Tara chet miuüa5
Kanan pren mang kowi nowngta mih ni khe kowh meng
1Nami ni khe Debawra hai Abinoam kowh chapa Barak iüah maiawng tek meng khai:2“Israel aluchowuüa dow tasenra kowi maru kawmuüa kowi kruitownah khai,now maru kawmuüa mih amatni sak nau hown tawi tarü tasen khai.CHAKRAMANG dow akiow pacham uowi lah.3Aw manguüa, sünta büa diah;aw kruitown miuüa, pe ching büa diah.CHAKRAMANG vüi ang natek meng kown,CHAKRAMANG Israeluüa kowh Thurai vüi kiow meng ang natek kown.4“Aw CHAKRAMANG, Seir hungh hownia en tarowng mang khe,Edawm pren hownia en uang lawt khe,lusa dow chür nukluk khai,mukuang kowi kowh uangnim hownia tui uang takhük plawtlawt khai.5CHAKRAMANG pur kowi dow hungh ün chürla kluk khai,CHAKRAMANG Israeluüa kowh Thurai pur kowi dow Sinai hungh chür nukluk khai.6“Anat kowh chapa Samgar chowng khe hai Jael chowng khe tiama chung iawng miapaw uam mang dowi chekhai.Cham kowi khari miuüa khowm padow akeng tiama chah iawng cham ria bowk chekhai.7Ang Debawra mih Israeluüa tut-e uang uowi dowi mowr,amatni kowh u iawng ang chowng dowi mowr,Israeluüa kowh kua kowi miapaw uowi dowi chekhai,now amatni kowh kua dow akhaw aklaima chekhai.8“Amatni dow akeng thuraiuüa prakowi cham pe ching büah khai.Nakhowk khe dow amatni kowh tapplawt re-e tasen phaw khai.Israeluüa 40,000 ia rut kowi kawngma lowkchow khowm uowi dowi;amatni rut kowi dow reh lowkchow khowm uowi dowi chekhai.9Ang kowh sak dow Israel aluchowuüa maten tut-e chekhai,ang kowh sak dow amatni sak nau hown cham dowk tasen miuüa tut-e chekhai.CHAKRAMANG kowi kiowah büa diah!10Kawrngaramchükma klangiungma mih luk kowi kowh chowm miuüa low,kawrngaramchükma luk kowi kowh asung khakma mih uan dau luk kowi chowm miuüa hai khawk hown kowh mang miuüa low,enni mih maiawngün lawnguan srui kowi tek meng büa diah.11Tuikuam re-e kowh tünteu chang miuüa kowh klow sünta büa diah,amatni dow CHAKRAMANG awng mih lawnguan tatek khai.Tünteu chang miuüa kowh how klow sünta büa diah,amatni dow Israeluüa awng mih laiklow tatek khai.Naiawngün tata hanow CHAKRAMANG kowh maru-uüa dow kowkowi khai,amatni dow marow tapplawt re-e kowkowi büa khai.12“Rü diah, Debawra rü diah!Rü diah, rü diah, chu i tek meng diah sik.Abinoam kowh chapa Barak, rü diah;A-i kowh ransu-uüa kowi khümla diah.13“Ta sing uowi miuüa dow siphai aluchowuüa tut-e uang khai,CHAKRAMANG kowh maru-uüa dow uang tarü tasen khai.14Tawngbak miuüa dow Amalekuüa uowi rah kowi kowh Efraimuüa süng hownia uang khai,amatni dow Benjamin krungchakuüa kung kowi uang krawi uang khai.Makir hownia dow siphai aluchowuüa uang khai,Zebulun hownia dow pren kruitown miuüa uang khai.15Isakar kowh aluchowuüa dow Debawra hown tawi tarü khai,Isakar kowh maru-uüa dow iowm se iowm se lawngrawi kowi kowdowm khai,now amatni dow Barak kung kowi tawi krawi büah ruirui khai.Nachenganchepaw Reuben krungchakuüa dow uang tawi dowi chekhai.16“Aw Reuben krungchakuüa, tawngplawng kowchow ruapur tung takra kowi enni chowm phülü?Ruapur thing miuüa kowh prui tün enni sünta kown nau mih bow?Reuben krungchakuüa dow takrüp tangi dowi chekhai,amatni dow tawng chow chang kown mih tuk büah dowi.17Gilead kowi kowh maru-uüa dow Jawrdan aw paipra pown kowi ta uowi khai,tawngplawng kowchow Dan krungchakuüa dow chawnlawng kowi ta uowi khai?Aser krungchakuüa dow sata pang kowi ta uowi khai,amatni dow chawnlawng naira re-e ta uowi khai.18Nachenganchepaw Zebulun krungchakuüa dow singsing kowngkowng tawi dowk tasen khai,Naptali krungchakuüa paw singsing kowngkowng tasenra kowi maru dowi rawn rik khüa khai.19“Kananuüa kowh manguüa dow uang dowk tasen khai,amatni dow Megido aw re-e kowh Tanak kowi uang tasen khai.Nachenganchepaw tai paiunchow paw ia rupla büah dowi chekhai.20Mukuang hownia krek ün paw tawi dowk tasen khai,amatni dow amatni uowi rah hownia Sisera kowi senah khai.21Ransu-uüa kowi dow alai kowh Kisawn aw nawmla bowk khai.Aw ang kowh sak, sakkraingma hown pur prakowi mang ngamlam diah.22“Nami kung kowi dow kawrnga khawk chawp tün nowk rumrum khai,akürma kangowh mih kawrnga hawmh dow alenma iowm khai.23CHAKRAMANG kowh kramamu tek mih, ‘Merawz marow kowi peah piati diah,nakowi kowh maru-uüa kowi lainowmma peah piati diah.Amatni dow CHAKRAMANG kowi tawi khowngah tasen dowi chekhai,amatni dow akürma mih ransu-uüa kowi tawi sen dowi chekhai,’ pakhai.24“Ken chenchap Heber kowh masi Jael dow prasira uowima chekhai,tangbung kowi uowi mih masiuüa pungmadawng kowi aia dow prasira lang uowi chekhai.25Sisera lü tui khe aia dow uang pawla pe iawn tui khai,bia klangiungma mih hown aia dow uang pawla pe iawn tui bawi khai.26Akung kowi dow lakuai rut hown uang pawla tangbung tük müa chungh lowk khai,now hawmlawm rut hown dow uang dowkla matul lowk khai.Aia dow Sisera kaubeng kowi nami tangbung tük müa chungh takta pe pit khai,now aia dow Sisera kowh lu teuta pe iawm khai.27Sisera dow Jael khawk re-e hing takuak hüah khai,aia dow nami re-e hing kowng khai.28“Sisera kowi dow tawngpawk hownia a-u hawt tang müah khai,aia dow tawngpawk kowi downg klawlaw se atünma tek mih,‘Tawngplawng kowchow kawrnga kari uang plan mih kra lai kowbow?Aia kowh kawrnga kari khawk tün ta dowi reng kowbow?’ pakhai.29Aia kowi dow prengia uowima mih auiuauüa klangah khai,nami powm iawng aia paw sakdawng hownia tawi tek mih,30‘Cham rupah mih uanh kowbüah cham ka tangtang,amatni pungmadawng kowi taret uanh büah mih naown.Kachakuüa lowk ia kowi masiuüa lowk ia downow pre ia chi naown.Sisera vüi dow asing asüama mih tawnguat naown,now ang vüi dow sawt pe pau mih tawnguat naown.Ngawng tapat lut klangiungma sawt pe pau mih tawnguat cham ka büah dowi tham pabow?’ pakhai.31“Aw CHAKRAMANG, en kowh ransu-uüa Sisera iawng pacham piak bowk lah.Nachenganchepaw sakrau en miuüa dow sat iawng pacham kür reng lah,” pakhai.Nami kung kowi dow pren mih 40 ning mowr athaulangma chekhai.The Seed Company