Leviuüa12
1Nami kung kowi CHAKRAMANG tek pe Mosi mih,2“Israeluüa kowi kowtek pe diah: Masiuüa uowi kim khe che kachakuüa chah chekhai hanow nami masiuüa mih ranit ni mowr asür alawkma nauowi kown. Uisawng uowi khe kowh iawng dow aia mih ranit ni mowr asür alawkma naown kown.3Now raiat ni mih ni khe dow achapa kowi nahiah pe khampha uanpik kown takla.4Nami kung kowi paw nami masiuüa mih aia kowh vi hawk mih rakowi asür alawkma 33 ni mowr nauowi tak kown. Nami 33 ni mowr dow asür alawkma tak rakowi aia mih chimsaima mih uanh naia kak kown nadowi tak, now taklowp taklangra te riaret kowi paw naia kowi kown nadowi.5Nachenganchepaw masiuüa uowi kim khe che masiuüa chah chekhai hanow nami masiuüa mih pre sapta mowr asür alawkma hai nauowi kown. Nami pre sapta kung kowi paw nami masiuüa mih aia kowh vi hawk mih rakowi asür alawkma 66 ni mowr nauowi tak kown.6“Kachakuüa chah chepaw, masiuüa chah chepaw asür alawkma uowi mih ni chur kung kowi uowi kim mih masiuüa mih tawncher hown nachang phuchua kown takla. Aia dow taklowp taklangra te plawt re-e uamow tut-e tikah mih uanap chang müa paningchow mih ruapur chah lowk, now angak lawt müa kowi kowh uanap chang müa kimtawn uatur chepaw, kaurawng uatur chepaw nakowpawla lowk kown.7Naiawngün dow CHAKRAMANG tut-e uamow naphuchuaah now nami masiuüa kowh sürlawkma mih dow nahenta pe kown. Nami kung kowi dow nami masiuüa mih aia kowh vi hawk mih rakowi tasür talawk mih hownia asürlawkma nauowi kown nadowi bowt. Mami dow masiuüa vüi kimuowi kung kowi kowh rirow chekhai.8Now nachangla phuchua kownkow aia che uang ia pawla ruapur chah dowi hanow kimtawn uatur chepaw, kaurawng uatur chepaw nauang pawla pre buk kown takla. Nami pre buk mih kowi dow tikah mih uanap chang müa lowk, now alowk mih dow angak lawt müa kowi kowh uanap chang müa naown kown. Naiawng hai aia kowh sürlawkma mih dow uamow nakhuta pe kown, now aia mih asürlawkma nauowi kown nadowi bowt,” pape khai.
The Seed Company