Leviuüa14
1CHAKRAMANG tek pe Mosi mih,2“Mami dow pik rawka ngak phaw mih maru tachim tasai müa rirow chekhai. Pik rawka ngak phaw mih maru che aia kowh rawka iung khowk powm iawng now uamow tut-e nakowpawla kown takla.3Now nami maru kowi mih tangbung khup rah uat kowi uamow nakowmüah kown. Nami maru kowh che pik rawka ngak iung khai bowt hanow4nami maru vüi sürlawkma nadowi mih uakling sing pre buk, sidar singh klowk lowk, aringma mih la iang adung, now lawngthow singh kre pakre uamow nauang pe pawla kown.5Now nami uakling pre buk mih hownia nangenah lowk kown mih uamow napeah ana kown. Nami dow bawn kawng kowi kowh towah mih hawriang tui luk kowi nangenah kown.6Nami hawriang tui luk kowi kowh ngenah mih uakling vi kowi dow alowk mih uakling sing, sidar singh klowk, aringma mih la iang hai lawngthow kre mih uamow nachimah kown.7Now pik rawka ngak hownia chimsaiah kown mih maru kowi nami vi uamow nathet pe ranit kat kown. Now nami maru dow sürlawkma nadowi bowt pami uamow naphuangah kown, now alowk mih uakling sing dow uamow nalawtta kown takla.8Now nami sürlawk dowi bowt mih maru mih aia kowh khupdip tawngklai nachuta prowng kown, now aia kowh pik pawi hai sam ün khaita hanow nalu kown takla. Nahanow aia dow sürlawkma naown kown nadowi bowt, now aia dow tangbung khup rah kowi uang ia uang kown towbowt. Tawkchedow aiamat tangbung lak kowi ranit ni mowr mih uang ia kup kown nadowi tak.9Now ranit ni mih ni khe dow aia kowh sam ün, mawmpawi ün, mikkhu pawi ün hai pik pawi ün naplan khaita kown takla. Now aia kowh khupdip tawngklai paw naplan chuta iawk kown, now lu paw naplan lu iawk kown takla. Nahanow aia dow asürlawkma naown kown nadowi bowt.10“Now raiat ni mih ni khe dow nami maru mih ruapur chah pre pum hai aningchow mih ruapur iia papum nauang pawla kown takla. Naiawngün dow aser auowk naia uowi kown nadowi. Now kawmdi uanap chang müa lawk pe kanrawn sau mih kawmdi lang iung mih paw tali set hown 200 gram, now kanrawn sau paw apua ngia aia nauang pawla kown takla.11Nami maru kowi kowh chimsaiah mih uamow mih nami maru kowi taklowp taklangra te plawt re-e CHAKRAMANG pur kowi nauang pawla kown. Now naap-ah kownkow nami maru uang pawla mih uanh paw CHAKRAMANG pur kowi uamow nauang pawla kown takla.12“Now ruapur chah pre pum mih hownia papum mih ruapur chah dow uamow nachangla aprek sung uanap kown. Nami ruapur chah hai apua hown ditchow mih kanrawn sau dow CHAKRAMANG pur kowi uamow nakrowngah kown. Nami dow amülüngma mih uanap chekhai.13Nami ruapur chah dow angak lawt lük müa uanap hai tikah mih uanap chang khe kowh arah chimsaima mih kowi kowh tawncher ngenra re-e nangenah kown takla. Nami aprek sung uanap kowi kowh chaknga paw angak lawt lük müa uanap kowi kowh chaknga iawng uamow kakbak chekhai. Nami uanap dow achimsaima chekhai.14Now nami aprek sung uanap kowi kowh tawncher vi mih uamow napawah sangrum kown. Nami vi dow sürlawkma nadowi bowt kown mih maru kowh hawmlawm pra kowh param iah kowi, hawmlawm pra kowh rutma kowi hai hawmlawm pra kowh khawkma kowi uamow namai pe kown.15Now uamow mih kanrawn sau napawah apua hown ditchow hanow aia lakuai pra kowh rutpha kowi naklaiah kown.16Now aia mih lakuai pra rutpha kowi kowh kanrawn sau kowi hawmlawm pra kowh rutchawk hown iu chimah hanow CHAKRAMANG pur kowi ranit kat nathetah kown.17Now aia rutpha kowi kowh ta lat mih kanrawn sau dow aia napawah sangrum kown. Nami kanrawn sau dow sürlawkma nadowi bowt kown mih maru kowh hawmlawm pra kowh param iah kowi, hawmlawm pra kowh rutma kowi hai hawmlawm pra kowh khawkma kowi naplik pe kown. Nami sau paw tawncher vi plikra kowi nakrawi plikah kown.18Now rutpha kowi kowh ta lat mih sau dow sürlawkma nadowi bowt kown mih maru lu kowi uamow naphawk pe kown. Naiawng hai CHAKRAMANG pur kowi nami maru kowh sürlawi dow uamow nakhuta pe kown.19“Nami kung kowi dow sürlawkma nadowi bowt kown mih maru kowi nachimsaiah kownkow angak lawt lük müa uanap uamow naap pe kown. Now tikah mih uanap kowi kowh tawncher mih uamow nangenah kown.20Now uamow mih phuchuara luk kowi tikah mih uanap hai kawmdi uanap naap kown. Naiawng hai nami maru kowi dow uamow nachimsaiah kown, nahanow nami maru mih nachimsai kown towbowt.21“Nachenganchepaw pik rawka iung mih maru che ngaraima chekhai hanow aia kowh angak lawt lük müa uanap chang müa uamow tut-e nauang pawla ruapur chah papum chow kown. Nami maru kowi nachimsaiah kownkow uamow mih nami ruapur chah nakrowngah kown. Now kawmdi uanap chang müa paw kanrawn sau hown kowh lawkah mih kawmdi lang iung mih aset hown 400 gram hai kanrawn sau apua hown ditchow aia nauang pawla kown takla.22Aia uang ia pawla mih hownia kimtawn uatur chepaw, kaurawng uatur chepaw nauang pawla pre buk chi kown takla. Nami pre buk mih hownia lowk dow angak lawt lük müa uanap nachangla kown, now alowk mih dow tikah mih uanap nachangla kown.23Naiawngün dow aia tachim tasai müa raiat ni mih ni khe taklowp taklangra te plawt re-e CHAKRAMANG pur kowi uamow tut-e nami maru nauang pawla kown.24Now aprek sung uanap chang müa ruapur chah hai kanrawn sau apua hown ditchow mih uamow napawah kown, now naiawngün dow CHAKRAMANG pur kowi aia nakrowngah kown. Nami dow amülüngma mih uanap chekhai.25“Aprek sung uanap kowi kowh tawncher dow nangenah hanow avi mih uamow napawah sangrum kown. Nami vi dow sürlawkma nadowi bowt kown mih maru kowh hawmlawm pra kowh param iah kowi, hawmlawm pra kowh rutma kowi hai hawmlawm pra kowh khawkma kowi uamow namai pe kown.26Now aia mih kanrawn sau napawah sangrum hanow aia lakuai pra kowh rutpha kowi naklaiah kown.27Now aia dow lakuai pra rutpha kowi kowh kanrawn sau kowi hawmlawm pra kowh rutchawk hown iu chimah hanow CHAKRAMANG pur kowi ranit kat nathetah kown.28Now uamow mih aia rutpha kowi kowh ta lat mih kanrawn sau napawah sangrum kown, now nami sau mih sürlawkma nadowi bowt kown mih maru kowi naplik pe kown; aia dow tawncher vi plikra kowi nakrawi plik pe kown. Aia dow nami maru hawmlawm pra kowh param iah kowi, hawmlawm pra kowh rutma kowi hai hawmlawm pra kowh khawkma kowi naplik pe kown.29Now rutpha kowi kowh ta lat mih sau dow sürlawkma nadowi bowt kown mih maru lu kowi uamow naphawk pe kown. Naiawng hai CHAKRAMANG pur kowi nami maru kowh sürlawk dow uamow nakhuta pe kown.30“Now nami maru uang ia pawla mih hownia kaurawng uatur chepaw, kimtawn uatur chepaw uamow napawah pre buk kown. Nami pre buk mih hownia lowk dow angak lawt lük müa uanap nachangla kown, now alowk mih dow tikah mih uanap nachangla kown. Naiawngün dow kawmdi uanap hown aia naap-ah kown. Naiawng hai CHAKRAMANG pur kowi nami maru kowi mih uamow nachimsaiah kown.32“Nami dow ngarai miuüa kowh tachim tasai müa uanap rirow chekhai,” pakhai.33Nami kung kowi CHAKRAMANG tek pe Mosi hai Arawn iüah mih,34“Kanan pren mih nachangla dawngthawnguan kownkow ang nape powng enni kown. Nami pren kowi enni kowuowi mih khin khe enni kowh kim kowi che mawd khe kowh iawng ang pe phawah khai hanow35nami kim iah mih uamow tut-e nakowkowi kown. Aia tek pe uamow kown mih, ‘Ang kim kowi mawd mih iawng uang phaw khai,’ napa kown.36Nahanow kowmü mawd kownkow kim kowi uamow kowkup dowi rawn kim kowi kowh uanh uowi mih maten nalawtta kown mih aia napeah ana kown. Naiawng che kim iah chang hanow kim kowi kowh uanh mih nasürlawk kown nadowi bowt. Nami kung kowi dow uamow nakowkup hanow nami kim nakowmü kown.37Now kimbang mawd mih che asingma chepaw, aringma chepaw kimbang kowi büp ngamlam mih aia khi hanow38nami kim hownia uang lawt now nami kim mih ranit ni mowr uamow nape büngta kown.39Now ranit ni mih ni khe dow uamow naplan uangah hanow nami kim nauang plan müah iawk kown. Nami mawd mih che kimbang kowi krawi chai ngamlam khai hanow40pingla kim mih hua kowi kowh mawd mih hua mih marow uat kowi kowh sürlawkma mih arah kowi nacham kuakta kownkow uamow napeah ana kown.41Now kim iah mih kim lak kowi kowh kimbang maten nakhaita bowk kown, nahanow nami khaiia dow marow uat kowi sürlawkma mih arah kowi nacham kuakta kown takla.42Now mawd mih re-e kowh pawta pe hua mih re-e hua sar plan tow pe hanow bawnnai hown aia naplan miaah iawk kown takla.43“Now kimbang kowi kowh hua klaita pe kowh miata kung kowi paw nami mawd mih che plan phaw khai hanow44uamow kowplan kowiah now nami kim naplan müah iawk kown. Now mawd khe kowh iawng mih krawi chai ngamlam khai hanow nami dow mawd mih chekhai pami natukah kown takla. Nami kim dow asürlawkma chekhai.45Nami kim dow kim iah napiakta kown takla. Changla kim mih hua ün, miala kim mih bawnnai ün hai singh ün napiakta bowk hanow marow uat kowi kowh asürlawkma mih arah kowi aia nacham kuakta kown takla.46“Now ranit ni mowr büngta hüah mih khin khe nami kim kowi kowkup khai mih maru dow nami ni sat kup dowi mowr asürlawkma nauowi kown.47Nami kim kowi kowcha kowkham mih uowi khai chepaw, kowmüi mih uowi khai chepaw nami maru dow aia kowh khupdip tawngklai nachuta kown takla.48“Nachenganchepaw nami kim ki miata kung kowi uamow plan müah iawk khe nami mawd mih che kimbang kowi uowi dowi bowt hanow nami kim dow sürlawkma nadowi bowt pami uamow naphuangah kown. Tawngplawng kowchow panow nami kim kowi kowh mawd dow mit khai bowt.49Now nami kim chimsaila kownkow uakling sing pre buk, sidar singh klowk lowk, aringma mih la iang adung hai lawngthow singh kre pakre uamow napawah kown.50Nami uakling dow bawn kawng kowi kowh towah mih hawriang tui luk kowi uamow nangenah lowk kown.51Nami hawriang tui luk kowi kowh ngenah mih uakling vi kowi dow alowk mih uakling sing, sidar singh klowk, aringma mih la iang hai lawngthow kre mih uamow nachimah kown, now nami vi dow kim kowi aia nakrawi thetah ranit kat kown.52Naiawng hai nami kim dow uamow nachimsaiah kown.53Now nami uakling sing dow marow uat kowi nacham pawla hanow kaurawng kowi uamow nacham lawtah kown. Naiawng hai nami kim kowi kowh asürlawkma mih dow uamow nachimsaiah kown. Nahanow nami kim mih nachimsai kown towbowt,” pakhai.54Maiawngün dow pik rawka ngak, rak mih rawka, pik bau rawka, bawr rawka, pik kowi akawma mih rawka, kim kowi hai uanh kowi mawd khe kowh rirow chekhai.57Naiawngün rawka hownia dow maru lah, uanh lah tawng khe chow sürlawk dowi kown mih hai tawng khe chow sürlawk kown mih mami rirow kowi uowi bowk chekhai.
Mami dow pik rawka ngak hai mawd mih lawnguan kowi kowh rirow chekhai.
Mami dow pik rawka ngak hai mawd mih lawnguan kowi kowh rirow chekhai.
The Seed Company