Leviuüa23
1Nami kung kowi CHAKRAMANG tek pe Mosi mih, “Israeluüa kowi maiawng kowtek pe diah: Enni nasunah kownkow tawngpawi ngai chow uowi kown mih ang khowm bowkta enni khowk. Naiawngün pawi maten kowi nauang takua kownkow arasang enni nauang kown.3“Pasapta kowi taruk ni mowr dow enni naia chang lup kown. Tawkche ranit ni mih ni dow Tanai Ni chekhai. Nami Tanai Ni kowi dow arasang enni natakua kown. Nami ni kowi dow tawng lup paw enni nachang kown nadowi; lowra kowi enni cham uowi chepaw nami ni dow CHAKRAMANG vüi Tanai Ni chekhai.4“CHAKRAMANG khowmta bowkta mih pawi maten dow khowmta bowkta mih ni khe enni nasunah reng kown takla.5Ning towng kowh la uown kowi lacher laitali ni khe sat kup khowk now CHAKRAMANG vüi kowi kowh Takat Pawi natarowng kown.6Now nami la lacher laitanga ni hownia dow CHAKRAMANG vüi kowi kowh The pe tuah dowi mih kawm Pawi natarowng kown. Nakhowk khe dow ranit ni mowr mih the pe tuah mih kawm enni naia cha kown nadowi.7Nami ranit ni kowi auown ni hai achur ni khe dow arasang enni natakua kown; nami pre ni mih dow tawng lup paw enni nachang kown nadowi. Nami ranit ni mowr ni towng CHAKRAMANG vüi chakkham uanap enni nachang kown takla,” pakhai.9CHAKRAMANG plan tek pe Mosi mih, “Mami laiklow Israeluüa kowi kowtek pe diah: Ang nape enni kown mih pren kowi enni kowuowi mih khin khe üa hai laih hownia enni ngen luprak towng enni rik ngenah mih hownia pacheng chi uamow tut-e enni nauang pawla reng kown takla.11Nami luprak cheng dow Tanai Ni kung kowi kowh ni khe CHAKRAMANG pur kowi uamow nakrowngah kown. Nahanow CHAKRAMANG napaw enni kown towbowt.12Nakhowk khe CHAKRAMANG vüi tikah mih uanap chang müa aser auowk uowi dowi mih ruapur chah paningchow mih paw enni nauang apla apum kown takla.13Nami klen kowi kawmdi lang iung mih kowi kowh lawk pe kanrawn sau mih kawmdi paw pre set hown 800 gram uang pawla now enni naap-ah kown. Nami dow kawmdi uanap chekhai. Nami dow CHAKRAMANG vüi chakkham uanap chekhai. Nami uanap nam hown dow CHAKRAMANG awmrawm reng chekhai. Nami klen kowi khamah mih uanap chang müa iawng hai grep tui paw enni nauang pawla aset kown takla.14Naiawngün uanap CHAKRAMANG tut-e enni ki ap dowi mowr dow enni kowh luprak mih enni nacha kown nadowi tak. Naiawngün hown dow thawpla kawm chepaw, haiah chepaw, asing chepaw enni nacha kown nadowi tak. Lowra kowi enni cham uowi chepaw nami rirow dow chowngchowng saksakma enni nachünah kown mih chekhai.15“Enni uang pawla luprak cheng mih ni hownia ranit sapta mowr enni narüaah kown.16Now ranit sapta chur kowi kowh Tanai Ni kung kowi dow CHAKRAMANG vüi luprak sar apra pawi enni nachang kown. Nami dow amülüngma mih uanap chang müa enni uang pawla luprak cheng mih ni hownia klowkah now 50 ni chih mih ni khe chekhai.17Nami ni khe dow amülüngma mih uanap chang müa kim towng hownia enni nauang pawla kawm pre pa chi kown takla. Nami kawmpah dow kawmdi lang iung mih pre set ngia mih hown kowh thawpah mih naown kown takla, now tuah paw nathela pe kown takla. Nami dow enni rik ngenah mih luprak sar hownia kowh CHAKRAMANG vüi amülüngma mih uanap chekhai.18Uang ap kawm mih khin khe paningchow mih ruapur chah ranit pum, chiala apum, now ruapurla pre pum enni nauang apla kown takla. Naiawngün tawncher kowi dow aser auowk naia uowi kown nadowi. Naiawngün tawncher hown dow CHAKRAMANG vüi tikah mih uanap pawi enni nachang kown takla, now nami tikah mih uanap hown dow kawmdi uanap hai khamah mih uanap paw enni uang apla kown. Naiawngün dow chakkham uanap chekhai; nami uanap nam hown dow CHAKRAMANG awmrawm reng chekhai.19“Nami klen kowi paw nachangla angak lawt lük müa uanap kownkow ruala apum, now nachangla taking tasangra uanap kownkow paningchow mih ruapur chah pre pum enni nauang apla kown.20Nami ruapur chah pre pum hai rik ngenah mih luprak hown kowh thawpah mih kawm dow CHAKRAMANG pur kowi uamow nakrowngah kown. Nami dow amülüngma mih uanap chekhai. Naiawngün dow CHAKRAMANG vüi kowi kowh ap-ah mih chimsaima mih uanh chekhai. Naiawngün uanh dow uamowuüa kowh vüi bak naown kown.21Nami ni khe dow arasang takua kown mih khin enni nasunah kown. Nami ni khe dow tawng lup paw enni nachang kown nadowi. Lowra kowi enni cham uowi chepaw nami rirow dow chowngchowng saksakma enni nachünah kown mih chekhai.22“Üa kowi hai laih kowi enni kua luprak mih khin khe aria aret kowi kowh luprak dow enni nakuala kown nadowi, now dowh mih hai tim mih paw enni nalümla kown nadowi. Naiawngün dow pren kowi kowh ngarai miuüa hai akeng chenchapuüa vüi enni nata towla kown takla. Ang dow CHAKRAMANG enni kowh Thurai chekhai,” pakhai.23Nami kung kowi CHAKRAMANG tek pe Mosi mih, “Israeluüa kowi maiawng kowtek pe diah: Ning towng ranit la kowi kowh ni uown dow tawng lup paw nachang dowi kownkow enni naphuangah kown. Nami ni dow enni natum pe baw hanow arasang takua kown mih khin enni nasunah kown.25Nami ni khe dow tawng lup paw enni nachang kown nadowi. Nami ni kowi dow CHAKRAMANG vüi chakkham uanap pawi enni nachang kown takla,” pakhai.26Nami kung kowi CHAKRAMANG tek pe Mosi mih,27“Ranit la kowi kowh lacher hamüt ni khe dow angak lawt lük müa pawi enni nachang kown. Nami ni kowi dow achimsaima mih takuara khin enni nasunah kown, now angak hownia tarip mih krang natüngla kownkow enni nakhang hawm kown. Nami ni kowi dow CHAKRAMANG vüi chakkham uanap pawi paw enni nachangla kown takla.28Nami ni dow enni kowh angak lawt lük müa pawi chekhai rakowi tawng lup paw enni nachang kown nadowi. Nami ni dow enni kowh angak maten nalawtta enni kownkow CHAKRAMANG enni kowh Thurai pur kowi uamow nachang enni uanap kown.29Nami ni kowi kowh khang hawm dowi miuüa kowi dow amatni kowh chenchap hownia ang nabatta kown.30Now nami ni kowi kowh chang lup miuüa kowi paw amatni kowh chenchap pungmadawng hownia ang napiakta kown.31Nami ni khe dow tawng lup paw enni nachang kown nadowi. Lowra kowi enni cham uowi chepaw nami rirow dow chowngchowng saksakma enni nachünah kown mih chekhai.32Nami ni dow enni vüi Tanai Ni chekhai. Now nami ni khe dow khang pe hawm se enni nakham ngare kown takla. Nami Tanai Ni dow ranit la kowi kowh lacher taku ni khe sat kup hownia auai ni lacher hamüt ni sat kup iüp mowr enni nasunah kown,” pakhai.33Nami kung kowi CHAKRAMANG tek pe Mosi mih, “Mami laiklow Israeluüa kowi kowtek pe diah: Ranit la kowi kowh lacher laitanga ni khe dow CHAKRAMANG vüi Te Pawi enni nachang kown. Nami Te Pawi dow ranit ni mowr enni nasunah kown.35Nami pawi uown ni kowi dow arasang takua kown mih khin enni nasunah kown. Nami ni khe dow tawng lup paw enni nachang kown nadowi.36Nami ranit ni mih pawi ni chur dowi mowr dow ni towng CHAKRAMANG vüi chakkham uanap pawi enni nachang kown takla. Nami pawi chur mih auai ni khe paw arasang takua kown mih khin enni naplan sun iawk kown, now nami ni paw CHAKRAMANG vüi chakkham uanap pawi enni nachangla iawk kown takla. Naiawng rakowi nami ni paw tawng lup paw enni nachang kown nadowi tak.37“Naiawngün pawi maten dow CHAKRAMANG khowm bowk enni mih chekhai. Nami pawi ni khe chakkham uanap enni naia changla kownkow arasang takua kown mih khin enni nasunah kown. Nami uanap kowi kowh enni naap-ah kown mih dow chakkham uanap, tikah mih uanap, kawmdi uanap, tawncher uanap hai khamah mih uanap chekhai. Naiawngün uanap maten dow CHAKRAMANG khowmta bowkta enni mih akhin kowi enni nachangah kown takla.38Nami klen kowi Tanai Ni kowi kowh uanap, CHAKRAMANG vüi akeng mih uanap maten, takhamta mih rakowi kowh uanap hai kowmatia sak nau hown kowh uanap paw enni naia ap kown.39“Üa hai laih kowi kowh luprak enni ki tawnta prowng khe ranit la kowi kowh lacher laitanga ni khe CHAKRAMANG vüi te pawi enni nasun kown. Nami te pawi dow ranit ni mowr enni nasunah kown takla. Nami pawi auown ni hai raiat ni mih ni dow enni vüi Tanai Ni naown kown.40Pawi uown ni kowi dow singh hownia kowh uih-ak lang iung mih ün, chekmarawng ram ün, uaklung kawng hai aw pang kowi kowh aram chakma mih singh mia ün enni nacham krawi paw kown. Now CHAKRAMANG enni kowh Thurai pur kowi ranit ni mowr enni napiaw kown.41CHAKRAMANG vüi kowi kowh nami pawi dow ning towng ranit ni mowr chi enni nasunah kown. Nami pawi dow ning towng kowh ranit la khe enni nachang kown takla. Nami dow chowngchowng saksakma enni nachünah kown mih rirow chekhai.42Nami pawi sun khe dow enni Israeluüa maten ranit ni mowr te kowi nauowi kown takla.43Aigupta pren hownia ang uang lawtla enni khe te kowi ang pe uowi enni khai, now nami lawnguan dow nami pawi sunra hownia enni kowh krungchakuüa natuk kown towbowt. Ang dow CHAKRAMANG enni kowh Thurai chekhai,” pakhai.44Nami kung kowi dow Mosi kowkowiah now CHAKRAMANG khowmta bowkta pe mih pawi lawnguan maten Israeluüa kowi kowtek pe khai.
The Seed Company