nadowi.11Nachenganchepaw uamow hawt ranah mih nar hai uamow kim kowi kowh uang dia mih naruüa dow nami chakkham natawi ia cha kown taih.12Uamowuüa kowh chama che uamow chenchap nadowi kowi akeng chenchap tut-e cham mang khai hanow nami masiuüa dow ap-ah mih chakkham chimsaima mih natawi ia cha kown nadowi bowt.13Nachenganchepaw uamowuüa kowh chamauüa pungmadawng kowi mamaimow hai ahua khuata mih dow kala chah dowi kowi a-pa kim kowi uang plan uowi khai hanow nami chakkham natawi ia cha kown taih. Tawkche uamow kimchak nadowi mih dow miapaw nami chakkham natawi ia cha kown nadowi.14Ap-ah mih chakkham chimsaima mih tawita mata kowh chata khai hanow chata mih maru dow uamow kowi napeah aiawk kown takla. Aia chata khowk mih uanh sung kowi changah tanga bak kowi pabak sung nachüt pela kown takla.15CHAKRAMANG vüi Israeluüa uang ap-ah mih uanh srui dow chimsaima chekhai. Naiawng rakowi naiawngün uanh dow iawngpa mih maru-uüa kowi uamowuüa naia pe chaah kown nadowi. Pe chaah khai hanow nami uanap dow natasürlawk kown chekhai, now cha mih maru dow naka ripra kown. Naiawngün uanap dow ang CHAKRAMANG chimsaiah mih chekhai,” pakhai.17Nami kung kowi CHAKRAMANG tek pe Mosi mih,18“Arawn hai achapauüa hown Israeluüa maten kowi mami laiklow kowtek pe diah: Mami rirow dow enni Israeluüa hai enni tut-e kowh tawi uowi mih akeng chenchapuüa vüi katsang chekhai. Takhamta mih rakowi chepaw, kowmatia sak nau hown kowh chepaw CHAKRAMANG vüi tikah mih uanap che enni uang ap kown nau khai hanow19chiala chepaw, ruapur chepaw, rua chepaw aser auowk uowi dowi mih nauang pawla kown takla. Naiawng nadowi now nami uanap dow CHAKRAMANG napaw enni kown nadowi.20Aser auowk uowi mih tawncher dow hauang ap büa diah. Naiawng mih tawncher dow enni uang ap chepaw CHAKRAMANG nahawt awmrawm enni kown nadowi.21“Takhamta mih rakowi chepaw, kowmatia sak nau hown kowh chang mih chepaw CHAKRAMANG hown taking tasangra nauowila kownkow taking tasangra uanap che enni uang ap kown nau khai hanow chiala chepaw, ruala chepaw, ruapurla chepaw aser auowk uowi dowi mih nauang pawla kown takla. Aser auowk uowi khai hanow nami uanap dow CHAKRAMANG nahawt awmrawm enni kown nadowi.22Tawncher kowi kowh mik duma mih chepaw, hut klowkma mih chepaw, buk kowi ama uowi mih chepaw, rak barlar mih rawka uowi mih chepaw, prak uowi mih chepaw CHAKRAMANG kowi naphuchuala kownkow enni nauang ia pawla kown nadowi. Naiawng mih tawncher dow tawng mih paw phuchuara luk kowi enni naia tang kown nadowi.23Nachenganchepaw enni sak nau hown kowh uanap kowi dow klowng towmma mih chiala hai ruapur chepaw enni naia ap kown taih. Tawkchedow takhamta mih rakowi enni ap kown hanow naiawng mih tawncher enni naia ap kown nadowi.24Tawncher kowi kowh kletah mih chepaw, hangdui plima chepaw, hangdui tuama chepaw, hangdui piakma chepaw CHAKRAMANG vüi enni naia ap kown nadowi. Enni kowuowiah kown mih pren kowi enni kowting khe paw naiawng mih tawncher dow enni naia ap kown nadowi.25Akeng chenchap hownia kowh enni pawah mih paw naiawng mih tawncher dow CHAKRAMANG vüi ap-ah mih chakkham iawng hai enni naia tawngah kown nadowi. Naiawngün kowi dow aser auowk uowi rakowi CHAKRAMANG naawmrawm kown nadowi,” pape khai.26Nami kung kowi CHAKRAMANG tek pe Mosi mih,27“Chia chepaw, ruapur chepaw, rua chepaw — uang pen kung kowi ranit ni mowr mih a-u hown katsang enni natowah kown takla. Raiat ni mih ni hownia now naiawngün mih phuchua müa kowi naia tawngah kown.28Chia chepaw, ruapur chepaw a-u achah pani sang enni nangen kown nadowi.29CHAKRAMANG kowi tekla awmrawm lai kown mih uanap che enni ap kown nau khai hanow CHAKRAMANG napaw enni kownkow ari kowi uowi iawng enni naap-ah kown takla.30Enni phuchuala Thurai mih ngar dow enni ap-ah mih ni khe enni nachata bowk kown takla; auai rau mowr tawngpaw enni natowah kown nadowi. Ang dow CHAKRAMANG chekhai.31“Ang kowh ana pek enni nachün kown takla, now nami iawng enni namang kown takla. Ang dow CHAKRAMANG chekhai.32Ang kowh ming chimsaima mih enni naia piak kown nadowi. Ang dow chimsaima pami enni nachünah kown takla. Ang CHAKRAMANG ang matia vüi ang lang kra enni mih chekhai.33Enni kowh Thurai nachowng kownkow Aigupta pren hownia ang uang lawtla enni mih chekhai. Ang dow CHAKRAMANG chekhai,” pakhai.
The Seed Company