Tara chet miuüa4
Israeluüa kowh tara chet mih Debawra
1Ehud kowng kung kowi Israeluüa mih CHAKRAMANG mik kowi angakma mih lup ta plan chang khai iawk.2Naiawng rakowi CHAKRAMANG mih Israeluüa kowi Kanan pren mang Jabin rut kowi ap-ah khai. Jabin chowm mang mih dow Hazawr marow kowi chekhai. Aia kowh siphai aluchow dow Sisera chekhai. Sisera uowi mih dow Harawset-Hakawim pami arah kowi chekhai.3Siphai aluchow Sisera kowh dow lawngha hown kowh kawrnga kari uowi 900 klüng chekhai. Aia dow pirmi ning mowr mih Israeluüa kowi lainowmma changah anowng apowng khai. Naiawng rakowi Israeluüa mih CHAKRAMANG tut-e kar se awr lü khowng khai.4Nami khin khe Lipidawt kowh masi Debawra pami masiuüa risi uowi lowk ia. Aia dow Israeluüa kowh tara chet miia chekhai.5Debawra dow aia kowh chekmarawng singh tut kowi chowm reng chekhai. Now Israeluüa mih amatni takhowk taran hanow nachet pe tara kownkow aia tut-e uang reng chekhai. Nami chekmarawng singh uowi mih dow Efraim krungchak kowh hungma mawngma süng kowi kowh Rama hai Bethel takra kowi chekhai.6Akat khe aia dow kowchin maru hanow Naptali pren kowi kowh Kades marow kowi uowi mih Barak kowi uang hawla khai. Barak dow Abinoam kowh chapa chekhai. Aia tek pe Barak mih, “CHAKRAMANG Israeluüa kowh Thurai pe en ana mih maiawng: Naptali hai Zebulun krungchak hownia paw maru iun 10,000 ia diah. Now amatni kowi Tabawr hungh prakowi kowpawla diah.7Mang Jabin kowh siphai aluchow Sisera kowi aia kowh siphai hawmh hai aia kowh lawngha hown kowh kawrnga kari hailawm Kisawn aw re-e ang nauang pawla en kown. Now amatni kowi mih en rut kowi ang naap-ah kown,” pakhai.8Nakhowk khe Barak tek pe Debawra mih, “Ang hown che en tawi now ang kowkowi kown. Nadowi now ang kowkowi dowi tham,” pape khai.9Debawra tek pe mih, “Ow, ang tawi sow. Tawkchedow nami tasen awng mih kowi kowh kiowrira en naka kown nadowi. Tawngplawng kowchow panow CHAKRAMANG mih Sisera kowi masiuüa lowk ia rut kowi naap-ah kown chekhai,” pakhai. Nami kung kowi dow Debawra mih Barak hown Kades marow kowi kowtawi khai.10Now nakowi mih Zebulun krungchakuüa hai Naptali krungchakuüa pungmadawng hownia maru iun 10,000 ia Barak hawah khai. Nahanow aia dow naiawngün maru kawmuüa hown tarü khai bowt, now Debawra paw Barak tut-e tawi khai.11Nami khin khe Zananim pami arah kowi kowh sasua singh re-e khup tangbung mih Heber pami maru uowi lowk ia. Nami arah dow Kades marow hown atawnchow chekhai. Heber dow Ken chenchap chekhai. Aia dow amasi Jael hown amatni Ken chenchapuüa hownia lang uowi khai. Kenuüa dow Mosi kowh pu Hobab hown pachen sang chekhai.12Sisera mih Tabawr hungh kowi Abinoam kowh chapa Barak kowkowi mih satang tata khai. Naiawng rakowi aia dow aia kowh 900 klüng mih lawngha hown kowh kawrnga kari hai aia kowh siphai hawmh kowi kuaah khai. Now aia dow naiawngünuüa hown Haroset-Hakoim hownia Kisawn aw pang kowi kowkowi khai.14Nakhowk khe Debawra tek pe Barak mih, “Tarü diah! Ani dow CHAKRAMANG mih en rut kowi Sisera kowi apta mih chowbowt. CHAKRAMANG mih en pur kowi rik mang khowk,” pakhai. Naiawng rakowi Barak dow pawla maru iun 10,000 ia now Tabawr hungh hownia iu dowm khai bowt.15Now Barak dow aia kowh siphai hawmh hown Sisera kowi uang dowkah tasen khai. Nami khin khe CHAKRAMANG mih Sisera hailawm aia kowh kawrnga kari maten hai siphai hawmh maten kowi peah takrow takraira khai. Now Sisera dow aia kowh kawrnga kari hownia iu dowm hanow cham powt khai.16Nachenganchepaw Sisera kowh lawngha hown kowh kawrnga kari hai siphai hawmh kowi dow Haroset-Hakoim mowr Barak kawikrawiah khai. Now siphai hawmh maten kowi dow aia saita pe bowk khai; lowk iachow kowi paw aia pe plaiah dowi chekhai.17Tawkche Sisera dow iowm se Ken chenchap Heber kowh masi Jael kowh tangbung re-e kowpowt khai. Tawngplawng kowchow panow Hazawr marow mang Jabin dow Heber krungchakuüa hown auiua sinma chekhai.18Jael dow Sisera kowi khita hanow tangbung hownia uang lawt khai. Now tek pe aia mih, “Chakramang, tangbung lak kowi uang kup bowt. Kaah kram dowi,” pakhai. Nahanow Sisera dow tangbung lak kowi kowkup hanow mawk khai. Now aia kowi dow uanma hown Jael mih mumta khai.19Sisera tek pe Jael mih, “Ang tui sakkrai khai. Sakrauma hown pe kham ang tui ditchow dit,” pape khai. Naiawng rakowi Jael mih chak pik hown kowh iawn tui towk rah im ho pe hanow aia kowi pe khamah iawn tui khai. Now aia kowi dow uanma hown plan mumah khai iawk.20Nami kung kowi Sisera plan tek pe Jael mih, “Tangbung plawt kowi kowhawt iowng diah. Now ‘Alak kowi mia chow uowi?’ padow maru nauang lünta en chepaw naia kown. Nami khin khe ‘Miapaw uowi dowi’ padow hawt tek pe diah,” pape khai.21Sisera dow bowm lai rakowi hing amüi khai. Nakhowk khe Jael mih tangbung tük müa chung hai matul pawah khai. Now aia dow salow salowchow Sisera re-e kowkowi khai. Now nami chung dow Sisera kaubeng kowi Jael iu tak pe khai. Nami dow kaubeng mapra dam hownia krawng kowi taplawn pluk khai. Nahanow Sisera dow kowng khai.22Barak dow nakrawi cham Sisera kownkow Jael kowh tangbung re-e uang khai. Now Jael dow Barak kowi khita hanow tangbung hownia uang lawt khai. Now tek pe aia mih, “Alak kowi uang kup diah! En krawi chamah mih maru kowi ang tüng en sow,” pape khai. Naiawng rakowi Barak dow alak kowi kowkup khai. Now Sisera uak takuak hüah mih hai aia kaubeng kowi tangbung tük müa chung tatak hüah mih aia kowkhi khai.23Nami ni khe CHAKRAMANG mih Kanan pren mang Jabin kowi Israeluüa tut-e pe sumah khai.24Nami kung kowi dow Israeluüa mih uang kür ngamlam hanow nami mang kowi hing piakta büah khai.The Seed Company