Ruth1
Naomi kowh iaumow Ruth
1Tara chet miuüa kruitown pren mih khin khe Israel pren kowi mih khown kuak pakat chekhai. Nami khin khe Judauüa süng kowi kowh Bethlehem marow kowi Efrat krungchak Elimelek pami maru uowi lowk ia. Amasi ming dow Naomi chekhai, now achapa pre ia ming dow Malawn hai Kiliawn iüah chekhai. Israel pren kowi khown kuak rakowi aia dow amasi hai achapa pre ia kowi pawla now Moab pren kowi nakowuowi tak kownkow kowpowt khai.3Moab pren kowi uowi büah khe Elimelek dow kowng khai. Now ta uowi mih dow Naomi hai achapa pre iachow towbowt chekhai.4Now ahua kowng kung kowi Naomi dow achapa pre ia kowi ta paw pe masi khai. Achapa pre ia kowh masi dow Moab prenchak masiuüa chekhai. Lowk ia mih ming dow Awrpa, now alowk mih ming dow Ruth chekhai.5Nachenganchepaw Moab pren kowi amatni uowi mih hamüt ning ngia kung kowi Malawn hai Kiliawn iüah dow kowng khai. Nami hownia bowt now Naomi dow aia malowkchow towbowt chekhai.6Moab pren kowi uowi reng tak khe Naomi dow CHAKRAMANG mih aia maru-uüa kowi khowngah mih hai peah chakkham mih satang tawi ta khai bowt. Naiawng rakowi aia mih aiaumow pre ia kowi pawla now Moab pren hownia aia kim prakowi namang kownkow kamrüt khai bowt.7Aia dow aiaumow pre ia kowi pawla now Moab pren hownia lawt khai bowt, now Juda pren prakowi kowh mangla mih tiama kowi mang büah khai bowt.8Tiama rawng kowi aiaumow pre ia kowi Naomi tek pe mih, “Enching matia u-pa kim kowi plan iüa diah towbowt. Enching kowh hua kowng mih hai ang kowi enching saksing sana iawng CHAKRAMANG paw pacham saksing sana enching lah.9Thaulangma hown hua kim kowi enching naplan ka uowila iawk kownkow CHAKRAMANG dow pacham pe enching prasi lah,” pakhai.Naiawng ki tek pe hanow aia dow aiaumow pre ia kowi nam pe awm khai, now aiaumow pre ia dow atün atünma kar khai.10Nakhowk khe aiaumow pre ia tek pe mih, “Lan kown angching nau dowi. En hown en kowh chenchapuüa tut-e angching tawi kown,” pape khai.11Now Naomi tek pe mih, “Naiawng nadowi iauchow iüah low, enching matia u-pa kim kowi phai kowlan iüa diah. Tawngplawng kowchow ang hown enching natawi kown? Enching nachangla hua kownkow ang naplan ka enching chapa iawk kown mih enching ming bow?12Naiawng nadowi iauchow iüah low, enching matia u-pa kim kowi phai kowlan iüa diah. Ang kowh dow nacham mang iawk kown mih ning uowi dowi bowt. Naka chah iawk kown mih sakowmra hown aiak ang hua hown ang tawi taphak khowm padow ang kowh chah iuk dowi mowr enching nowng chawng kown pabow? Naiawng nadowi, kim kowi phai kowplan iüa diah towbowt. Enchi kowi tawngpaw ang tawi nowng khowng enchi dowi rakowi lainowmma ang sak kowi rau khai. Tawngplawng kowchow panow ang kowi dow CHAKRAMANG kingküa ang mih chekhai,” pape khai.14Nami laiklow tata hanow aiaumow pre ia dow atün atünma kar khai iawk. Nami kung kowi Awrpa dow anowkaw kowi namla pe awm now aia kim prakowi mang khai bowt. Nachenganchepaw Ruth dow anowkaw kowi plawtah dowi chekhai.15Nakhowk khe Ruth kowi Naomi tek pe mih, “Mü madiah, en naumow dow aia maru-uüa tut-e hai aia kowh thuraiuüa tut-e mang khowk. En paw aia iawng tawi mang towbowt,” pakhai.16Nachenganchepaw Ruth klangah mih, “Napowtta en kownkow kür hown hauang chin ang diah, now en hown natawi kown mih paw hauang hang ang diah. En cham kowi rah kowi ang paw natawi kown, now en cham uowi rah kowi ang paw natawi uowi kown. En kowh maru-uüa dow ang kowh maru-uüa pachowng lah, now en kowh Thurai dow ang kowh Thurai pachowng lah.17En cham kowng rah kowi ang paw natawi kowng kown, now en tadupra kowi ang kowi paw maru mih pacham dup ang lah. Kowngra klen kowi dow miapaw hang pacham prai achi lah. Kowng dowi rawn che ang powtta en khai hanow CHAKRAMANG mih rip chamang pacham rip ang lah,” pape khai.18Nami laiklow tata hanow aia tut-e Ruth natawi ngengche kown nau mih Naomi tukta khai bowt. Naiawng rakowi nami hownia bowt now Ruth kowi tawngpaw Naomi tek pe dowi bowt chekhai.19Nami kung kowi amatchi dow mang mang now Bethlehem marow kowi kowting iüah khai bowt. Bethlehem marow kowi kowting iüah mih khin khe kuachakuüa dow lainowmma hawt awda hai awmrawm khai. Kuachak masiuüa hawmh tatek mih, “Naomi nadowi bow paimi?” pabüah khai.20Naomi tek pe mih, “Naomi pahai hauang haw ang büah tham bowt. Mara pahai haw ang büah rowt diah. Tawngplawng kowchow panow lang kri lang kraing mih Thurai dow ang kowh chownglawng akhakma changta ang khai bowt.21Mami hownia Moab pren kowi ang kowkowi khe dow ang kowh uowi bowk chowdiah. Nachenganchepaw CHAKRAMANG dow akhaw aklaima hown uang pe plan ang khai. CHAKRAMANG lang kri lang kraing mih Thurai dow kingküa ang hai towk ang ngare khai. Naiawng CHAKRAMANG chang ang khowk chepaw tawngplawng kowchow Naomi pahai enni tuk haw ang khai?” pakhai.22Naiawng hai Naomi dow aiaumow Ruth hown Moab pren hownia uang plan mang khai. Amatchi dow uown ngen iakmow thüm khe Bethlehem marow kowi uang ting iüah khai.
The Seed Company