Tara chet miuüa21
1Benjamin krungchakuüa hown tasen dowi rawn Israeluüa mih Mizpa pami arah kowi takua talawm khai. Nakhowk khe Benjamin krungchakuüa kowi amatni napeah chama dowi kownkow takham büah khai.2Nachenganchepaw tasen kung kowi dow Bethel marow kowi amatni kowkowi khai, now sat kup dowi mowr CHAKRAMANG pur kowi atün atünma kowkar büah khai. Amatni tek mih, “Aw CHAKRAMANG Israeluüa kowh Thurai, Israeluüa luk kowi tawngplawng kowchow maiawng en tuk pe phawah khai? Israeluüa pungmadawng hownia tawngplawng kowchow krungchak taküm dowi lowk?” pabüah khai.4Now amatni dow auai rau murpa awr rü hanow thawp phuchuara lowk khai. Now tikah mih uanap hai taking tasangra uanap chang büah khai.5Amatni dow lowkkowlowk talünta büah mih, “Israel krungchakuüa pungmadawng kowi Mizpa kowi kowh uang tawi dowi mih uowi ne bow?” pabüah khai. Tawngplawng kowchow panow Mizpa kowi CHAKRAMANG pur kowi uang tawi dowi mih kowi dow nakowngta ngengche kown pahai Mizpa kowi takham büah khai.6Amatni dow amatni kowh tainau Benjamin krungchakuüa vüi sak nga khai. Amatni tek mih, “Israel krungchakuüa pungmadawng hownia ani dow krungchak takhuowi lowk khowk.7Ta sing uowi mih Benjamin krungchakuüa kowi tawng iawng chow a-i cham ka pe masi kown? A-i kowh chamauüa kowi dow amatni hown a-i pe tachawngah kown nadowi padow CHAKRAMANG ming hown a-i takhamta khowk,” pabüah khai.8Amatni dow lowkkowlowk talünta büah mih, “Israel krungchak pungmadawng hownia Mizpa kowi CHAKRAMANG pur kowi uang tawi dowi mih uowi ne bow?” pakhai. Nakhowk khe amatni dow Jabes-Gilead hownia miapaw uang tawi dowi mih tukta büah khai.9Tawngplawng kowchow panow amatni rüa maru iun mih khin khe Jabes-Gilead hownia kowh maru-uüa kowi lowk iachow paw khila büah dowi chekhai.10Naiawng rakowi amatni dow amatni kowh akürma mih siphai hawmh pungmadawng hownia 12,000 ia kowi Jabes-Gilead kowi kowchinah khai. Naiawngünuüa kowi krawi tek pe büah mih, “Katpaw taphua taiua dowi tak mih malauüa hawmh klen kowi dow aiuk asowm, masiuüa kachakuüa uowi mih srui kowi saila büa diah,” pakhai.12Now siphai hawmh dow Jabes-Gilead kowi kowh katpaw taphua taiua dowi tak mih malauüa kowi kala 400 ia khai. Now naiawngün malauüa hawmh kowi dow Kanan pren kowi kowh Silo marow kowi tangbung khup rah kowi uang pawla büah khai.13Nami kung kowi dow Israeluüa mih Rimawn huamang kowi Benjamin krungchakuüa tut-e kowchin maru khai. Nahanow amatni dow Benjamin krungchakuüa hown kowtalawp khai, now taking tasangra laiklow phuang büah khai.14Now Benjamin krungchakuüa mih Rimawn huamang hownia plan khai bowt. Now akeng mih Israeluüa dow Jabes-Gilead hownia kowh towah sing mih masiuüa hawmh hown amatni kowi pe tachawngah khai. Nachenganchepaw amatni bowkbowk vüi masiuüa takhowm dowi chekhai.15Israeluüa dow Benjamin krungchakuüa vüi sak nga khai. Tawngplawng kowchow panow Israel krungchakuüa kowh takrüpra dow CHAKRAMANG piakta pe khai.16Naiawng rakowi Israel lawngtang aluchowuüa tek mih, “Benjamin krungchak kowi kowh masiuüa hawmh kowi dow a-i kowngta bowk khowk chekhai. Kawmat kowh ta sing uowi mih kachakuüa hawmh kowi tawng kowi chow a-i cham ka pe masi kown?17Israeluüa pungmadawng hownia pachen mih natama dowi kownkow ta sing uowi mih Benjamin krungchak kowi nalawngah kown takla.18Nachenganchepaw a-i kowh chamauüa kowi dow amatni kowi a-i ia pe dowi bowt. Tawngplawng kowchow panow Benjamin krungchakuüa kowi peah chama mih maru dow pacham ka piati lah pami a-i takhamta lai khowk chekhai,” pabüah khai.19Nami kung kowi amatni tek mih, “Silo marow kowi ning towng CHAKRAMANG vüi pawi phaw reng,” pabüah khai. Silo marow dow Bethel marow hownia tawngphak pra kowi, Lebona marow hownia mrawkphak pra kowi, now Bethel marow hownia Sekem marow kowi mangla mih tiama satlawt prakowi chekhai.20Amatni tek pe Benjamin krungchakuüa mih, “Silo kowi kowkowi büah now grep krum kowi kowhawt tapet büa diah, now hawt tang müah büa diah.21Silo kowi kowh malauüa hawmh uang dowm plai khowk hanow grep krum hownia enni nalawt kown. Now enni nauah mih kowi nakhümla lowk ia chi hanow Benjamin krungchakuüa kowh süng kowi enni napawla kown.22Naiawngün masiuüa hawmh kowh pa chepaw, arakuüa chepaw nauang chawk lai kownkow anging tut-e nauang kown. Nakhowk khe maiawng anging hawt tek pe kown, ‘Anging kowi tuakla se Benjamin krungchakuüa kowi saksing sanaah büa diah; enni kowh chamauüa kowi amatni kowi hing peta diah towbowt. Tawngplawng kowchow panow tasenra hownia paw amatni takhowm iawng a-i uang kala pe masi dowi chekhai. Enni pe pawah mih nadowi kowi amatni uang pawah mih chekhai. Naiawng rakowi enni luk kowi aprek nauowi kown nadowi,’ pabüah khai,” pakhai.23Naiawng rakowi Benjamin krungchakuüa dow naiawng chang khai. Amatni dow malauüa hawmh plai mih khin khe amatni chowlowkkow vüi khümla lowk ia chi hanow pawla büah khai. Now amatni kowh krawng bawn kowi kowplan büah hanow amatni kowh marow hai kua mih kowplan thawpah büah khai. Now nakowi mih uowi büah khai bowt.24Nami kung kowi dow Israeluüa mih nami hownia amatni chowlowkkow krungchakuüa kowh krawng bawn kowi mang büah khai bowt.25Nami khin khe Israeluüa kowh dow mang uowi dowi tak chekhai. Naiawng rakowi amatni dow chowlowkkow sak nau iawng chang büah khai.
The Seed Company