Leviuüa15
1Mosi hai Arawn iüah kowi CHAKRAMANG tek pe mih,2“Israeluüa kowi kowtek pe diah: Rawka uowi rakowi kachakuüa kowh khampha uanh hownia aiawnglowma towk naklak mih tui dow asür alawkma chekhai.3Naiawng mih tui dow hing towkta hüah chepaw, towk akat now rim khai chepaw naiawng mih tui towk mih kachakuüa mih asür alawkma naown kown.4Naiawng asür alawkma uowi reng tak khe nami kachakuüa krawi mawkah mih mawk rah hai krawi chowmah mih chowm rah maten natawi tasür talawk kown.5Naiawng asür alawkma mih maru mawkah mih mawk rah kowi kak mih maru dow aia kowh tawnguat nachuta hanow nalu kown takla, now aia mih sat kup dowi mowr asür alawkma nauowi kown.6Naiawng asür alawkma mih maru chowmah mih chowm rah kowi chowm mih maru dow aia kowh tawnguat nachuta hanow nalu kown takla. Aia dow sat kup dowi mowr asür alawkma nauowi kown.7Khampha uanh hownia aiawnglowma tui awr towk mih maru kowi kakta mih maru paw aia kowh tawnguat nachuta hanow nalu kown takla, now aia mih sat kup dowi mowr asür alawkma nauowi kown.8Now kow hownia aiawnglowma tui awr towk mih maru che sürlawkma nadowi mih maru kowi thawkta khai hanow nami sürlawkma nadowi mih maru paw aia kowh tawnguat nachuta hanow nalu kown takla, now aia mih sat kup dowi mowr asür alawkma nauowi kown.9Naiawng aiawnglowma tui awr towk mih maru cham kowi khari mih khin paw nauowi kown. Nami khin khe kowh aia chowmah mih tawncher luk kowi kowh dauah mih uan paw natasür talawk kown.10Nami maru chowmah mih chowm rah kowi kak mih maru dow aia kowh tawnguat nachuta hanow nalu kown takla, now aia mih sat kup dowi mowr asür alawkma nauowi kown.11Naiawng mih maru che sia rut dowi matchang cham kakta maru khai hanow aia kakah mih maru paw nachuta tawnguat hanow nalu kown takla, now aia mih sat kup dowi mowr asür alawkma nauowi kown.12Naiawng mih maru che bawn bia kowi kakta khai hanow nami bawn bia dow nateuta kown takla. Now singh hown kowh bia kowi che kakta khai hanow nami bia dow tui hown klangiungma nasawk sauta kown.13“Now naiawng khampha uanh hownia tui awr towk mih iung khe dow aia mih natasür natalawkla dowi bowt kownkow ranit ni mowr nachawngah kown takla. Ranit ni chih khe mih aia kowh tawnguat nachuta hanow hawriang tui hown nalu kown takla, nahanow aia mih asürlawkma nauowi kown nadowi bowt.14Now raiat ni mih ni khe dow kimtawn uatur chepaw, kaurawng uatur chepaw napawla pre buk hanow taklowp taklangra te plawt re-e CHAKRAMANG pur kowi nauang kown takla. Nami uatur pre buk mih dow uamow rut kowi naap pe kown.15Nami uatur pre buk mih hown dow angak lawt lük müa uanap vüi lowk, now tikah mih uanap vüi lowk uamow naap-ah kown. Naiawng hai aiawnglowma khampha uanh hownia tui awr towk mih maru kowh tasür talawk mih dow CHAKRAMANG pur kowi uamow nakhuta pe kown.16“Lowra kachakuüa kowh che khampha uanh tui chawn khai hanow khampha uanh tui chawn mih kachakuüa mih nalu kown takla, now aia mih sat kup dowi mowr asür alawkma nauowi kown.17Khampha uanh tui che dawnguan kowi chepaw, chak pik hown kowh uanh kowi chepaw talük takak khai hanow naiawngün dow nachuta kown takla, now naiawngün uanh mih sat kup dowi mowr asürlawkma nauowi kown.18Now masiuüa hown kachakuüa taphua taiua kung kowi paw amatchi pre ia nalu kown takla, now amatchi mih sat kup dowi mowr asür alawkma nauowi iüah kown.19“Masiuüa kowh dow la towng uisawng uowi reng chekhai. Naiawng uisawng uowi mih masiuüa dow aia kowh vi hawk mih rakowi ranit ni mowr asür alawkma nauowi kown. Naiawng uowi thüm khe nami masiuüa kowi kak mih maru mih sat kup dowi mowr asür alawkma nauowi kown.20Naiawng uisawng uowi thüm khe nami masiuüa krawi mawkah mih mawk rah hai krawi chowmah mih chowm rah srui natawi tasür talawk kown.21Nami tasür talawk khowk mih mawk rah kowi chepaw, chowm rah kowi chepaw kak mih maru paw aia kowh tawnguat nachuta hanow nalu kown takla, now aia mih sat kup dowi mowr asür alawkma nauowi kown.24Naiawng uisawng uowi thüm mih masiuüa hown kachakuüa che taphua taiua hai masiuüa kowh vi che aia kow kowi talük takak khai hanow nami kachakuüa paw ranit ni mowr asür alawkma nauowi kown. Nami ranit ni takra kowi aia cham krawi mawkla mih mawk rah paw natawi tasür talawk kown.25“Now masiuüa kowh che la towng kowh rirow uowi mih klen kowi paw hawk vi khai hanow nami vi hawk mih prowng dowi mowr rirow uowi khe kowh iawng asür alawkma nauowi kown.26Naiawng vi hawk khe paw nami masiuüa mawkah mih mawk rah hai chowmah mih chowm rah mih rirow uowi khe kowh iawng natawi tasür talawk kown.27Nami masiuüa mawkah mih mawk rah hai chowmah mih chowm rah kowi kak mih maru paw asür alawkma naown kown. Naiawngün kowi kakta mih maru dow aia kowh tawnguat nachuta hanow nalu kown takla, now aia mih sat kup dowi mowr asür alawkma nauowi kown.28Naiawng vi hawk mih prowng kung kowi paw prowng mih ni hownia klowkah now ranit ni mowr asür alawkma nauowi kown, now nami kung kowi dow sürlawkma naown kown nadowi bowt.29Now raiat ni mih ni khe aia mih kimtawn uatur chepaw, kaurawng uatur chepaw napawla pre buk hanow taklowp taklangra te plawt re-e uamow tut-e nakowkowi kown takla.30Nami uatur pre buk mih hown angak lawt lük müa uanap vüi lowk, now tikah mih uanap vüi lowk uamow naap-ah kown. Naiawng hai aia kowh vi hawk mih hownia tasür talawk mih dow CHAKRAMANG pur kowi uamow nakhuta pe kown,” pakhai.31Nami kung kowi Mosi hai Arawn iüah kowi CHAKRAMANG tek pe mih, “Israeluüa pungmadawng kowi ang kowh taklowp taklangra te uowi. Naiawng rakowi taklowp taklangra te kowi sürlawkta hanow nakowngla büah dowi kownkow asür alawkma mih chap maten hownia Israeluüa kowi pe tahenah iüa diah,” pakhai.32Mami rirow dow kachakuüa kowh khampha uanh hownia aiawnglowma tui awr towk khe kowh vüi, uisawng uowi khe kowh vüi, masiuüa hai kachakuüa taphua taiua khe kowh vüi, asür alawkma mih masiuüa hown taphua taiua khe kowh vüi ün chekhai. Naiawngün hown tasür talawk khai hanow mami rirow iawng nachangah kown mih chekhai.
The Seed Company