Leviuüa13
1Mosi hai Arawn iüah kowi CHAKRAMANG tek pe mih,2“Lowra maru kowh pik bau khai chepaw, bawr phaw khai chepaw, pik rawka ngak phaw khai chepaw nami maru kowi dow uamowuüa tut-e nakowpawla kown takla.3Now uamowuüa mih nami maru kowh pik rawka phaw mih re-e namü pe kown. Now nami rawka re-e kowh pik pawi ün akawma phaw hai pik lak-e paw nami ma lang büp khai hanow nami dow pik rawka ngak pami enni natukah kown takla. Naiawngün rawka mü pe kung kowi nami maru mih asürlawkma chekhai pami uamow naphuangah kown.4Tawkchedow aia pik kowi kowh rawka phaw mih re-e kowh ma akawma phaw khai chepaw nami che pik lak-e lang büp dowi hai ma pawkra re-e kowh pik pawi ün akawma phaw dowi hanow nami maru kowi mih ranit ni mowr akeng mih maru-uüa hownia uamow nacham lang pe uowiah kown.5Now ranit ni mih ni khe dow nami maru kowi uamow naplan müah iawk kown. Nami rawka che pik kowi pawk paw krawi pawk dowi bowt hai klowi paw taklowi dowi bowt hanow nami maru kowi mih uamow nacham lang pe uowiah ranit ni iawk kown.6Now ranit ni mih ni khe nami maru kowi uamow naplan müah iawk kown. Nakhowk khe che aia kowh rawka mih pik kowi pawk paw krawi pawk dowi bowt hai lep paw lep khai bowt hanow nami maru mih sürlawk dowi bowt pami uamow naphuangah kown. Tawngplawng kowchow panow nami dow bawr chowtaih. Now nami maru mih aia kowh khupdip tawngklai nachuta kown takla, nahanow aia dow sürlawkma naown kown nadowi bowt.7“Tawkchedow nami maru kowi sürlawkma nadowk pami uamow phuangta kung kowi paw nami bawr che aia pik kowi krawi pawk khai hanow nami maru kowi mih uamow tut-e nauang plan pawla iawk kown takla.8Now nami maru kowi mih uamow naplan müah iawk kown. Nami bawr che pik kowi krawi pawk khai hanow nami maru kowi mih asürlawkma pami uamow naphuangah kown. Tawngplawng kowchow panow nami dow pik rawka ngak chekhai.9“Lowra maru kowh pik rawka ngak phaw khai hanow nami maru kowi dow uamow tut-e nauang pawla kown takla.10Now uamow mih nami maru kowi namüah kown. Now nami maru kowh pik kowi che bau akawma phaw khai, bau rah re-e kowh pik pawi ün paw akawma phaw khai, now nami bau kowi paw ma sing uowi khai hanow11nami dow pik rawka ngak prim pami natukah kown takla. Now aia kowi dow asürlawkma pami uamow naphuangah kown. Aia kowi dow ranit ni mowr amük takla dowi bowt; akeng mih maru-uüa hownia nalang pe uowita hüah kown takla. Tawngplawng kowchow panow aia dow asürlawk taiama chekhai.12Nachenganchepaw nami pik rawka ngak che pabuk pakowma pawk mih aia khi khai hanow13nami maru kowi dow uamow namüah kown. Now nami maru kowh pik rawka pabuk pakowma kowi krawi tasak bowk khowk rakowi iung mih chowbowt pami uamow natukah kown. Nami maru kowh pik dow pabuk pakowma kowi akawma phaw khai bowt rakowi asürlawkma nadowk pahai uamow naphuangah kown.14Nachenganchepaw aia kow kowi che ma sing uang ta phaw khai hanow aia dow asürlawkma naown kown.15Now nami ma sing mü pe hanow nami maru kowi dow asürlawkma pami uamow naphuangah kown. Nami ma sing dow sürlawkma chekhai; aia dow pik rawka ngak phaw mih chekhai.16Now nami ma sing che lep kowh akawma uang phaw khai hanow nami maru mih uamow tut-e nakowkowi iawk kown takla.17Now uamow mih nami maru kowi naplan müah iawk kown. Now aia kow kowi kowh rawka che lep kowh akawma uang phaw khai hanow nami maru kowi mih sürlawk dowk pami uamow naphuangah kown. Now nami maru dow sürlawkma nadowi bowt chekhai.18“Lowra maru buk kowi che pawibau phaw kowh iung khowk chepaw, nami pawibau re-e akawma chepaw, ring-kawchow chepaw uang phaw khai hanow aia mih uamow kowi nakowtüng pe kown takla.20Now aia kowi mih uamow namüah kown. Nami pawibau lep lawi che pik lak-e lang büp khai, now nami re-e kowh pik pawi ün akawma phaw khai hanow aia dow asürlawkma pami uamow naphuangah kown. Nami pik rawka ngak dow pawibau hownia kowh awr phaw mih chekhai.21Nachenganchepaw nami pawibau re-e kowh pik pawi ün akawma nadowk, pik lak-e paw büp dowk, now lep paw lep khowk mih uamow khi hanow aia kowi dow akeng mih maru-uüa hownia ranit ni mowr nacham plan pe uowiah iawk kown.22Now nami pawibau che pik kowi krawi plan pawk khai hanow nami maru dow asürlawkma pami uamow naphuangah kown. Nami dow rawka ngak chekhai.23Nachenganchepaw nami pawibau lep lawi che taklowi paw taklowi dowi, now pawk paw krawi pawk dowi bowt hanow nami dow pawibau lep lawi chowtaih pami natukah kown takla. Now nami maru dow sürlawkma nadowi bowt pami uamow naphuangah kown.24“Lowra maru maih kowi kamta pik khai hanow nami kam mih re-e kowh ma sing kowi che ring-kawchow chepaw, akawchow chepaw phaw khai hanow25nami kam mih rah dow uamow namüah kown. Now nami kam mih re-e kowh pik pawi che akawma phaw khai, now kam mih re-e kowh ma paw pik lak-e che lang büp khai hanow nami dow kam rah re-e kowh pik rawka ngak awr phaw mih chekhai pami natukah kown takla. Now nami maru dow asürlawkma pami uamow naphuangah kown. Tawngplawng kowchow panow nami dow pik rawka ngak chekhai.26Nachenganchepaw uamow müah kowh nami kam mih rah re-e kowh pik pawi ün akawma phaw dowi, nami kam mih ma paw pik lak-e lang büp dowi, now kam mih ma paw uang lep khowk hanow nami maru kowi dow ranit ni mowr akeng mih maru-uüa hownia uamow nacham lang pe uowiah kown.27Now ranit ni mih ni khe aia kowi mih uamow naplan müah iawk kown. Nami khin khe nami kam mih ma che krawi pawk khai hanow nami maru dow asürlawkma pami uamow naphuangah kown. Tawngplawng kowchow panow nami dow pik rawka ngak chekhai.28Nachenganchepaw nami kam mih ma che klowi paw taklowi dowi, pik kowi pawk paw krawi pawk dowi bowt, now kam mih ma paw uang lep khowk hanow nami dow kam kowh bau mih chowtaih pami natukah kown takla. Now nami maru kowi dow sürlawkma nadowi bowt pami uamow naphuangah kown. Tawngplawng kowchow panow nami dow kam mih ma lawi chowtaih.29“Lowra mih maru lu kowi chepaw, kow kowi chepaw ma phaw khai hanow30nami maru kowi dow uamow namüah kown. Now nami ma che pik lak-e lang büp khai, nami ma phaw rah re-e kowh sam hai mawmpawi ün asinchow uang phaw khai, now apowm paw asüachow uang phaw khai hanow nami maru dow asürlawkma pami uamow naphuangah kown. Nami dow lu hai kow kowi kowh rak mih pik rawka ngak chekhai.31Now uamow müah kowh nami ma pik lak-e lang büp dowi bowt chepaw nami ma phaw rah re-e kowh sam hai mawmpawi che num dowi tak hanow nami kowi dow akeng mih maru-uüa hownia ranit ni mowr uamow nacham lang pe uowiah kown.32Now ranit ni mih ni khe dow nami ma mih uamow naplan müah iawk kown. Nakhowk khe nami rak mih ma che pawk paw krawi pawk dowi, nami ma phaw rah re-e kowh sam hai mawmpawi ün asüachow paw phaw dowi, now nami ma dow pik lak-e paw lang büp dowi hanow33nami maru kowh sam hai pawi dow nakhaita kown takla. Nachenganchepaw ma phaw rah re-e kowh sam hai pawi dow naia khai kown nadowi. Now nami maru kowi dow akeng mih maru-uüa hownia ranit ni mowr uamow nacham plan pe uowiah iawk kown.34Now ranit ni mih ni khe nami maru kowh rak mih rawka mih uamow naplan mü pe iawk kown. Now nami rawka che pik kowi krawi pawk dowi, now nami rawka che pik lak-e paw lang büp dowi hanow nami maru dow sürlawkma nadowi bowt pami uamow naphuangah kown. Now nami maru mih aia kowh khupdip tawngklai nachuta kown takla, now aia dow sürlawkma naown kown nadowi bowt.35“Now aia dow sürlawkma nadowi bowt pami phuangta kung kowi paw nami rak mih rawka che krawi pawk khai hanow36nami maru kowi mih uamow naplan müah iawk kown. Nami rak mih rawka che krawi plan pawk khai hanow nami ma re-e kowh sam hai pawi mih asüama phaw chünchü mih amük kla dowi bowt. Tawngplawng kowchow panow nami maru dow asürlawk taiama chekhai.37Nachenganchepaw uamow müah kowh nami rak mih rawka che klowi paw taklowi dowi, now nami ma phaw mih rah re-e kowh sam hai pawi paw anumma uang awm khowk hanow nami ma dow iung khowk pami natukah kown takla. Nahanow aia dow sürlawkma nadowi bowt pami uamow naphuangah kown.38“Lowra mih maru masiuüa lah, kachakuüa lah pik kowi che akaw akawma uang phaw khai hanow39nami maru kowi dow uamow namüah kown. Now nami akawma mih che lawiliama uang phaw khai hanow nami dow bawr chowtaih pami natukah kown takla. Nami dow napiakla pat mih rawka nadowi chekhai. Aia dow sürlawkma nadowi bowt chekhai.40“Lowra maru kowh che sam tachawi kowh lu takling khai chepaw nami maru dow asürlawkma naown kown nadowi.41Lowra maru kowh che kau sam tachawi kowh kau takia khai chepaw nami maru dow asürlawkma naown kown nadowi.42Nachenganchepaw nami lu klingma mih kowi lah, kau kiama mih kowi lah ring-kawchow phaw khai hanow nami dow pik rawka ngak phaw mih chekhai pami natukah kown takla.43Nami maru kowi dow uamow namüah kown. Now nami maru kowh lu klingma mih kowi lah, kau kiama mih kowi lah pik rawka ngak rawka iawng ring-kawchow uang phaw mih rah re-e bau khai hanow44nami maru kowh dow pik rawka ngak phaw mih chowbowt pami natukah kown takla, now aia dow asürlawkma chekhai. Aia lu kowi pik rawka ngak phaw rakowi nami maru dow asürlawkma pami uamow naphuangah kown.45“Naiawng pik rawka ngak phaw mih maru dow tawnguat sekma mih nakhup kown takla. Now aia dow sam paw naia rüt kown nadowi; prunthuma naiiata hüah kown takla. Nami klen kowi aia mih pumta nawr hanow hek se, ‘Ang dow sürlawkma, ang dow sürlawkma,’ pah paw natek kown takla.46Nami maru dow aia buk kowi pik rawka ngak uowi mowr asürlawkma naown kown. Naiawng rakowi aia malowkchow kowi tangbung khup rah uat kowi nacham lang pe uowiah kown takla.47“Lowra mih tawnguat hai chak pik hown kowh thawpah mih uanh dow ia mawd chekhai.49Tawnguat hai chak pik hown kowh thawpah mih uanh kowi che asingchow mih lawi lah, aringchow mih lawi lah phaw khai hanow nami dow mawd mih chekhai pami natukah kown takla. Nami uanh dow uamow kowi natüng pe kown takla.50Now nami uanh mih uamow namüah kown. Nami uanh dow akeng mih uanh hownia ranit ni mowr uamow nacham lang pe towah kown.51Now ranit ni mih ni khe dow nami uanh mih uamow naplan müah iawk kown. Nakhowk khe tawnguat kowi lah, chak pik hown kowh thawpah mih uanh kowi lah — asingchow mih lawi chepaw, aringchow mih lawi chepaw phaw mih che uang phia ngamlam hanow nami dow mawd mih chowbowt pami natukah kown takla. Nami uanh dow asürlawkma chekhai rakowi natikta kown takla.53“Nachenganchepaw uamow müah kowh asingchow chepaw, aringchow chepaw phaw mih uang phia dowi bowt hanow54nami uanh mih nachuah hai nasauah kown mih uamow napeah ana kown. Nami kung kowi dow nami uanh mih akeng mih uanh hownia ranit ni mowr uamow nacham lang pe towah iawk kown.55Nami kung kowi dow nami uanh mih uamow naplan müah iawk kown. Nami mawd mih uang phia dowi bowt chepaw auown khe kowh iawng asingchow hai aringchow reng tak hanow nami uanh dow asürlawkma pami natukah kown takla. Uanh lak kowi chepaw, uanh kum kowi chepaw naiawng mawd mih dow natikta kown takla.56“Now nami uanh chuta hai sauta kung kowi paw mawd mih re-e lawiliama phaw mih uamow khi hanow nami lawiliama mih rah dow nasekta kown takla.57Nachenganchepaw tawnguat lah, chak pik hown kowh thawpah mih uanh lah asingchow chepaw, aringchow chepaw plan phaw khai hanow nami dow uang phia ngamlam mih chowbowt pami natukah kown takla. Nami mawd mih uanh dow natikta kown takla.58Nami uanh dow chuta hai sauta kung kowi mawd mih powt khowk chepaw naplan pe chuta hai sauta iawk kown takla, nahanow nami uanh dow sürlawkma naown kown nadowi bowt,” pakhai.59Naiawngün dow tawnguat lah, chak pik hown kowh thawpah mih uanh lah mawd khe kowh rirow chekhai. Nami rirow iawng uanh sürlawk dowi mih hai sürlawkma mih dow uamow naphuangah kown takla.
The Seed Company