Leviuüa16
1Ana pek iawng nadowi hai CHAKRAMANG pur kowi awr ap maikhük rakowi Arawn kowh chapa pre ia kowng kung kowi Mosi hown CHAKRAMANG uang taklang khai.2Mosi kowi CHAKRAMANG tek pe mih, “Taklowp taklangra te lak kowi kowh Lang Chimsai Mih Towklak kowi sangbowk laitawm tawkpla uowi. Nami sangbowk laitawm tawkpla küm luk kowi uangnim iawng ang uang tatüng reng. Naiawng rakowi en taimow Arawn mih aia nau mih khin khe hauang pacham kup lah. Aia che uang kup naklak khai hanow aia mih nakowng kown chekhai.3“Lang Chimsai mih towklak kowi Arawn kowkup kown nau now chiala apum hai ruapurla apum narik kamrütta hüah kown takla. Chiala dow angak lawt lük müa uanap vüi, now ruapurla dow tikah mih uanap chang müa vüi aia nasunah kown.4Nami kung kowi dow aia mih narik lu tui kown takla. Ki lu tui kung kowi dow adipükchow mih la hown kowh kowrmow nakhup kown, now adipükchow mih la hown kowh kraksa dawngh nakruala kown. Nami klen kowi adipükchow mih la hown kowh kekawm paw nakawmla hanow adipükchow mih la hown kowh napawng nasuila kown. Naiawngün dow chimsaima mih tawnguat chekhai.5Israeluüa pungmadawng hownia ruala pre pum hai ruapurla apum Arawn kowi nauang pawla pe kown. Nami ruala pre pum mih dow angak lawt lük müa uanap vüi nasunah kown, now ruapurla apum mih dow tikah mih uanap chang müa nasunah kown.6“Aiamat kowh angak hai aia krungchakuüa kowh angak nalawtla kownkow angak lawt lük müa uanap vüi kowi kowh chiala Arawn mih naap kown takla.7Nami kung kowi dow angak lawt lük müa ruala pre pum mih taklowp taklangra te plawt re-e CHAKRAMANG pur kowi aia nakowpawla kown.8Nami ruala pre pum mih dow alawt müa apum, now CHAKRAMANG vüi nasunah kown mih apum chekhai. Naiawng rakowi tawng mih chow alawt müa hai tawng mih chow CHAKRAMANG vüi pami natukla kownkow nakuak pe plang kown.9Kuak pe plang khe kowh CHAKRAMANG vüi tatawng mih ruala dow napawah hanow angak lawt lük müa uanap Arawn nachangla kown.10Now kuak pe plang khe kowh alawt müa tatawng mih ruala dow CHAKRAMANG pur kowi asing nakowpawla kown takla. Nami kung kowi dow maru kawmuüa kowh angak nacham kurla kownkow nami ruala kowi süngrüp süngkangma kowi nacham saah kown.11“Aiamat kowh angak hai aia krungchakuüa kowh angak nalawtla kownkow angak lawt lük müa uanap vüi uang pawla mih chiala dow Arawn nangenah kown.12Now CHAKRAMANG pur kowi kowh phuchuara hownia mairing pawk müa puh hown tek mup mowr mairing mih napawah kown, now anam iungma mih maikhük towk müa than di adidüpchow mih paw napawla pre chawm kown. Naiawngün pawla now taklowp taklangra te kowi kowh Lang Chimsai mih towklak kowi Arawn nakowkup kown.13Now CHAKRAMANG pur kowi nami towklak kowi aia pawla mih mairing luk kowi aia nathe pe than di kown. Nahanow nami maikhük hown sangbowk laitawm tawkpla küm mih nakhi-ah kown nadowi bowt, now aia paw nakowng kown nadowi bowt.14Nami kung kowi dow Arawn mih nami chiala vi rutchawk hown iu krawah now sangbowk laitawm tawkpla küm pur prakowi nathetah ranit kat kown.15“Nami kung kowi dow maru kawmuüa kowh angak lawt lük müa ruala mih Arawn nangenah kown. Nami ruala vi paw napawla sangrum hanow taklowp taklangra te lak kowi kowh Lang Chimsai mih towklak kowi chiala vi hown kowh changah iawng nakowchang kown; sangbowk laitawm tawkpla küm luk kowi hai pur prakowi mih nami ruala vi paw nakrawi thetah kown.16Taklowp taklangra te kowi kowh Lang Chimsai mih towklak dow naiawng hai Arawn nachim nasaiah kown. Nami klen kowi taklowp taklangra te kowi kowh akeng mih arah maten paw Israeluüa kowh angak hai asür alawkma mih dawng kowi uowi mih chekhai rakowi naiawng aia nakhuta kown takla.17Now aiamat kowh angak hai aia krungchak kowh angak hown Israel chen pachenma kowh angak nalawtla kownkow taklowp taklangra te kowi kowh Lang Chimsai mih towklak kowi Arawn nakowchang lup kown. Nami towklak hownia Arawn uang lawt dowi mowr dow taklowp taklangra te kowi miapaw naia uowi kown nadowi.18Now taklowp taklangra te hownia uang lawt hanow CHAKRAMANG pur kowi kowh phuchuara sürlawkma mih Arawn nakhuta pe kown. Aia dow chiala hai ruala vi napawah hanow phuchuara kowi kowh nang tali klüng mih kowi nakrawi plikah kown.19Nami kung kowi dow nami vi mih rutchawk hown napawah hanow phuchuara kowi ranit kat nakrawi thetah kown. Naiawng hai Israeluüa kowh angak rakowi tasür talawk mih phuchuara dow aia nachimsaiah kown.20“Lang Chimsai mih Arah hown taklowp taklangra te hai phuchuara ki chimsaita kung kowi dow nalawtah kown mih ruala Arawn nauang pawla kown.21Aia kowh rut pre pra trui nami ruala lu kowi aia natangah kown. Now Israeluüa kowh angak maten, aprek maten hai tawita mata mih maten nataphuang hanow naiawngün mih nami ruala luk kowi natangta bowk kown. Nami kung kowi dow nacham lawt rua kownkow khowmah bowkah mih maru kowi nami ruala aia naap pe kown, now süngrüp süngkangma kowi aia nacham pe saah kown.22Nami maru dow nami ruala kowi süngrüp süngkangma kowi nacham lawtah kown. Now nami ruala mih süngrüp süngkangma kowi Israeluüa kowh angak maten nacham kurla kown.23“Nami kung kowi dow taklowp taklangra te lak kowi Arawn nakup iawk kown. Now nakowi mih Lang Chimsai mih towklak kowi kup khe kowh aia khupla mih adipükchow mih la hown kowh tawnguat maten naklüpla hanow natowla kown.24Nami kung kowi dow nami hownia uang lawt hanow taklowp taklangra te viadawng kowi nalu tui kown, now uamowuüa khupah reng mih tawnguat aia nakhup bowt kown. Nami kung kowi dow aiamat vüi lowk, maru kawmuüa vüi lowk tikah mih uanap naap kown. Naiawng hai aiamat kowh angak hai maru kawmuüa kowh angak mih nalawtta kownkow aia nachang kown.25Now angak lawt lük müa uanap kowi kowh ap-ah mih tawncher sau dow phuchuara luk kowi aia natikta kown takla.26“Süngrüp süngkangma kowi kowh cham lawt rua mih maru dow uang mang hown krowksang nachuta dawnguan hanow nalu kown takla. Nami dowi rawn dow amatni kowh tangbung khup rah kowi naia kup kown nadowi.27Now angak lawt lük müa uanap kowi kowh ap-ah mih chiala vi hai ruala vi mih Lang Chimsai mih towklak kowi kupla khai rakowi nami chiala nga hai ruala nga dow nacham tikta kown takla, now apik hai akih paw natikta kown takla. Naiawngün dow amatni uowi rah tangbung khup rah uat kowi nacham tikah kown.28Naiawngün cham tik mih maru dow uang plan hown krowksang nachuta dawnguan hanow nalu kown takla. Nami dowi rawn dow amatni kowh tangbung khup rah kowi naia kup kown nadowi.29“Now paning kowi pani chi khang pe hawm khükhü chang lup dowi kowi enni nakham ngare kown takla. Naiawng enni nauowi kown mih dow ning towng ranit la kowi kowh lacher hamüt ni khe chekhai. Nami dow chowngchowng saksakma enni vüi ari arow naown kown. Nami rirow dow enni Israeluüa hai enni tut-e kowh tawi uowi mih akeng chenchap paw nachün ngengche kown takla.30Nami ni khe dow enni kowh angak nalawtta enni kownkow angak lawt lük müa uanap enni nachang kown takla. Nahanow CHAKRAMANG mik kowi sürlawkma enni naown kown nadowi bowt.31Nami ni dow enni vüi Tanai Ni chekhai. Nami ni dow khang pe hawm khükhü chang lup dowi kowi enni nakham ngare kown. Nami dow chowngchowng saksakma enni vüi ari arow chekhai.32Naiawng mih uanap pawi kowi kowh lup chang mih dow uamow lang kri mih nachang kown takla. Uamow lang kri mih dow naiawng mih lup chang khe adipükchow mih la hown kowh tawnguat nakhupla kown. Lang Chimsai mih Towk lak, taklowp taklangra te, phuchuara, uamowuüa hai Israeluüa maten kowi nachim nasaiah kown. Now pur pra khe dow a-pa kowh uamow lang kri mih rah ta paw mih maru naiawng mih lup nata chang kown takla.34“Israeluüa kowh angak maten nalawtta kownkow naiawng mih angak lawt lük müa pawi mih ning towng pakat chi enni nasun kown takla. Nami dow chowngchowng saksakma enni vüi ari arow chekhai,” pakhai.
Now CHAKRAMANG ana pek iawng lup maten mih Mosi chang khai bowt.
Now CHAKRAMANG ana pek iawng lup maten mih Mosi chang khai bowt.
The Seed Company